اسلامبەك مەرعاليەۆ پرەزيدەنتتىڭ دەربەس كاسساتسيالىق ينستانتسيا قۇرۋ ءۇشىن كونسۋلتاتسيالار وتكىزۋ تۋرالى تاپسىرماسىنىڭ ورىندالۋ بارىسى تۋرالى باياندادى. زاڭگەرلەرمەن, عالىمدارمەن, بيزنەس-قوعامداستىق وكىلدەرىمەن جانە پارلامەنت پالاتالارىنىڭ دەپۋتاتتارىمەن بىرلەسە تالقىلاۋ جۇمىستارى جۇرگىزىلىپ, سونىڭ نەگىزىندە ەلوردادا (قىلمىستىق, ازاماتتىق جانە اكىمشىلىك ىستەر بويىنشا) ءۇش كاسساتسيالىق سوت قۇرۋ مودەلىنە وڭ باعا بەرىلدى.
جوعارعى سوت الدىن الا قاراۋ ينستيتۋتىن جويۋدى, «تولىق كاسساتسيانى» قولدانۋدى, قارالۋى 6 ايدان اسپايتىن «اقىلعا قونىمدى مەرزىم» بەلگىلەۋدى, سونداي-اق تاراپتاردىڭ مىندەتتى تۇردە قاتىسۋىمەن سوت پروتسەسىن جۇرگىزۋدى ۇسىنادى. ءوز كەزەگىندە, جوعارى سوت ورگانى قاداعالاۋ ىسىنە جانە سوت پراكتيكاسىنىڭ بىرىڭعاي بولۋىن قامتاماسىز ەتۋگە باسا ءمان بەرەدى.
سونىمەن قاتار قاسىم-جومارت توقاەۆقا اكىمشىلىك ادىلەتتىڭ جۇمىسى مەن حالىقارالىق ىنتىماقتاستىقتى دامىتۋ ماسەلەسى جونىندە ايتىلدى. جوعارعى سوت توراعاسى تسيفرلاندىرۋ جانە سوت قىزمەتىنىڭ اشىقتىعى مەن سوت تورەلىگىنىڭ قولجەتىمدى بولۋىن جاقسارتۋ ماقساتىندا جاساندى ينتەللەكت ەلەمەنتتەرىن ەنگىزۋ جايىندا ايتتى.
مەملەكەت باسشىسى سوت جۇيەسىندە جۇرگىزىلىپ جاتقان رەفورمالاردىڭ ساپاسىنا جانە بارلىق ساتىداعى ىستەردى قاراۋ كەزىندە زاڭدىلىقتى قامتاماسىز ەتۋگە ەرەكشە نازار اۋداردى.
