پالاتا توراعاسى ماۋلەن اشىمباەۆ اتاپ وتكەندەي, جولداۋدا بەلگىلەنگەن ەكونوميكالىق دامۋدىڭ جاڭا پاراديگماسىنا سايكەس شاعىن جانە ورتا بيزنەس ۇلتتىق ەكونوميكانى دامىتۋدىڭ درايۆەرى بولۋعا ءتيىس. سونداي-اق سەنات سپيكەرى بۇل باعىتتا ىسكە اسىرىلىپ جاتقان جۇمىستاردىڭ تيىمدىلىگىن تالداۋ جانە بيزنەستى قولداۋ شارالارىن قايتا رەتتەۋ ماڭىزدى ەكەنىن ايتتى.
ء«بىزدىڭ الدىمىزدا تۇرعان ماقسات – شاعىن جانە ورتا بيزنەستىڭ جالپى ىشكى ونىمدەگى ۇلەسىن ەكونوميكالىق ىنتىماقتاستىق جانە دامۋ ۇيىمى ەلدەرىنىڭ دەڭگەيىنە, ياعني 40-50 پايىزعا دەيىن جەتكىزۋ. بۇل ماسەلەنى شەشۋ ءۇشىن شاعىن جانە ورتا بيزنەستىڭ ونىمدىلىگىن ايتارلىقتاي ارتتىرۋ قاجەت. ازىرگە وڭدەۋ سەكتورىنداعى كاسىپورىندار سانى ءتيىستى دەڭگەيدە ءوسىپ وتىرعان جوق. ءتيىمدى جۇمىس ىستەپ تۇرعان كاسىپورىنداردى ىرىلەنۋگە جانە اۋقىمىن كەڭەيتۋگە ىنتالاندىرۋ كەرەك», دەدى م.اشىمباەۆ.
سونىمەن قاتار ءىس-شارادا شاعىن جانە ورتا بيزنەستىڭ وڭىرلىك ديسپروپورتسيا پروبلەماسىنا جانە كاسىپكەرلىك قىزمەتتىڭ ءىرى ايماقتار – استانا, الماتى قالالارى مەن تۇركىستان جانە الماتى وبلىستارىندا كوپ شوعىرلانۋىنا باسا ءمان بەرىلدى. وسىعان بايلانىستى م.اشىمباەۆ جەرگىلىكتى بيزنەستى ىنتالاندىرۋ ءۇشىن وڭىرلەردى دامىتۋ ەرەكشەلىگىن ەسكەرۋدىڭ جانە وڭىرلىك باعدارلامالاردى جەتىلدىرۋدىڭ ماڭىزدىلىعىن اتاپ ءوتتى.
سەنات توراعاسى كاسىپكەرلەرگە سالىق سالۋ ءتاسىلىن جانە بيزنەستىڭ بولىنۋىنە سەبەپ بولاتىن فيسكالدىق ساياساتتى قايتا قاراۋدى دا ۇسىندى. «اتامەكەن» ۇلتتىق كاسىپكەرلەر پالاتاسى تورالقاسىنىڭ توراعاسى رايىمبەك باتالوۆ سالىقتىق جۇكتەمە بويىنشا شاعىن بيزنەس فورماتىنان ورتا بيزنەس فورماتىنا كوشۋدى قولداپ, بىرقاتار ۇسىنىس جاسادى. اتاپ ايتقاندا, ول مەملەكەتتىك كىرىستەر ورگاندارى تسيفرلىق شەشىمدەر مەن سەرۆيستىك ءتاسىلدى قولدانۋدى ەسكەرە وتىرىپ, سالىقتىق اكىمشىلەندىرۋدى رەفورمالاۋ ماسەلەسىنە نازار اۋداردى. سونداي-اق ر.باتالوۆ بانكتەر تاراپىنان بيزنەستى نەسيەلەۋ راسىمىنە وزگەرىستەر ەنگىزۋدى ۇسىندى.
ۇكىمەت ساعاتىنىڭ قورىتىندىسى بويىنشا تالقىلاۋدا ايتىلعان بارلىق ماسەلە نازارعا الىنىپ, ءتيىستى ۇسىنىمدار ازىرلەندى. ولاردىڭ قاتارىندا ارنايى سالىق رەجىمدەرىنىڭ سانىن قىسقارتۋ, ءوزىن-ءوزى جۇمىسپەن قامتىعاندار مەن جەكە كاسىپكەرلەر ءۇشىن زەينەتاقى اۋدارىمدارى مەن الەۋمەتتىك تولەمدەردى قوسا وتىرىپ, اينالىمنىڭ 3 پايىزدىق مولشەرىندە بىرىڭعاي تولەم بەلگىلەۋ سياقتى ماسەلەلەر بار. ودان بولەك, دەپۋتاتتار كاسىپكەرلەرگە نەسيە بەرۋ شارتتارىن جەڭىلدەتۋ شارالارىن دا ۇسىندى. ناقتى ايتقاندا, كەپىلسىز كرەديتتەۋدى نە قالا شەگىندەگى كەپىل مۇلكىنىڭ تالاپتارىن الىپ تاستاۋدى جانە اۋىلدىق جەرلەردەگى كاسىپكەرلەر ءۇشىن ونىڭ باعالاۋ قۇنىن ايقىنداۋ كەزىندە تومەندەتۋ كوەففيتسيەنتىن قولدانۋدى الىپ تاستاۋدى قاراستىرۋ ۇسىنىلدى.
ءىس-شارا بارىسىندا ۇلتتىق ەكونوميكا ءمينيسترى الىبەك قۋانتىروۆ, وڭىرلەردىڭ, ىسكەر ايەلدەر قاۋىمداستىعى كەڭەسىنىڭ باسشىلىعى مەن وكىلدەرى جانە تاعى باسقالار بايانداما جاسادى.
