قولجازبا اراب تىلىندە جازىلعان. XIII عاسىردا جازىلعان بۇل تۋىندى كۇنى بۇگىنگە دەيىن تولىق زەرتتەلمەگەن.
ء«ال-ءفارابيدىڭ «مۋزىكا سالاسىنا كىرىسپە» دەپ اتالاتىن ەڭبەگى حيجرا بويىنشا 655 جىلى 12 دجامالي اۋۆال, گريگوريان كۇنتىزبەسى بويىنشا 1257 جىلدىڭ 3 ماۋسىمى, دۇيسەنبىگە سايكەس كەلەدى. قولجازبا 243 بەتتەن تۇرادى. قولجازبا تۇپنۇسقامەن سالىستىرىلا وتىرىپ كوشىرىلدى. ەڭبەكتە مۋزىكالىق عىلىمنىڭ سۇراقتارى تەرەڭ زەرتتەلگەن, مۋزىكالىق كومپوزيتسيا تەحنيكاسى, شىعىس جانە ورتاازيالىق اسپاپتار ەگجەي-تەگجەيلى سيپاتتالعان. كوشىرمە ءۇش اپتا كولەمىندە باسىپ شىعارىلدى»,-دەيدى رەستاۆراتور مامان جانسەرىك بەيسەنقۇلوۆ.
«مۋزىكا سالاسىنا كىرىسپە» قولجازباسى ءۇش بولىمنەن تۇرادى.ەڭبەكتە مۋزىكالىق ونەردىڭ پرينتسيپتەرى, نەگىزگى تەرميندەر جانە مۋزىكا ءپانى قامتىلعان. مامانداردىڭ ايتۋىنشا, كىتاپتا مۋزىكالىق اسپاپتار مەن ءار ءتۇرلى اۋەندەردىڭ شىعارمالارىنا, كاتەگورياسىنا جانە باسقا دا اسپەكتىلەرىنە كەڭىنەن توقتالعان.
عۇلاما ويشىل ءابۋ ناسىر ءال-ءفارابيدىڭ ەڭبەگى تۇركياعا جاسالعان ساپاردا سۇلەيمانيا كىتاپحاناسىنان تابىلدى. قولجازبالار جانە سيرەك كىتاپتار ۇلتتىق ورتالىعىنىڭ ماماندارى 2022 جىلى 9 ەلگە 11 عىلىمي-ىزدەستىرۋ ءىسساپارىن جاسادى.
«ارحيۆ-2025» جوباسى اياسىندا قر مادەنيەت جانە اقپارات مينيسترلىگى بىرقاتار جوبالاردى جۇزەگە اسىردى. وتاندىق جانە شەتەلدىك ارحيۆتەر مەن مۋزەيلەردەن كىتاپحانالار مەن عىلىمي ورتالىقتاردان قازاقستان تاريحى بويىنشا قۇجاتتار مەن ماتەريالداردى ىزدەۋ-انىقتاۋ, كوشىرمەسىن الۋ بويىنشا عىلىمي-زەرتتەۋ جۇمىستارى ۇيىمداستىرىلىپ, ولاردى عىلىمي اينالىمعا ەنگىزۋ جوسپارلانعان.
"قر ۇلتتىق ءارحيۆى مەن ورتالىق مەملەكەتتىك ءارحيۆى, ورتالىق مەملەكەتتىك كينو جانە فوتوقۇجاتتار مەن دىبىستىق جازبالار ءارحيۆى, قولجازبالار جانە سيرەك كىتاپتار ۇلتتىق ورتالىعى گەرمانيا, رەسەي, تۇركيا, ۆەنگريا, تاتارستان, قىرعىزستان, چەحيا, فرانتسيا, يران يسلام رەسپۋبليكاسى جانە ەگيپەت سىندى تاعى دا باسقا ەلدەرگە بارىپ, تاريحي قۇجاتتار كوشىرمەسىن ەلگە جەتكىزدى. قازىرگى ۋاقىتتا تاريحىمىزدىڭ اقتاڭداق بەتتەرىن تۇگەندەپ, تىڭ دەرەكتەرمەن تولىقتىرۋ ماقساتىندا ەلگە اكەلىنگەن قولجازبالار مەن ارحيۆتىك قۇجاتتار مامانداردىڭ قاتىسۋىمەن زەرتتەلۋدە",-دەدى ارحيۆ, قۇجاتتاما جانە كىتاپ ءىسى كوميتەتىنىڭ توراعاسى قۋات بوراش.
