كەرەكۋلىك اقىن ەلامان قابدىلاشىمنىڭ «ومىرقوس» اتتى جىر جيناعى 2018 جىلى «قاسىم.kz» سەرياسىمەن جارىق كورگەن. كىتاپتا جاس تالانتتىڭ تىرناقالدى تۋىندىلارى توپتاستىرىلىپ, «ەسەنيننەن ءتورت ولەڭ» دەگەن اتاۋمەن ورىستىڭ ايگىلى اقىنىنىڭ ولەڭدەرى اۋدارىلىپ بەرىلگەن ەدى. وندا «زامەتالسيا پوجار گولۋبوي…», «كراي ليۋبيمىي! سەردتسۋ سنياتسيا…» جانە تاعى باسقا جىرلارى بار.
س.تورايعىروۆ اتىنداعى وبلىستىق كىتاپحانانىڭ كرەاتيۆتى شىعارماشىلىق ورتالىعىنىڭ جەتەكشىسى مارال تاجەنوۆانىڭ ايتۋىنشا, جەرگىلىكتى چەحوۆ تەاترىنىڭ اكتەرلەرى ايگىلى اقىننىڭ قازاق تىلىندەگى تۋىندىلارىن ارنايى سۇراستىرىپ كەلگەن. سەبەبى جەرگىلىكتى كىتاپ دۇكەندەرىنەن ەشتەڭە تاپپاپتى. ال كىتاپحانا قورىندا ەلاماننىڭ «ومىرقوس» كىتابى ءبىراز جىلدان بەرى ساقتالىپ تۇر. وسىلايشا, كىتاپ ماسكەۋدەگى ەسەنين مادەني ورتالىعىنا جول تارتقان. ونى جۋىقتا پاۆلوداردا «ليۋبوۆ ي گولۋبي» سپەكتاكلىن قويعان ماسكەۋلىك رەجيسسەر يگور مەركۋلوۆ اپارىپ تاپسىرعان.
ەسەنين ورتالىعىنىڭ ديرەكتورى, رەسەيدىڭ حالىق ءارتىسى سەرگەي نيكونەنكو پاۆلودارلىقتارعا العىسىن ءبىلدىرىپ, ارنايى بەينەجازبا جاريالادى. «ەسەنين پوەماسىنىڭ قازاق تىلىندەگى تاماشا اۋدارماسىن ۇسىنعاندارىڭىز ءۇشىن زور العىسىمدى بىلدىرەمىن. ورتالىقتا اقىن ولەڭدەرىنىڭ ەۋروپالىق, وزبەك, ۆەتنام تىلدەرىندە اۋدارمالارى ساقتاۋلى. ال قازاق تىلىندەگىسى جوق ەدى. بۇل ولقىلىقتىڭ دا ورنى تولدى», دەدى ورتالىق باسشىسى. ايتىپ وتەيىك, س.نيكونەنكو – ەسەنيننىڭ ءرولىن كينودا العاش ويناعان اكتەر.
پاۆلودار
