جومارت جاننىڭ بۇل جولعى شاراپاتىن اقسۋ-ايۋلى اۋىلىنداعى 21 وتباسى كوردى. جاسىراتىنى جوق, قازىر كومىر باعاسى شارىقتاپ تۇر. اسىرەسە اۋىلداعى اعايىننىڭ كوڭىلى وسىعان الاڭ بولىپ وتىر. اۋىلدىڭ از قامتىلعان وتباسىلارىنا كومىر ۇلەستىرگەن قۋانىش مىرزانىڭ بۇل يگى ءىسى – ۇلكەن ازاماتتىق.
بىلۋىمىزشە, فەرمەر ۇنەمى قايىرىمدى ىسكە قول سوزادى ەكەن. بۇعان قوسا مال ۇستاعاندارعا ءشوپ پەن جەم باعاسىن الدەقايدا تومەن باعامەن الىپ بەرۋگە ىقپالىن تيگىزەدى. از قامتىلعان وتباسىلارعا ەت تاراتادى. سونداي-اق ءبىر كەزدەرى حالىق بولىپ باستاعان بەس بولمەلى ءۇيدىڭ قۇرىلىسىن قازىر ءوز قاراجاتىنا جۇرگىزىپ جاتىر. جاڭا ءۇيدى باسپاناعا مۇقتاج وتباسىعا بەرمەكشى. جومارت جان جاساعان جاقسىلىعىن جاريا ەتكىسى كەلمەيدى.
– اۋىلداستارىما كومەكتەسكەن سايىن كوڭىلىم اسپاندايدى. قولىڭىزدا بار بولسا, يگىلىكتى ىسكە قول سوزعان ءجون دەپ ويلايمىن. ءار جاساعان جاقسىلىعىڭدى جاراتقان ەسەلەيدى, – دەيدى فەرمەر.
بارىمەن بولىسەتىن فەرمەرگە اۋىلداستارىنىڭ ايتار العىسى مول.
قاراعاندى وبلىسى,
شەت اۋدانى
