ساكەن تەاترىنىڭ جانىنان ءۇش اي بۇرىن عانا قۇرىلعان قۋىرشاق ترۋپپاسى الەم ەلدەرىنەن ءوتىنىم جىبەرگەن 200-گە تارتا ونەر ۇجىمىنىڭ اراسىنان ىرىكتەلگەن 30 تەاتردىڭ قاتارىندا بولعان.
ارتىستەر ارقايسىسى ساحنادا ءبىر ەمەس, ءۇش قۋىرشاققا جان ءبىتىرىپ, ءۇش ءرولدى سومداپ شىقتى. ال سپەكتاكلدەگى 11 قۋىرشاقتى رەجيسسەر ايدىن سالباننىڭ جەتەكشىلىگىمەن تەاتر ۇجىمى جاساعان.
بۇل قۋىرشاق ترۋپپاسى وماننان ولجالى ورالماس بۇرىن الماتىدا وتكەن «Almaty Puppet Festival» حالىقارالىق فەستيۆالىندە دە «قارلىعاشتىڭ قۇيرىعى نەگە ايىر؟» ەرتەگىسىن ساحنالاپ, «ۇزدىك ستسەنوگرافيا ءۇشىن» جۇلدەسىن ەنشىلەگەن ەدى.
قازان ايىنىڭ باسىندا جەتىسۋ تورىندە اتى اڭىزعا اينالعان اكتريسا بيكەن ريموۆانىڭ 100 جىلدىعىنا ارنالعان BIKEN-l حالىقارالىق تەاتر فەستيۆالىندە و.بوكەيدىڭ «اتاۋ كەرە» دراماسىن قويىپ, «ۇزدىك رەجيسسۋرا» جۇلدەسىن قانجىعالاعانىن دا ايتىپ ءوتۋىمىز كەرەك. مۇنىڭ دا قويۋشى-رەجيسسەرى – ايدىن سالبان.
تالدىقورعاننان كەيىن قىزىلجاردا بەلگىلى مەملەكەت جانە قوعام قايراتكەرى ت.جۇرگەنوۆتىڭ 125 جىلدىعىنا ارنالعان قازاقستان تەاترلارىنىڭ فەستيۆالىندە دە «ۇزدىك ستسەنوگرافيا» اتالىمىنا لايىق دەپ تانىلدى.
استاناعا گاسترولمەن بارىپ, ەلوردالىق كورەرمەنگە «ۇلتقا قىزمەت», «تەكەبۇرقاق», «اينالايىن», «اتاۋ كەرە» سپەكتاكلدەرىن كورسەتتى.
قاراعاندىنىڭ ونەر ۇجىمى رەسپۋبليكالىق دەڭگەيدە عانا ەمەس, حالىقارالىق ساحنالاردا دا ءساتتى ونەر كورسەتىپ, كورەرمەننىڭ ىستىق ىقىلاسىنا بولەنىپ, سىنشىلاردىڭ جوعارى باعاسىن الىپ ءجۇر.
قاراعاندى وبلىسى
