بۇل سىيلىق ايتۋلى عالىمعا «ماتەريالتانۋ» مەن «Eurasian Mathematical Journal» جانە «الەمدىك دەڭگەيدەگى زەرتتەۋلەرگە قوسقان ۇلەسى» اتالىمى بويىنشا بەرىلدى. قايرات كۇتەربەكوۆ – ەلىمىزدەگى يادرولىق فيزيكا, اۋىر يوندار فيزيكاسى, رادياتسيالىق ەكولوگيا, بالامالى (يادرولىق جانە سۋتەگى) ەنەرگەتيكا, جوعارى تەحنولوگيا سالاسىنىڭ دامۋىنا زور ۇلەس قوسىپ جۇرگەن عالىم. بۇگىنگە دەيىن ونىڭ 470-تەن اسا عىلىمي ەڭبەگى جاريالانىپ, سونىڭ ىشىندە بەس مونوگرافياسى مەن «اۋىر يونداردىڭ ەكسپەريمەنتتىك فيزيكاسى» اتتى وقۋلىعىن ەرەكشە ايتۋعا بولادى. «Eurasian Mathematical Journal» 2010 جىلدان باستاپ ەۋرازيا ۇلتتىق ۋنيۆەرسيتەتىندە اعىلشىن تىلىندە جارىق كورەدى. عىلىمي باسىلىم Scopus بازاسىندا يندەكستەلىپ, Web of Science بازاسىنا كىرسە, 2022 جىلى Journal Citation Indicator كورسەتكىشى بويىنشا Q2 جۇيەسىنە ەندى. جۋرنال باس رەداكتورىنىڭ ورىنباسارى, ەۋرازيا ۇلتتىق ۋنيۆەرسيتەتىنىڭ مەحانيكا-ماتەماتيكا فاكۋلتەتى «ىرگەلى ماتەماتيكا» كافەدراسىنىڭ پروفەسسورى قوردان وسپانوۆ عالىمعا جوعارى ماراپاتتى تابىستاۋ كەزىندە بۇل الەمنىڭ 40-تان اسا ەلىنىڭ 64 وكىلىنەن تۇراتىن جۋرنال رەداكتسياسىنىڭ كوپ جىلعى قاجىرلى ەڭبەگىنە بەرىلگەن جوعارى باعا ەكەنىن اتاپ ءوتتى. الداعى تاڭدا جۋرنال ۇجىمى حالىقارالىق ماتەماتيكالىق قوعامداستىقتاعى بەلگىلى باسىلىمداردىڭ بىرىنە اينالۋدى كوزدەپ وتىر. ايتا كەتەيىك, اتالعان جوعارى وقۋ ورنىنىڭ «Eurasian Mathematical Journal» باسىلىمى 2017 جىلى Webof Science نۇسقاسى بويىنشا «قازاقستاندىق عىلىمي باسىلىمداردىڭ كوشباسشىسى» اتالىمىندا ديپلوممەن ماراپاتتالعان.
