فوتو: senate_kz
م.اشىمباەۆ تسيفرلىق تەحنولوگيا داۋىرىندە تىكەلەي باقىلاۋ ورناتۋ ارقىلى مەملەكەتتىك ورگاندار مەن بيزنەس اراسىنداعى قارىم-قاتىناستىڭ جاڭا پاراديگماسىن قالىپتاستىرۋعا ۇمتىلۋدىڭ ماڭىزى زور ەكەنىن ايتتى. سونىمەن قاتار مەملەكەتتىك باعدارلامالار, قابىلدانىپ جاتقان شەشىمدەر مەن قۇجاتتاردىڭ ساپاسىن ارتتىرۋ ءۇشىن پىسىقتاۋدى تالاپ ەتەتىنىن دە العا تارتتى.
«قازىر ءبىز ءبىر زاڭدى جىلىنا كەم دەگەندە بىرنەشە رەت وزگەرتەمىز. وسىنداي وزگەرىسكە ۇشىراماعان زاڭ بار ما؟ بۇل نەنى بىلدىرەدى؟ بۇل مەملەكەتتىك شەشىمدەردىڭ ساپاسى مەن ولاردىڭ قالاي دايىندالعانىن كورسەتەدى. مەملەكەتتىك باعدارلامالارعا دا قاتىستى ماسەلە وسىنداي. بىلاي قاراعاندا, كوپ قارجى بولەتىن سياقتىمىز. بىراق ناقتى ناتيجەنى كورمەيمىز. مۇمكىن, بۇل رەتتە اسىقپاۋ كەرەك شىعار. ونىڭ ورنىنا قابىلدايتىن شەشىمدى جان-جاقتى پىسىقتاپ, بارلىق مۇددەلى تاراپپەن تىڭعىلىقتى تالقىلاعان دۇرىس بولار. وسىلايشا, بارلىق پىكىردى ەسكەرىپ بارىپ, قايتا وزگەرتپەيتىندەي ەتىپ قابىلداۋ قاجەت. سوندا عانا تۇراقتىلىق بولادى», دەگەن سەنات توراعاسى ارىپتەستەرىن جاڭا سالىق كودەكسىن ازىرلەۋدە ابجىلدىك قاجەت ەكەنىن ەسكەرتتى.
«بۇل كودەكس بيزنەسپەن اينالىسۋعا, ونى كەڭەيتۋگە, شاعىننان ورتاعا, ورتادان ءىرى بيزنەسكە كوشۋگە ىنتالاندىراتىن قۇجات بولۋى كەرەك. بىزگە بيۋروكراتيا قاجەت ەمەس. مۇندا ەسەپ بەرۋ دەگەن مينيمۋم دەڭگەيدە بولۋعا ءتيىس. ونسىز دا تسيفرلىق داۋىردە ءبارى ايقىن كورىنىپ تۇرادى», دەدى م.اشىمباەۆ.
