وتىرىسقا مينيسترلىكتىڭ باسشىلىق قۇرامى, قارۋلى كۇشتەر تۇرلەرىنىڭ باس قولباسشىلارى, وڭىرلىك قولباسشىلىقتار اسكەرلەرىنىڭ, دەسانتتىق-شابۋىلداۋ اسكەرلەرىنىڭ, اسكەر تەكتەرىنىڭ قولباسشىلارى, اسكەري بولىمدەردىڭ, اۋماقتىق قورعانىس بريگادالارىنىڭ كومانديرلەرى, قورعانىس ىستەرى جونىندەگى دەپارتامەنتتەرى مەن اسكەري وقۋ ورىندارىنىڭ باستىقتارى قاتىستى.
مينيستر قورعانىس سالاسىنىڭ بارلىق قىزمەتى جوعارعى باس قولباسشى قويعان مىندەتتەردى ورىنداۋعا باعىتتالعانىن اتاپ ءوتتى. ارميانى قارۋ-جاراقپەن جانە تەحنيكامەن جاراقتاندىرۋ, اسكەري ينفراقۇرىلىمدى سالۋ جانە جوندەۋ, اسكەرلەردى ماتەريالدىق-تەحنيكالىق قۇرالدارمەن قامتاماسىز ەتۋ جۇمىستارى ىسكە اسىرىلدى. بيىل قورعانىس سالاسى پرەزيدەنتتىڭ قاتىسۋىمەن بۇكىلارميالىق كەڭەس پەن «باتىل تويتارىس-2023» وقۋ-جاتتىعۋلارىن وتكىزدى, بۇل رەتتە مەملەكەت باسشىسى اسكەرلەردىڭ دايارلىق دەڭگەيىن جوعارى باعالادى.
پرەزيدەنتتىڭ تاپسىرماسىمەن اسكەري-پاتريوتتىق تاربيە تۇجىرىمداماسى ازىرلەنىپ, ونىڭ جەكە باقىلاۋىمەن اسكەري قىزمەتشىلەردىڭ الەۋمەتتىك مارتەبەسى ماسەلەلەرى شەشىلىپ كەلەدى.
– بيىل ۇشقىشتار قۇرامى مەن جوعارى وقۋ ورىندارىنداعى ازاماتتىق وقىتۋشىلاردىڭ جالاقىسى ورتا ەسەپپەن – 60, سونداي-اق اسكەري دارىگەرلەردىڭ جالاقىسى 40 پايىزعا ءوستى, وسىلايشا ولار ازاماتتىق سالا مەديتسينالىق مەكەمەلەردەگى جالاقى دەڭگەيىنە جەتكىزىلدى. 2024 جىلدان باستاپ اسكەري اتاقتار ءۇشىن تولەنەتىن ۇستەمەاقىنى 30 پايىزعا كوتەرۋ كوزدەلگەن. بارلىق اسكەري قىزمەتشىلەردىڭ جالاقىسىن كوتەرۋ ماسەلەلەرى دە پىسىقتالىپ جاتىر. تۇرعىن ءۇي تولەمدەرىنىڭ دەڭگەيى ۇدايى ءوسىپ كەلەدى, – دەدى قورعانىس ءمينيسترى.
گەنەرال-پولكوۆنيك ر.جاقسىلىقوۆ بۇدان بولەك باسقارۋ ورگاندارى مەن سەنىپ تاپسىرىلعان بولىمشەلەر جۇمىسىنىڭ ساپاسىنا نازار اۋداردى.
– بولىمشەلەردى جەكە قۇراممەن تولىقتىرۋ ماسەلەلەرى شەشۋدى تالاپ ەتەدى. وفيتسەرلەر مەن سەرجانتتاردىڭ كاسىبي دەڭگەيىن ارتتىرۋ بويىنشا جۇمىس ىستەۋ قاجەت. بۇل اسپەكتىلەر اسكەري ۇجىمدارداعى مورالدىق-پسيحولوگيالىق احۋالعا جانە قۇقىقتىق ءتارتىپتىڭ جاي-كۇيىنە تىكەلەي اسەر ەتەدى. قارۋ-جاراق پەن اسكەري تەحنيكانى جارامدى جانە جاۋىنگەرلىك ازىرلىكتە ۇستاۋ, ينفراقۇرىلىمدىق نىسانداردى كۇتىپ ۇستاۋ مەن ولارعا قىزمەت كورسەتۋدى جەتىلدىرۋ ماڭىزدى, – دەپ اتاپ ءوتتى ول.
وتىرىستا قورعانىس ءمينيسترىنىڭ ءبىرىنشى ورىنباسارى – باس شتاب باستىعى, گەنەرال-لەيتەنانت مارات قۇسايىنوۆ ەسەپتىك كەزەڭدەگى اسكەرلەردىڭ جاۋىنگەرلىك جانە جۇمىلدىرۋ دايىندىعىنىڭ جاي-كۇيى تۋرالى باياندادى. ءداستۇرلى جانە گيبريدتى كۇرەس ادىستەرى كەڭىنەن قولدانىلاتىن قازىرگى زامانعى قارۋلى قاقتىعىستاردىڭ ەرەكشەلىكتەرىنە توقتالا كەلىپ, قارۋلى كۇشتەر اسكەري اگرەسسيا جاعدايىندا قارسىلاسقا وڭتايلى قارسى تۇرۋعا ءازىر بولۋى كەرەك ەكەنىن اتاپ ءوتتى.
وتىرىس بارىسىندا قورعانىس ءمينيسترىنىڭ ورىنباسارلارى ءوز باعىتتارى بويىنشا جۇمىس ناتيجەلەرى جونىندە ەسەپ بەردى. ولاردىڭ باياندامالارىندا اسكەري جانە قۇقىقتىق ءتارتىپ, قارۋلى كۇشتەردى تەحنيكالىق, تىلدىق, مەديتسينالىق قامتاماسىز ەتۋ جانە پاتەرلەردى پايدالانۋ ماسەلەلەرى جان-جاقتى قامتىلدى.
القا وتىرىسى قورىتىندىسى بويىنشا قورعانىس ءمينيسترى اسكەرلەردىڭ جاۋىنگەرلىك قابىلەتى مەن جاۋىنگەرلىك ازىرلىگىن ودان ءارى ارتتىرۋ, ولاردى تەحنيكالىق جاراقتاندىرۋ, تىلدىق جانە مورالدىق-پسيحولوگيالىق جاعدايدى قامتاماسىز ەتۋ جونىندە بىرقاتار مىندەت قويدى. اسكەري باسقارۋ جۇيەسىن تسيفرلاندىرۋ ۇدەرىسىن جەدەلدەتۋ ارنايى تاپسىرىلدى.
باسشىلىق قۇرام وقۋ-ادىستەمەلىك جيىننىڭ قورىتىندىسىن شىعاردى. قارۋلى كۇشتەر اراسىنداعى جاۋىنگەرلىك جارىستىڭ جەڭىمپازى اتاعىن اۋە قورعانىسى كۇشتەرى الدى. اسكەر تەكتەرى مەن وڭىرلىك قولباسشىلىقتار اراسىندا دەسانتتىق-شابۋىل اسكەرلەرى ءبىرىنشى بولسا, ەكىنشى ورىندى اشقق اسكەرلەرى, ءۇشىنشى ورىندى اسكەري-اۋە كۇشتەرى يەلەندى.
2023 وقۋ جىلىنىڭ قورىتىندىسى بويىنشا قىزمەتتەگى جەتىستىكتەرى ءۇشىن 18404 اسكەري ءبولىمىنىڭ كومانديرى, پودپولكوۆنيك الماس تولەگەنوۆ ەلىمىزدىڭ تۇڭعىش قورعانىس ءمينيسترى, حالىق قاھارمانى, ارميا گەنەرالى ساعادات نۇرماعامبەتوۆتىڭ توسبەلگىسىنە يە بولىپ, كۋبوكپەن ماراپاتتالدى.
