بيىل جۇزەگە اسا باستاعان «اۋىل اماناتى» پارتيالىق جوباسى اياسىندا وبلىس اۋماعىندا جىل باسىنان بەرى 1 ملرد 968 ملن تەڭگە بولاتىن 286 بيزنەس باستاما قولداۋ تاپقان. بۇل تۋرالى «Amanat» پارتياسى الماتى وبلىستىق فيليالىنىڭ توراعاسى قۋات بايعودجاەۆ دەپۋتاتتىق فراكتسيا وتىرىسىندا مالىمدەدى. ونىڭ ايتۋىنشا, باعدارلاماعا وبلىستىڭ بارلىق 133 اۋىلدىق وكرۋگى قاتىسىپ جاتىر. بىراق بەكىتىلگەن شارتتارعا سايكەس جوباعا قوناەۆ, ەسىك, تالعار, قاسكەلەڭ قالالارىنىڭ تۇرعىندارى قاتىسا المايدى.
– بيىل ءوڭىر جۇرتشىلىعىنان سوماسى 9,5 ملرد تەڭگە بولاتىن 1 300-دەن اسا ءوتىنىم ءتۇستى. ونىڭ 717 ءوتىنىمى بويىنشا ساراپتاما جۇرگىزىلىپ جاتىر. قالعان 619 بيزنەس-جوسپار ماقۇلداندى. قازىرگى ۋاقىتتا 286 قارىز الۋشىعا جالپى سوماسى 1969 ملن تەڭگەگە نەسيە بەرىلدى, – دەدى فيليال توراعاسى ق.بايعودجاەۆ.
جالپى, باعدارلاما بويىنشا جامبىل, كەگەن, رايىمبەك, ۇيعىر, ەڭبەكشىقازاق اۋداندارىندا 22 اۋىل شارۋاشىلىعى كووپەراتيۆى قۇرىلعان. سونداي-اق وسىمدىك جانە مال شارۋاشىلىعى سالاسىندا ازىرلەنگەن 50 جوبا اۋىلدىق ەلدى مەكەندەردە حالىققا قىزمەت كورسەتۋ جوسپارى تانىستىرىلدى. بۇل جوبالارعا قارقىندى باۋ-باقشانى دامىتۋ, جىلىجاي كەشەندەرى, شاعىن قۇس فابريكاسى, بال ءوندىرۋ, جەمشوپ دايىنداۋ, جيھاز, كيىم-كەشەك تىگۋ جانە باسقا دا وندىرىستەر اشىلادى.
ايتا كەتۋ كەرەك, «Amanat» پارتياسىنىڭ سايلاۋالدى باعدارلاماسىندا وسى جوبا اياسىندا 1 500-دەن اسا جۇمىس ورنى اشىلادى دەپ جوسپارلانعان بولسا, بيىل ءوڭىردىڭ ءوندىرىس وشاقتارىندا 450-دەن اسا جۇمىس ورنى قۇرىلدى.
پارتيانىڭ وڭىرلىك «جول كارتاسى» اياسىندا رايىمبەك, كەگەن, ۇيعىر اۋداندارىندا اۋىل شارۋاشىلىعى ونىمدەرىن شىعاراتىن فابريكالاردى سالۋ مىندەتى تۇر.
– بيىل ۇيعىر اۋدانىندا قۋاتتىلىعى 17,5 مىڭ توننا قۇس ەتىن وندىرەتىن «پريما قۇس» فابريكاسى اشىلدى. سونىڭ ناتيجەسىندە 400 ازامات جاڭا جۇمىس ورنىمەن قامتىلدى. بۇدان بولەك, اۋداندا كەلەسى جىلى قولدانىسقا بەرىلەتىن جىلىجايدىڭ قۇرىلىس جۇمىستارى جۇرگىزىلىپ جاتىر. ءۇش گەكتار جەردى الىپ تۇرعان جىلىجايدا 40 جاڭا جۇمىس ورنى اشىلماق, – دەيدى وبلىستىق اۋىل شارۋاشىلىعى باسقارما باسشىسىنىڭ ورىنباسارى ديماش سادىقوۆ.
سونىمەن قاتار كەگەن اۋدانىندا قۇنى 1 ملرد تەڭگەدەن اساتىن ەت وڭدەۋ كومبيناتىنىڭ قۇرىلىس جۇمىسى جۇرگىزىلىپ جاتقانى دا اتاپ ءوتىلدى. تىرشىلىك وزەگى ءتورت ت ۇلىككە بايلانعان كەگەن وڭىرىندە ءبىر اۋىسىمدا 50 باس ءىرى قارا جانە 150 باس ۇساق مال ەتىن وڭدەۋ كومبيناتى اشىلسا, 30 ادام جۇمىسقا ورنالاسادى. بۇدان بولەك, «Great Steppe Heritage» جشس باقتاق (فورەل) شارۋاشىلىعىن اشۋدى جوسپارلاپ وتىر. وندا 20 ادام جۇمىس ورنىمەن قامتاماسىز ەتىلەدى.
«Amanat» پارتياسى الماتى وبلىستىق فيليالىنىڭ توراعاسى رايىمبەك اۋدانىندا دا باقتاق شارۋاشىلىعىن كەڭەيتۋ جۇمىستارى جۇرگىزىلىپ جاتقانىن ايتتى. سونىمەن قاتار بيىل اۋداندا ءسۇت وڭدەۋ, بالىق جانە ومارتا شارۋاشىلىعىنىڭ يەلەرى 50-دەن اسا ازاماتتى جۇمىسپەن قامتىعان. بۇل جۇمىستار الداعى ۋاقىتتا دا جالعاسىن تابادى. سونداي-اق وڭىردە 2027 جىلعا دەيىن پارتيانىڭ سايلاۋالدى باعدارلاماسى اياسىندا 6,9 مىڭ گەكتار سۋارمالى جەردى قالپىنا كەلتىرۋ جوسپارلانىپ وتىر.
اۋىل شارۋاشىلىعى باسقارماسى باسشىسىنىڭ ورىنباسارى ديماش سادىقوۆتىڭ ايتۋىنشا, اۋىل شارۋاشىلىعى ماقساتىنداعى سۋارمالى جەرلەردىڭ اۋدانى 263,8 مىڭ گا قۇرايدى. ال ونىڭ ىشىندە سۋارمالى ەگىستىك 240 مىڭعا جۋىق گەكتار. بۇگىنگى تاڭدا سۋارۋ جەلىلەرى مەن سۋ شارۋاشىلىعى نىساندارىنىڭ 60-70 پايىزى توزعان.
– بۇل ماسەلەنى شەشۋ ءۇشىن اكىمدىك وتكەن جىلدان باستاپ اينالىمنان شىعىپ قالعان 54,1 مىڭ گا سۋارمالى جەرلەردى قالپىنا كەلتىرۋگە مۇمكىندىك بەرەتىن سۋارۋ جەلىلەرىن قايتا جاڭعىرتۋ بويىنشا شارالار قابىلدانىپ جاتىر, – دەيدى باسقارما باسشىسىنىڭ ورىنباسارى.
ايتا كەتۋ كەرەك, «Amanat» پارتياسىنىڭ سايلاۋالدى باعدارلاماسىندا جامبىل, ىلە, تالعار اۋداندارىنىڭ سۋارۋ جەلىلەرىن قايتا جاڭارتۋ مىندەتى تۇر. جالپى, ءۇش جوبانىڭ جالپى قۇنى – 64,4 ملرد تەڭگە. بيىل وعان 3 ملرد تەڭگە قاراجات بولىنگەن.
جوبالار تولىق ىسكە اسىرىلعان جاعدايدا اينالىمعا 22 مىڭعا جۋىق گەكتار پايدالانىلمايتىن سۋارمالى جەرلەردى ەنگىزۋ جوسپارلانعان. اگرارلى وبلىستا بيىل ليزينگ ارقىلى 3 ملرد 851 ملن تەڭگەگە 269 تەحنيكا ساتىپ الىنعان. بۇگىنگى كۇنگە وڭىردەگى اۋىل شارۋاشىلىعى تەحنيكالارىنىڭ توزۋ كورسەتكىشى 58,8 پايىزدى قۇرايدى ەكەن.
وبلىس بويىنشا اۋىل شارۋاشىلىعى تەحنيكاسىنىڭ بارلىعى – 13 415. ونىڭ ىشىندە 10 جىلدان اسا پايدالانعان 8 مىڭعا جۋىق تەحنيكا توزعان, دەيدى د.سادىقوۆ.
جالپى, ينۆەستيتسيالىق سالىمدار نەگىزىندە ساتىپ الىنعان تەحنيكانىڭ 25 پايىزى جانە سۇرانىسقا يە اۋىل شارۋاشىلىعى تەحنيكاسىنىڭ 30 پايىزى مەملەكەت بيۋدجەتىنەن سۋبسيديالانادى.
دەپۋتاتتىق فراكتسيا وتىرىسىندا ءسوز العان وبلىستىق دەنساۋلىق ساقتاۋ باسقارماسىنىڭ باسشىسى ءلاززات اقتاەۆا ءوڭىر اۋماعىندا 6 جاڭا مەديتسينالىق نىسان سالىنىپ جاتقانىن اتاپ ايتتى. سونداي-اق 2025 جىلعا دەيىن «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى اياسىندا 40-قا جۋىق مەكەمە بوي كوتەرەتىنى جوسپارلانعانىن جەتكىزدى.
باسقارما باسشىسىنىڭ ايتۋىنشا, بيىل دارىگەرلىك ۇيىمداردىڭ ماتەريالدىق-تەحنيكالىق بازاسىن نىعايتۋعا 5 ملرد تەڭگەدەن اسا قارجى قاراستىرىلعان.
وبلىستا ءبىلىم بەرۋ ساپاسىن كوتەرۋگە دە ەرەكشە نازار اۋدارىلىپ كەلەدى. بيىلعى وقۋ جىلىندا 9 جاڭا مەكتەپ قولدانىسقا بەرىلسە, جىل سوڭىنا دەيىن تاعى 5 مەكتەپتىڭ قۇرىلىسى اياقتالادى. وعان قوسا 16 نىساندا كۇردەلى جوندەۋ جۇمىستارى جۇرگىزىلىپ جاتقانى بەلگىلى, ونىڭ ەكەۋى اياقتالعان. بۇل جۇمىستارعا بيۋدجەتتەن 13 ملرد تەڭگەگە جۋىق قارجى بولىنگەن. دەپۋتاتتار ءوز كەزەگىندە ءبىلىم بەرۋ نىساندارىندا جۇمىس قارقىنىن جىلدامداتۋ قاجەتتىگىن قۇلاعدار ەتتى.
وڭىردە ءۇش اۋىسىمدىق ماسەلەسىن جويۋ ءۇشىن «جايلى مەكتەپ» ۇلتتىق جوباسى اياسىندا ەكى جىلدىڭ ىشىندە 54 600 ورىندىق 53 جاڭا مەكتەپ سالىنۋ جوسپارلانىپ وتىر. سونىمەن قاتار مەكتەپكە دەيىنگى تاربيەمەن قامتۋ ماقساتىندا 5 مىڭ ورىنعا جۋىق 59 جەكەمەنشىك بالاباقشا جانە قوسىمشا توپتار اشۋ كوزدەلگەن.
القالى جيىندا وبلىستىڭ وزگە دە باسقارما باسشىلارىنىڭ اتقارىلىپ جاتقان جۇمىستارى تۋرالى ەسەپتەرى تىڭدالىپ, سىن-ەسكەرتپەلەر نازارعا الىندى.
الماتى وبلىسى
