ءىس-شارانى ۇيىمداستىرۋشىلاردىڭ ايتۋىنشا, توبىل تورىندە وسىمەن بەسىنشى رەت ءوتىپ وتىرعان بايقاۋعا بيىل 74 ادام قاتىسىپتى. جىل وتكەن سايىن بايقاۋدىڭ گەوگرافيالىق اۋقىمى دا كەڭەيە تۇسكەن. ماسەلەن, بيىلعى قاتىسۋشىلاردىڭ ىشىندە قوستاناي, استانا, الماتى, اقتوبە, كوكشەتاۋ, پەتروپاۆل, پاۆلودار, ورال, اتىراۋ قالالارىنان كەلگەن قىلقالام شەبەرلەرى بار.
«بايقاۋ جۇمىستارى ءتورت اتالىم بويىنشا باعالاندى. ولار – كەسكىندەمە, گرافيكا, ءمۇسىن, ساندىك-قولدانبالى ونەر. ءار اتالىم بويىنشا جۇلدەلى ورىندار انىقتالىپ, اقشالاي سىيلىقتار بەرىلدى. قازىلار القاسىنىڭ قۇرامىندا سۋرەتشى-ءمۇسىنشى بايان باتالوۆا, كەسكىندەمەشى سەرگەي لۋگوۆوي, وسى وڭىرگە تانىمال سۋرەتشى ۆاديم بىكوۆ سىندى كاسىبي ماماندار بولدى», دەيدى بەينەلەۋ ونەرى ءبولىمىنىڭ مەڭگەرۋشىسى سايا قالەنوۆا.
قازىلار القاسىنىڭ ۇيعارىمىمەن «كەسكىندەمە» اتالىمى بويىنشا ليساكوۆ قالاسىنان كەلگەن مەرەي تورتقارا, «گرافيكا» اتالىمى بويىنشا كوكشەتاۋلىق جاس سۋرەتشى ءدامىر ماعزۇموۆ, «ساندىك-قولدانبالى ونەر» اتالىمى بويىنشا قوستاناي قالاسىندا تۇراتىن ارايلىم قايىربەك جەڭىمپاز اتاندى. ال بايقاۋدىڭ باس جۇلدەسىن استانالىق رەيحان ايتۋاروۆا جەڭىپ الدى.
قوستاناي وبلىسى
