جالپاق جۇرت سۇيسىنە تاماشالاپ, قىزىعىنا قاناتىن قۇسبەگىلەر سايىسى ءبىزدىڭ وڭىردە وسىمەن جيىرماسىنشى رەت ۇيىمداستىرىلىپ وتىر. تابيعاتى تامىلجىعان سۇلۋ ولكەدە ىلكى زاماننان بەرى جالعاسىپ كەلە جاتقان ۇلتىمىزدىڭ اقسۇيەك ونەرى قايتا جاڭعىرىپ, كەڭىنەن قانات جايۋدا. الدىمەن داڭقتى بۇركىتشى ءماسىپ باتىرحان ۇلى تۋرالى ءبىر اۋىز ءسوز ايتا كەتەلىك. بۇركىتشى 1940 جىلى ماسكەۋ قالاسىندا «كسرو اڭشىلىق ءىسىنىڭ ۇزدىگى» توسبەلگىسىمەن ماراپاتتالعان. رەسمي ماراپاتى وسى بولعانىمەن, ەڭ ىستىق ىقىلاس حالىقتىڭ كوكىرەگىندە قالدى. وتىزىنشى جىلدارداعى اقسۇيەك اشتىقتا قۇسبەگى قىران قۇسىنىڭ ارقاسىندا تۇتاس ءبىر اۋىلدى امان الىپ قالعان. جالعىز قىران قۇس قانا ەمەس, جۇيرىك تازى دا باپتاعان. قوتان قوريتىن تەكتى توبەت تە بوساعاسىنان ارىلماعان ەكەن. ەكىنشى دۇنيەجۇزىلىك سوعىس كەزىندە اڭ تەرىسىنەن تىگىلگەن كيىم-كەشەك, اڭ ەتىن قان مايداندا سوعىسىپ جاتقان جاۋىنگەرلەرگە ءۇستىن-ءۇستىن جىبەرىپ, شاراپاتىن تيگىزگەن.
وسى جولى كوكشەنىڭ كوگىلدىر اسپانىن ايرىقشا دۇبىرگە بولەگەن قۇسبەگىلەر سايىسىنا ەلىمىزدىڭ ون وبلىسىنان 63 ۇمىتكەر قاتىستى. سونداي-اق, قىرعىزستان, موڭعوليا, قىتايدان دا كەلگەندەر بار. شەت ەلدەن كەلگەن قۇسبەگىلەر اراسىندا موڭعوليادا تۇراتىن قارىنداسىمىز, اتاقتى قۇسبەگى ايشولپان نۇرعايىپقىزى دا بولدى. وسىدان بىرەر جىل بۇرىن ايشولپاننىڭ امەريكالىق رەجيسسەر وتتو بەللانىڭ كوشپەندىلەر ومىرىنەن تۇسىرگەن «بۇركىتشى» فيلمىندە باستى ءرول ويناعانى دا بەلگىلى.
قۇسبەگىلەر سايىسى ءۇش كەزەڭنەن تۇردى. 11 يتەلگى, 8 قارشىعا, 44 بۇركىت بابى مەن باعىن سىنادى. زاۋ بيىككە كوتەرىلىپ, توپشىسىمەن كوگىلدىر اۋانى تىلە, قۇلديلاپ كەلىپ, جەمىنە جاي وعىنداي جارق ەتىپ ۇمتىلاتىن قىران قۇستىڭ ەرلىگى مەن ورلىگىنە تومەندە كوز سالىپ تۇرىپ قانىڭ قىزادى ەكەن. تۇلا بويى تەگەۋرىندى كۇش, تەكتىلىكتەن تۇراتىن وسىناۋ دارحان دالانىڭ دارابوز قۇستارىن ايتقانىنا كوندىرىپ, ايداعانىنا جۇرگىزگەن اتا-بابامىز دا وسال ەمەس-اۋ شاماسى. سايىستىڭ ەكىنشى كۇنى ىرىكتەلگەن 12 قۇسبەگى قىراندارىن ءتۇز اڭىنا سالدى. ساراپشىلاردىڭ ۇيعارىمى بويىنشا «بۇركىت», «يتەلگى», «قارشىعا» اتالىمدارىندا ءبىرىنشى ورىنعا استانالىق سەرىكبەك كۇنتۋعان, الماتىلىق سەيىتجان الماس, قاراعاندىلىق تەمىرالى تولەگەن يە بولدى. جەڭىمپازدارعا بۇركىتشى ءماسىپ باتىرحان ۇلىنىڭ اتىنداعى ەستەلىك سىيلىقتار تابىس ەتىلدى.
اقمولا وبلىسى
