فوتو: egemen.kz
«20 ميلليونىنشى ازاماتتىڭ تۋعان كۇنى بارلىق قولدا بار دەموگرافيالىق دەرەكتەردى ەسكەرە وتىرىپ ايقىندالدى: قازاقستان رەسپۋبليكاسىنا تۇراقتى تۇرۋعا كەلگەن جانە ودان شىققان, تۋعاندار مەن قايتىس بولعانداردىڭ سانى. بۇرىن حالىق سانى تۋرالى مالىمەتتەر قولمەن وڭدەلەتىن جانە بۇل كوپ ۋاقىتتى قاجەت ەتەتىن. مەملەكەتتىك اقپاراتتىق جۇيەلەردىڭ ينتەگراتسياسى بۇل پروتسەستى جەدەلدەتۋگە جانە 20 ميلليونىنشى ازاماتتىڭ تۋعان كۇنىن جوعارى دالدىكپەن جانە قىسقا مەرزىمدە انىقتاۋعا مۇمكىندىك بەردى.
حالىقتىڭ دەرەكتەر بازاسىنىڭ كورسەتكىشتەرىنە سايكەس, 2023 جىلعى 14 قاراشادا تاڭعى ساعات 8.10-دا تۋعان 5 بالا ەلىمىزدىڭ 20 ميلليونىنشى تۇرعىنى اتاندى. قازاقستاننىڭ مەرەيلى ازاماتتارى ۇلىتاۋ, جەتىسۋ, اتىراۋ, اقمولا جانە تۇركىستان وبلىستارىندا دۇنيەگە كەلدى. ولاردىڭ ىشىندە 3 ۇل جانە 2 قىز بار. ەستەرىڭىزگە سالا كەتەيىك, 1991 جىلى قازاقستان رەسپۋبليكاسىنىڭ حالىق سانى 16,4 ملن ادامدى قۇرادى. تاۋەلسىزدىك جىلدارىندا ەل حالقى 22,3% ءوستى. ماسەلەن, 2022 جىلى 1991 جىلمەن سالىستىرعاندا تۋ سانى 353,2 مىڭنان 403,9 مىڭ ادامعا دەيىن نەمەسە 14,7% ءوستى.
بالا تۋدىڭ ەڭ جوعارى ءمانى 2021 جىلى تىركەلىپ, 446 مىڭ بالانى قۇرادى. تابيعي ءوسىمنىڭ ارتۋى, ونىڭ ىشىندە نارەستە ءولىمىنىڭ ازايۋى ناتيجەسىندە قامتاماسىز ەتىلدى. جالپى ءولىم-ءجىتىم 1991 جىلعى 8,20-دان 2022 جىلى 1000 تۇرعىنعا شاققاندا 6,8 ادامعا دەيىن تومەندەدى. سابيلەر ءولىمىنىڭ كوەففيتسيەنتى 3,5-تەن استام ەسە تومەندەدى, 1991 جىلعى 27,3 جاعدايدان 2022 جىلى دۇنيەگە كەلگەن 1000 ادامعا شاققاندا 7,7 جاعدايعا دەيىن.
حالىقتىڭ 1000 ادامعا شاققانداعى تۋ كورسەتكىشىن كورسەتەتىن جالپى تۋ كوەففيتسيەنتى تاۋەلسىزدىك جىلدارىندا 1991 جىلعى 21,6-دان 2021 جىلى 23,6-عا دەيىن ءوستى. 2022 جىلى بۇل كورسەتكىش 20,7 بولدى. ەڭ ماڭىزدى دەموگرافيالىق كورسەتكىشتەردىڭ ءبىرى بولىپ تابىلاتىن تۋدىڭ جيىنتىق كوەففيتسيەنتى 1991 جىلعى 2,7-دەن 1999 جىلى 1,8-گە دەيىن تومەندەدى. كەيىننەن ونىڭ بىرتىندەپ ءوسۋى بايقالدى. 2022 جىلى تۋدىڭ جالپى كوەففيتسيەنتى 1 ايەلگە 3,05 بالانى قۇرادى», دەلىنگەن ۇلتتىق ستاتيستيكا بيۋروسىنىڭ تاراتقان مالىمەتىندە.
