سەرگەي نيكولاەۆيچتىڭ ۇستازدىق ەڭبەك جولى 1992 جىلدان باستاۋ الادى. سودان بەرى تالاي تەحنيكا ماماندارىن تاربيەلەپ شىعارعان تاجىريبەلى ۇستاز بۇگىندە كوللەدج ديرەكتورىنىڭ وقۋ-ءوندىرىس ءىسى جونىندەگى ورىنباسارى قىزمەتىن اتقارادى.
«ازاتتىعىن جاڭا عانا العان جاس رەسپۋبليكانىڭ بۇگىنگىدەي وزگە مەملەكەتتەرمەن تەرەزەسى تەڭ تاۋەلسىز ەل بولىپ قالىپتاسۋ جولىنداعى العاشقى دەربەس قادامى وڭايعا سوققان جوق. اركىم ءوز سالاسىندا تىنىمسىز ەڭبەك ەتتى, تالماي ىزدەنىپ, تەر توكتى. بىزگە دە وسى كوللەدجدىڭ ماتەريالدىق بازاسىن, وندىرىستىك وقىتۋ جۇيەسىن ءوز كۇشىمىزبەن جاڭارتىپ, قايتا جاساپ, تۇبەگەيلى وزگەرتىپ شىعۋعا تۋرا كەلدى. ەسەسىنە ەلىمىز وركەندەپ, دامي باستاعان تۇستا مەملەكەتتىڭ قولداۋىن ارقا تۇتىپ, كوپتەگەن جاڭا جوبانى ىسكە اسىردىق. ماسەلەن, 2014 جىلى «وڭىرلەردى دامىتۋ» باعدارلاماسى ارقىلى دۇنيەجۇزىلىك دامۋ بانكىنىڭ قارجىلاي گرانتىن ۇتىپ الدىق. بۇل قارجىعا وقۋ وندىرىسىنە قاجەت جاڭا تراكتور, قوزعالتقىشتار, توكار ستانوكتارىن, وزگە دە زاماناۋي قۇرىلعىلاردى ساتىپ الىپ, توكار شەبەرحاناسىن تولىق جاڭارتتىق», دەيدى ول.
2010 جىلى سەرگەي نيكولاەۆيچتىڭ شاكىرتى سامات ساعالوۆ اۆتوموبيل جوندەۋ سلەسارى ماماندىعى بويىنشا الماتىدا وتكەن رەسپۋبليكالىق «كاسىبي شەبەرلىك» بايقاۋىندا ءبىرىنشى ورىندى جەڭىپ الادى. ناتيجەسىندە, جەڭىمپاز ستۋدەنت پەن ۇستازى وڭتۇستىك كورەيادا وتكەن «WorldSkills» حالىقارالىق بايقاۋىنا جولداما الدى. «WorldSkills» كونكۋرسىن توكار, دانەكەرلەۋشى, سلەسار سەكىلدى جۇمىسشى مامانداردىڭ چەمپيوناتى دەسەك تە بولادى. وسىلايشا, تالىمگەر-ۇستاز تۇڭعىش رەت وڭتۇستىك كورەيانىڭ مامان دايارلاۋداعى ارتىقشىلىعىن, باي شەبەرحاناسى مەن وقۋ-ماتەريالدىق قورىن كورىپ, تانىسادى. كورەيا ەلىنىڭ جۇمىسشى ماماندىعىنا دەگەن ەرەكشە ىقىلاس تانىتىپ, اسا قۇرمەتپەن قارايتىنىنا, بايقاۋ جەڭىمپازىنا بەرىلەتىن قارجىلاي سىيلىقتىڭ قوماقتى ەكەنىنە, جۇمىسشىلار اراسىنداعى باسەكەنىڭ وتە جوعارى ەكەنىنە تاڭعالىپ, ءتانتى بولادى.
وسى بايقاۋدان ورالىسىمەن سەرگەي بۋلات كوللەدج ستۋدەنتتەرىنە ارنالعان جاڭا شەبەرحانالار اشۋ ىسىنە دەن قويادى. ودان كەيىن كوللەدجدىڭ 12 مۇعالىمىمەن بىرگە سينگاپۋرگە بارىپ, ءبىر ايلىق بىلىكتىلىگىن ارتتىرۋ كۋرسىن ءتامامدايدى. بۇل ەلدەن تاجىريبە بايىتىپ, مامان دايارلاۋدىڭ تىڭ جولدارىن, ءتيىمدى ادىستەرىن كوڭىلگە ءتۇيىپ قايتقان جاڭاشىل پەداگوگ كەلە سالىسىمەن كوللەدج جانىنان وقۋ كاسىپورنىن اشۋعا كىرىسەدى.
ء«بىز ءوزىمىزدىڭ شاعىن تەحنيكالىق قىزمەت كورسەتۋ ورتالىعىن اشتىق. بۇل ورتالىق ستۋدەنت العان تەوريالىق ءبىلىمدى تاجىريبە جۇزىندە بەكىتىپ وتىرۋعا جول اشتى. كەيىن ستۋدەنتتەرگە وزدەرى ءمىنىپ جۇرگەن جەكە كولىكتەرىن وسىندا اكەلىپ جوندەۋگە رۇقسات بەردىك. ءوز ماشيناسى بولعان سوڭ, جوندەۋ جاساپ جاتقان ستۋدەنت بۇرىنعىداي ەمەس, ءار نارسەگە مۇقيات قارايتىن بولدى. كەيبىر كۇردەلى اقاۋلار توڭىرەگىندە اقىل-كەڭەس سۇراپ, كەيدە پىكىر تالاستىرىپ, كادىمگىدەي ىزدەنەتىن بولدى. بۇل دا وقىتۋدىڭ ءتيىمدى ادىستەرىنىڭ ءبىرى دەپ ەسەپتەيمىن», دەيدى پەداگوگ.
2016 جىلى قازاقستان «WorldSkills» حالىقارالىق قوزعالىسىنا مۇشە بولىپ تىركەلدى. كەلەسى جىلى استانادا تۇڭعىش رەت جۇك كولىكتەرىن جوندەۋ ماماندىعى بويىنشا «WorldSkills» حالىقارالىق كونكۋرسى ءوتتى. بايقاۋعا باس ساراپشى رەتىندە سەرگەي بۋلات تا قاتىستى. استانا كونكۋرسىنان ءبىرسىپىرا تاجىريبە جيناقتاعان وقىتۋشى-ۇستاز 2017 جىلى ابۋ-دابيدە وتكەن الەم چەمپيوناتىنا شاكىرتىن الىپ باردى.
«وڭتۇستىك كورەياعا ءبىز قوناق رەتىندە بارساق, ابۋ-دابيگە شاكىرتىم تولىققاندى كونكۋرسقا قاتىسۋشى, ءوزىم ساراپشى رەتىندە قاتىستىق. مەن ول جەردە بايقاۋعا تورەلىك جاساۋ ءتارتىبىن ۇيرەندىم. مۇنداي جوعارى دەڭگەيدەگى كونكۋرسقا ساراپشى بولۋ ءۇشىن الدىمەن ءوز ماماندىعىڭا, كونكۋرس ەرەجەسىنە قاتىستى 100 ساۋالدان تۇراتىن تەست تاپسىرۋىڭ قاجەت. ودان كەيىن اعىلشىن تىلىنەن تەست, ءوز ماماندىعىمىزبەن بايلانىستى تاجىريبەلىك ەمتيحان تاپسىردىق. ويتكەنى بايقاۋ ۇمىتكەرلەرىن باعالاۋ ءۇشىن الدىمەن ءوزىڭنىڭ سوعان لايىقتى ەكەنىڭدى دالەلدەۋىڭ كەرەك. مەن بەرىلگەن تاپسىرمانىڭ ءبارىن قينالماي ورىنداپ شىقتىم. ويتكەنى «WorldSkills» ستاندارتتارىندا قامتىلعان تاپسىرمالاردىڭ ءبارى – ءوزىمىز وقىتىپ جۇرگەن دۇنيەلەر», دەيدى ۇستاز.
2018 جىلى سەرگەي بۋلات قوستاناي اۆتوكولىك كوللەدجىندە تۇڭعىش رەت رەسپۋبليكالىق «WorldSkills» كونكۋرسىن ۇيىمداستىردى. مۇندا ستۋدەنتتەر جەلىلىك جۇيەلەر, جەڭىل كولىك جانە جۇك كولىگىن جوندەۋ, قۇراستىرۋ بويىنشا ءبىلىم جارىستىرىپ, تاجىريبە الماستى. جۇمىسشى ماماندىقتاردى دارىپتەيتىن كونكۋرس قوستاناي كوللەدجىندە وسىدان كەيىن دە بىرنەشە رەت ۇيىمداستىرىلىپ, اۆتوموبيل ونەركاسىبىنىڭ قىر-سىرىن ۇيرەنىپ جۇرگەن قازاق بالالارىنىڭ حالىقارالىق «WorldSkills» بايقاۋلارىنا قاتىسىپ, جۇلدەلى ورىنداردان كورىنۋىنە جول اشتى. بۇگىندە كوللەدجدە بولگاريادا, قازاندا وتكەن «WorldSkills» جارىستارىنىڭ جۇلدەگەرلەرى وقىپ ءجۇر.
سەرگەي بۋلات – قازىر ستۋدەنتتەرگە عانا ەمەس, جاس مۇعالىمدەرگە دە اقىل-كەڭەسىن بەرىپ, قامقورشى بولىپ جۇرگەن تالىمگەر ۇستاز.
«مەن وسىدان بىرنەشە جىل بۇرىن اشىلعان قازاق توپتارىنا ساباق بەرەمىن. كەيدە كۇردەلى تاقىرىپتاردى وتكەن كەزدە نەمەسە كوللەدج شەبەرحانالارىنداعى زاماناۋي قۇرىلعىلاردى پايدالانۋ بارىسىندا ساباققا سەرگەي نيكولاەۆيچتىڭ ءوزى كەلىپ, بالالارعا ءتۇسىندىرىپ, بىزگە ادىستەمەلىك كەڭەس بەرىپ كەتەدى», دەيدى وندىرىستىك وقىتۋ شەبەرى الىبەك قوزىقانوۆ.
قوستاناي وبلىسى
