اقكول-جايىلما انشىلىك مەكتەبىنىڭ وكىلى, قازاقستاننىڭ حالىق ءارتىسى قايرات بايبوسىنوۆتىڭ شاكىرتى, انشىلىككە ءوز ورنەگىمەن, ايگىلى اقىن-كومپوزيتور ەستايدىڭ انىمەن تەربەلىپ كەلگەن, قايتالانباس قولتاڭباسى بار كەڭ تىنىستى ءانشى, رەسپۋبليكالىق امىرە قاشاۋباەۆ اتىنداعى بايقاۋدىڭ باس جۇلدەگەرى ەربول ايتباەۆ بيىل ەردىڭ جاسىنا جەتىپ وتىر. ەرەكەڭ الماتى كونسەرۆاتورياسىن ءتامامداپ كەلگەن سوڭ, جەرگىلىكتى مۋزىكا كوللەدجىندە جاس تالانتتاردى شىڭدادى. ءبىراز جىل استانا مەملەكەتتىك فيلارمونياسىندا جەكە ورىنداۋشى بولىپ قىزمەت ەتىپ, 2002 جىلى سول كەزدەگى س.تورايعىروۆ اتىنداعى پمۋ رەكتورى ەرلان ارىننىڭ ارنايى شاقىرتۋىمەن پاۆلودارعا قايتا ورالدى. وقۋ ورنى انشىگە ۋنيۆەرسيتەت پروفەسسورى دەگەن مارتەبەلى اتاق بەرىپ, «القاراكوك» اتتى اۋديو ديسكى شىعاردى. شاكىرتتەرى بۇگىندە ونەردە ءوز ورىندارىن تاۋىپ, ۇستازىنىڭ جولىن لايىقتى جالعاستىرىپ كەلەدى.
كونتسەرتتە ءداستۇرلى ءان-جىر مەن كۇي ونەرىنىڭ دۇلدۇلدەرى رامازان ستامعازيەۆ, ەرلان رىسقالي, تولعانباي سەمباەۆ, قايرات كاكىموۆ, كۇنسۇلۋ تۇرىكپەن, قايرات ايتباەۆ, داۋرەنبەك اركەنوۆ, داۋرەنبەك سلامعالي, سالتانات قيساتوۆا, جايدار شۋنان جانە «شەرنياز» بي توبى ونەر كورسەتتى. ارقادا ەربول ايتباەۆتاي ء«يمانجۇسىپ» پەن «جيىرما بەس» اندەرىن ناقىشىنا كەلتىرە ايتاتىن انشىلەر سيرەك. كورەرمەن قوشەمەتىمەن بۇل سۇيىكتى اندەردى مەرەيتوي يەسى قۇلاق قۇرىشىن قاندىرا شىرقادى. كەشتە كوپشىلىك سۇراۋىمەن رامازان ستامعازيەۆ, ەرلان رىسقالي ساحناعا قايتا-قايتا شاقىرىلىپ, ولار «داريعا داۋرەن», «مولدابايدىڭ ءانى» تۋىندىلارىن ورىنداپ بەردى.
پاۆلودار
