2019 جىلى «الماتى-تالدىقورعان» ماگيسترالدى گاز جەلىسىنەن كوگىلدىر وتىن تارتۋ ارقىلى «باقاناس» اۆتوماتتاندىرىلعان گاز تاراتۋ ستانساسى سالىنىپ, اۋدانعا جوعارى قىسىمدى قۇبىرلار جۇرگىزىلە باستاعان. ستانسا قۇرىلىسى اياقتالعان ۋاقىتتا گاز تاراتۋ جەلىلەرىنىڭ بولماۋىنا بايلانىستى كوگىلدىر وتىننىڭ بەرىلۋى كەيىنگە شەگەرىلگەن.
بۇگىندە حالىقتىڭ كوپتەن كۇتكەن ارمانى ورىندالىپ, 16 320 تۇرعىنى بار 6 ەلدى مەكەنگە – باقاناس, ميالى, بوياۋلى, اقدالا, باقباقتى, بىرلىك اۋىلدارىنا گاز بەرىلە باستادى. باقاناستىڭ وزىندە 52 شاقىرىم گاز قۇبىرى جۇرگىزىلدى. اۋىلدا 1 300-دەن اسا ءۇي بولسا, قازىردىڭ وزىندە ونىڭ 510-ى تابيعي گازعا قوسىلىپ ۇلگەردى. وسىعان بايلانىستى اۋداندا سالتاناتتى ءىس-شارا ءوتتى.
جيىنعا ارنايى قاتىسقان ءوڭىر باسشىسىنىڭ ورىنباسارى نۇرجان قۇدايبەرگەنوۆ پەن وبلىستىق پارتيا فيليالى توراعاسىنىڭ ورىنباسارى اسلان كوبەنتاەۆ تۇرعىنداردى ايتۋلى مەرەكەمەن قۇتتىقتاپ, بالقاشتىق تۇرعىندار ءۇشىن قۋانىشتى كۇن ەكەنىن, كوپتەن كۇتكەن گازبەن قامتۋ ماسەلەسى شەشىمىن تاپقانىن ايرىقشا اتاپ ايتتى.
«وبلىستا 384 ەلدى مەكەننىڭ 294-ءى گازداندىرىلادى. قازىرگى ۋاقىتتا 149 ەلدى مەكەن گازداندىرىلىپ, ناتيجەسىندە, 1 ميلليوننان اسا ادام گازعا قول جەتكىزدى. گاز تۇرعىن ۇيلەردى, الەۋمەتتىك نىسانداردى جىلىتۋعا ىڭعايلى, ايماقتا شاعىن جانە ورتا بيزنەستىڭ دامۋىنا وڭ ىقپالىن تيگىزەتىنى انىق», دەدى ن.قۇدايبەرگەنوۆ.
سونداي-اق «Amanat» پارتياسىنىڭ جول كارتاسىنا ساي 2027 جىلعا دەيىن ءوڭىردىڭ گازداندىرۋ دەڭگەيى 70 پايىزعا جەتپەك.
«اۋداندا جۇزەگە اسىرىلۋعا ءتيىس ماسەلەلەردى تۇرعىندارمەن بىرگە تالقىلاپ, ۇسىنىس-تىلەكتەرىن جيناعانبىز. سولاردىڭ ءبىرى – ەلدى مەكەندەردى گازبەن قامتۋ ماسەلەسى. بيىل بالقاش اۋدانىندا قاراشا ايىنا دەيىن گاز بەرىلەدى دەپ ۋادە بەرىلگەن ەدى. بۇگىن سول ءسات تۋىپ, قۋانىشتارىڭىزعا ورتاقتاسىپ وتىرمىز. تابيعي گازبەن قامتاماسىز ەتۋ مۇنىمەن توقتامايدى. الداعى ۋاقىتتا باسقا دا اۋىلدارعا گاز قۇبىرى تارتىلىپ, وبلىستىڭ گازداندىرۋ كورسەتكىشى 70 پايىزعا وسەدى», دەدى ا.كوبەنتاەۆ.
ايتا كەتۋ كەرەك, بيىل 18 اۋىل بويىنشا قۇرىلىس-مونتاج جۇمىستارى جۇرگىزىلىپ جاتىر. بۇعان بيۋدجەتتەن 3,5 ملرد تەڭگە بولىنگەن.
الماتى وبلىسى
