«بيىل اۋىل شارۋاشىلىعى داقىلدارى جينالاتىن القاپ 24 ملن گەكتاردى قۇرادى, بۇل 2022 جىلمەن سالىستىرعاندا 652 مىڭ گەكتارعا ارتىق. بۇگىنگى تاڭدا ەلىمىزدىڭ بارلىق وڭىرلەرىندە استىق جيناۋ ناۋقانى اياقتالىپ جاتىر», دەدى مينيستر.
وبلىس اكىمدىكتەرىنىڭ دەرەكتەرى بويىنشا 16,9 ملن گا استىق (98,7%) جينالدى. ورتاشا ونىمدىلىگى 9,7 تس/گا باستاپقى سالماقتا 16,4 ملن توننا استىق, ونىڭ ىشىندە 11,4 ملن توننا بيداي باستىرىلدى. جالپى, اۋا رايىنىڭ قولايسىزدىعىنا قاراماستان, كۇتىلەتىن جالپى استىق ءتۇسىمى 16 ملن توننانى قۇرايدى.
«بۇل 3 ملن توننا كولەمىندەگى اۋىسپالى قالدىقتاردى ەسكەرە وتىرىپ, ەلدى نانمەن جانە ۇنمەن تولىق قامتاماسىز ەتۋگە جەتكىلىكتى. سونىمەن قاتار ەلىمىزدە 4,3 ملن توننا كوكونىس داقىلدارى, 3,5 ملن توننا كارتوپ جانە 1,6 ملن توننا مايلى داقىلدار جينالدى, اتاپ ايتقاندا, 747,5 مىڭ توننا كۇنباعىس باستىرىلدى», دەدى ا.ساپاروۆ.
ءمينيستردىڭ ايتۋىنشا, ەگىن جيناۋ جۇمىستارىن ۋاقتىلى جۇرگىزۋ ءۇشىن اۋىل شارۋاشىلىعى ۇيىمدارىنا ليترىنە 250 تەڭگەدەن 426 مىڭ توننا جەڭىلدەتىلگەن ديزەل وتىنى بولىنگەن. سونىمەن قاتار اعىمداعى جاعدايدى ەسكەرە وتىرىپ, ءداندى جانە مايلى داقىلداردى كەپتىرۋ ءۇشىن قوسىمشا 62,5 مىڭ توننا جەڭىلدەتىلگەن ديزەل وتىنىن ءبولۋ تۋرالى شەشىم قابىلداندى.
