فوتو: Instagram/@aliokapov
ەسكە سالا كەتسەك, ءانشى بۇل ماراپاتتان باس تارتقان ەدى.
ءماجىلىس الاڭىندا جۋرناليستەر مينيستر ايدا بالاەۆادان ءانشىنىڭ توڭىرەگىندە بولعان جاعداي قالاي شەشىلگەنىن سۇرادى.
«سوڭعى ۋاقىتتا الەۋمەتتىك جەلىلەردە قوعامنىڭ بارلىق جەتىستىكتەرىن جوققا شىعارعىسى كەلەتىندەر كوبەيىپ كەتتى. بۇل جاقسىلىققا اپارمايدى. شىندىعىندا, بارلىعى ءوز ءىسىنىڭ مامانى بولدى. ءار ساراپشىنىڭ ءوز سالاسى بويىنشا پىكىر ءبىلدىرۋى وتە ماڭىزدى جانە بۇل بىلىكتى كاسىبي پىكىر بولۋى ءتيىس. ال «نەگە بەرىلدى؟ نە ءۇشىن بەرىلدى؟» دەگەن سۇراق قويۋ دۇرىس ەمەس», دەدى مينيستر جۋرناليستەردىڭ سۇراقتارىنا جاۋاپ بەرە وتىرىپ.
ءمينيستردىڭ ايتۋىنشا, ءانشى حالىقتىڭ تاراپىنان جاسالعان قىسىمدى ەموتسيونالدى تۇردە قابىلداعان.
«بۇل شەشىمدى ءبىر مينيسترلىك قابىلدامايدى. بولەك كوميسسيا قاراپ, ماراپاتقا يە ادامدى تاڭدايدى, ال ەل ازاماتتارى مەملەكەتتىڭ دامۋىنا ۇلەس قوسۋى وتە ماڭىزدى. مەملەكەت بارلىق ەڭبەكتى باعالايدى. ءبىز ءوز ازاماتتارىمىزدى ءاردايىم جىگەرلەندىرىپ, ىنتالاندىرىپ وتىرعانىمىز وتە ماڭىزدى. ءبىر قىزىعى, نەگە ءبىزدىڭ «ساراپشىلاردا» مۇعالىمدەرگە, دارىگەرلەرگە, زاۋىت جۇمىسشىلارىنا سونشا كوپ ماراپات بەرىلدى دەگەن سۇراق تۋىندامايدى. ولاردىڭ جەتىستىگى تۋرالى نەگە ايتپاسقا. بالكىم, ەلىمىزدىڭ دامۋىنا وراسان ۇلەس قوسىپ جۇرگەن باتىرلاردى كورسەتۋ ماڭىزدى بولار ەدى, ءيا؟ ال مەملەكەت ءار ادامنىڭ ەڭبەگىن باعالايدى», دەپ ءتۇسىندىردى مينيستر.
سونداي-اق جۋرناليستەر ء«انشى «قۇرمەت» وردەنىن جانە باسقا دا ماراپاتتارىن مەملەكەتكە قايتاردى ما؟» دەگەن سۇراق قويدى.
«جوق, ونى قايتارۋعا بولمايدى. بۇل دۇرىس ەمەس. ءالي وقاپوۆ الەۋمەتتىك جەلىلەردەگى حەيتكە ەموتسيونالدى تۇردە جاۋاپ بەردى. قازىرگى «ساراپشىلار» كەز كەلگەن ماسەلەنى سىني پىكىرسىز قالدىرمايدى. بۇل دا دۇرىس ەمەس. ءبىز ءالي وقاپوۆپەن اڭگىمەلەستىك, ول شىعارماشىلىق ادام رەتىندە بۇل پىكىرلەردى وتە ەموتسيونالدى تۇردە قابىلدادى, قازىر سابىرعا كەلدى», دەپ جاۋاپ بەردى مينيستر.
ەستەرىڭىزگە سالا كەتەيىك, قازان ايىندا ءانشى ءالي وقاپوۆ «قۇرمەت» وردەنىمەن ماراپاتتالعان ەدى. الەۋمەتتىك جەلىلەردە بۇل جاڭالىق قولدانۋشىلار اراسىندا داۋ تۋدىردى, كەيبىرى وقاپوۆتى «بۇعان لايىق ەمەس» جانە «ەل ءۇشىن ەشتەڭە ىستەمەدى» دەپ ايىپتاسا, ەندى ءبىرى ءانشىنىڭ جاعىندا بولدى.
سىني پىكىرلەردەن كەيىن ءالي وقاپوۆ بارلىق ماراپاتتارىنان, ونىمەن قوسا «قۇرمەت» وردەنىنەن باس تارتاتىنى تۋرالى بەينەجازبا تۇسىرگەن ەدى.
