ساۋدا ورنىنداعى بەينەباقىلاۋ قۇرىلعىسى اكىمنىڭ: «مەنىڭ ارتىمدا تۇرعان ادامدى كورىپ تۇرسىڭ با؟ توبىل اكىمىنىڭ ورىنباسارى. ماعان ونىڭ تەلەفون ءنومىرىن بەرشى (دۇكەن يەسىنىڭ بايلانىس ءنومىرىن سۇراسا كەرەك). التى-اق سەكۋندتا قۇرتامىن ونى. ءبارىن قۇرتامىن! مەنىڭ مۇمكىندىكتەرىمدى بىلمەيسىڭ سەن! مەنىڭ كىم ەكەنىمدى بىلەسىڭ بە؟», دەپ اكىرەڭدەپ تۇرعان ءساتىن جازىپ العان. كامەرادا ودان كەيىن دۇكەنشىنىڭ اكىمگە ىشىمدىك ساتقانى, اكىمنىڭ دۇكەنشىنىڭ الدىنا شيىرىپ اقشا لاقتىرعانى, قايتقان تيىن-تەبەنىن قالتاسىنا سالىپ جاتىپ, تۇسىنىكسىز تاعى بىردەڭە ايتقانى, ساتۋشىنىڭ «مەنىمەن بۇلاي دورەكى سويلەسپەڭىز!» دەگەن سوزدەرى ساقتالعان.
اتالعان دەپارتامەنتكە قاراستى مەملەكەتتىك قىزمەت سالاسىنداعى باقىلاۋ باسقارماسىنىڭ باسشىسى ازامات بايتۇرسىنوۆ قىزمەتتىك تەكسەرىس بارىسىندا م.تايماسوۆتىڭ ءوز ايىبىن مويىنداپ, شىن وكىنىش بىلدىرگەنىن, ال دۇكەن ديرەكتورىنىڭ كەلەڭسىز وقيعاعا قاتىستى قانداي دا ءبىر تۇسىنىك بەرۋدەن باس تارتقانىن مالىمدەدى.
– زاڭ تىيىم سالعان ۋاقىتقا قاراماستان, م.تايماسوۆ ىشىمدىك ساتىپ الۋعا تىرىسقان. بۇل كەلەڭسىز وقيعا الەۋمەتتىك جەلى ارقىلى بۇكىل ەلگە تاراپ كەتتى. ساتۋشى اراق بەرۋدەن باس تارتقان. ال اۋزىنان اق يت كىرىپ, كوك يت شىققان اكىم قوقان-لوقى كورسەتىپ, دۇكەن يەسىنە قوڭىراۋ شالعان. وسىدان كەيىن الەۋمەتتىك جەلىدە مەملەكەتتىك اپپاراتتىڭ بەدەلىنە نۇقسان كەلتىرەتىن پىكىرلەر كوبەيدى, – دەدى ا.بايتۇرسىنوۆ.
ماقاش تايماسوۆتىڭ مەملەكەتتىك قىزمەت سالاسىندا جۇرگەنىنە 5 جىل 6 اي بولىپتى. 2022 جىلدىڭ 20 اقپانىندا نوۆويلين اۋىلدىق وكرۋگىنىڭ اكىمى بولىپ سايلانعان. بۇرىن-سوڭدى تارتىپتىك جازاعا تارتىلماعان, وزىنە سەنىپ تاپسىرىلعان مىندەتىن دە جاقسى اتقارىپ كەلگەن كورىنەدى.
«دۇكەنگە 18 قازاندا باردىم. ىشىمدىك ساتىپ العىم كەلگەن. بىراق ساعاتقا قاراماپپىن. مەنى بۇرىنان جاقتىرماي جۇرگەن ساتۋشىمەن جانجالداسىپ قالدىم. ول مەنىڭ وتىنىشىمە دورەكى جاۋاپ قاتتى, سول ساتتە ءوز-وزىمە يە بولا الماي قالىپ, بالاعات ءسوز ايتىپ قويدىم. دۇكەنگە كىرمەي تۇرىپ, كولىكتىڭ ىشىندە ايەلىممەن ۇرسىسىپ قالىپ, كوڭىل كۇيىم بولماي تۇرعان. بۇل ارەكەتىمە شىن وكىنىپ, كەشىرىم سۇرايمىن. بۇرىن-سوڭدى مۇنداي جاعىمسىز قىلىق جاساپ كورگەن ەمەسپىن. سوندىقتان كەڭەس مۇشەلەرى, ءادىل شەشىم شىعارارسىزدار دەگەن ۇمىتتەمىن», دەدى م.تايماسوۆ.
اۋىل اكىمى بۇعان دەيىن سوت بەينەجازبانى قاراپ شىققان سوڭ, ساتۋشىنىڭ دورەكى جاۋابىن ەسكەرىپ, وزىنە سالىنعان اكىمشىلىك ايىپپۇل مولشەرىن ازايتقانىن ايتتى.
كەڭەس مۇشەلەرى اكىمنىڭ دۇكەنشى ايەل ءوزىن قالاي جابىرلەگەنىن, قاي ءسوزى جانىنا ءتيىپ كەتكەنىن ناقتىلاپ ايتىپ بەرۋىن سۇراعان ەدى, م.تايماسوۆ: «مۇمكىن ونىڭ ءۇزىلدى-كەسىلدى «جوق» دەگەنى ءدال سول كەزدە ماعان جابىرلەپ تۇرعان سياقتى بولىپ كورىنگەن شىعار», دەپ جاۋاپ بەردى.
– مەنى اكىمنىڭ ءوز ايىبىن ساتۋشىنىڭ دورەكى ءسوزى ارقىلى اقتاپ العىسى كەلىپ تۇرعانى تاڭعالدىرادى. شىنايى وكىنىپ تۇرعان ادامدى كورىپ تۇرعان جوقپىن. تەك اقتالۋ ءۇشىن بار ايىپتى باسقاعا جابۋعا تىرىسىپ جاتىر. بەينەجازبانى بىرنەشە رەت باستان-اياق قاراپ شىقتىم. دۇكەنشىنىڭ دورەكى سويلەگەنىن بايقامادىم. قايتا ول ءوز-ءوزىن سابىرعا جەڭدىرىپ, بايىپتى ۇستاپ تۇر. ال تايماسوۆتىڭ كوڭىلدى ەكەنى, سەرىگىمەن بىرگە كۇلگەنى انىق بايقالادى. ايەلىممەن ۇرسىسىپ قالىپ ەدىم دەگەن جاي ويدان شىعارىلعان سىلتاۋ دەپ ەسەپتەيمىن. سوندىقتان اكىمگە ەڭ قاتال شارا قولدانۋ كەرەك, – دەدى كەڭەس مۇشەسى اسقار جاباەۆ.
تارتىپتىك وتىرىسقا قاتىسقانداردىڭ دەنى وسىعان ۇقساس پىكىر ايتتى. ناتيجەسىندە, ادەپ كەڭەسىنىڭ مۇشەلەرى ءبىراۋىزدان اۋىلدىق وكرۋگ اكىمىن لاۋازىمىنان بوساتۋ تۋرالى شەشىم شىعاردى.
قوستاناي وبلىسى
