كوشپەلى وتىرىس جۇمىسىنا حالىقارالىق ىستەر, قورعانىس جانە قاۋىپسىزدىك كوميتەتىنىڭ دەپۋتاتتارى, قورعانىس مينيسترلىگىنىڭ باسشىلارى مەن كوماندالىق قۇرامى, قاۋىپسىزدىك كەڭەسى, قارجى, ۇلتتىق ەكونوميكا, ونەركاسىپ جانە قۇرىلىس, ادىلەت, توتەنشە جاعدايلار مينيسترلىكتەرىنىڭ, ۇلتتىق ۇلاننىڭ جانە وبلىستاردىڭ, استانا, الماتى جانە شىمكەنت قالالارى اكىمدىكتەرىنىڭ وكىلدەرى قاتىستى.
ءماجىلىس كوميتەتىنىڭ حاتشىسى ايدوس سارىم مەملەكەت باسشىسى قاسىم-جومارت توقاەۆ ءوزىنىڭ «ادىلەتتى قازاقستان: ءبارىمىز جانە ارقايسىمىز ءۇشىن. قازىر جانە ءاردايىم» اتتى سايلاۋالدى باعدارلاماسىندا اۋماقتىق قورعانىستى نىعايتۋ شارالارىن قابىلداۋ مىندەتىن ايقىنداعانىن اتاپ ءوتتى.
قورعانىس ءمينيسترى اۋماقتىق قورعانىس اسكەرلەرىنىڭ مەملەكەتتىك قاۋىپسىزدىكتى قامتاماسىز ەتۋدەگى ماڭىزدى رولىنە توقتالدى. الەمنىڭ كوپتەگەن ەلىنىڭ اۋماقتىق قورعانىسىنا قارۋلى كۇشتەردى جۇمىلدىرۋ, ستراتەگيالىق وبەكتىلەر مەن اسكەري جانە ازاماتتىق ينفراقۇرىلىم ەلەمەنتتەرىن قورعاۋ مىندەتتەرى جۇكتەلگەن. رۋسلان جاقسىلىقوۆ اتاپ وتكەندەي, قورعانىس مينيسترلىگى جۇمىلدىرۋ كەزىندە, اسكەري جاعدايدا نەمەسە سوعىس ۋاقىتىندا اۋماقتىق قورعانىس قىزمەتىن زاڭ جۇزىندە بەكىتۋ ماسەلەسىن پىسىقتادى.
قورعانىس ءمينيسترىنىڭ ءبىرىنشى ورىنباسارى – قارۋلى كۇشتەر باس شتابىنىڭ باستىعى گەنەرال-لەيتەنانت مارات قۇسايىنوۆ دەپۋتاتتاردى وبلىستار مەن رەسپۋبليكالىق ماڭىزى بار قالالاردىڭ اۋماقتىق قورعانىسىنىڭ اعىمداعى جاي-كۇيىن, شەشىلۋگە ءتيىس ماسەلەلەر مەن ولاردى شەشۋ جولدارىن ەگجەي-تەگجەيلى حاباردار ەتتى. باس شتاب باستىعى اۋماقتىق قورعانىس اسكەرلەرى مەن بريگادالارىنىڭ نەگىزگى مىندەتتەرىن ايتىپ بەردى. ولار بەيبىت ۋاقىتتا قىسقارتىلعان قۇرامدا ۇستالىپ, ال توتەنشە نەمەسە اسكەري جاعداي رەجىمدەرىن ەنگىزۋ كەزىندە جەرگىلىكتى حالىق اراسىنان اسكەري مىندەتتىلەردى شاقىرۋ جولىمەن جيناقتالادى.
وتىرىس بارىسىندا استانا قالاسى اكىمىنىڭ ورىنباسارى ەسەت بايكەنوۆ پەن اقتوبە وبلىسى اكىمىنىڭ ورىنباسارى عالىمجان ەلەۋوۆتىڭ باياندامالارى تىڭدالدى.
بۇل رەتتە اۋماقتىق اسكەرلەردىڭ كەيبىر وبلىستارداعى جابدىقتالۋ دەڭگەيىنىڭ جەتكىلىكسىزدىگى, قارجىلاندىرۋ پروبلەمالارى, وسى سالادا مەملەكەتتىك باقىلاۋدىڭ بولماۋى جانە باسقالارى نازارعا الىندى.
بيۋدجەتتىك قارجىلاندىرۋ, اۋماقتىق قورعانىس جۇيەسىن جەتىلدىرۋ جانە ينفراقۇرىلىم قۇرىلىسى سىندى وزەكتى ماسەلەلەر جيناقتالىپ, كوشپەلى وتىرىس بارىسىندا ايتىلعان سىندارلى ۇسىنىستار بەيىندى كوميتەتتىڭ زاڭ شىعارۋ جۇمىسىندا ەسكەرىلەتىنى اتاپ ءوتىلدى.
