فوتو: egemen.kz
مەملەكەت باسشىسىنىڭ باستاماسىمەن العاش رەت پيلوتتىق اۋداندار مەن وبلىستىق ماڭىزى بار قالالاردىڭ اكىمدەرىن سايلاۋ ءوتتى. ەلىمىزدەگى 17 وبلىستىڭ ءماسليحاتتارى اكىمدەردى سايلاۋ ءۇشىن 42 اۋدان مەن 3 وبلىستىق ماڭىزى بار قالانىڭ تىزبەسىن بەكىتتى. 5 قاراشا كۇنى وتكەن اكىمدەردى سايلاۋعا 1553 سايلاۋ كوميسسيالارى: 17 وبلىستىق, 3 قالالىق, 42 اۋداندىق جانە 1491 ۋچاسكەلىك سايلاۋ كوميسسيالارى جۇمىلدىرىلدى.
بالاما نەگىزدە وتكىزىلگەن سايلاۋ بيۋللەتەنىنە 125 كانديدات ەنگىزىلگەن. داۋىس بەرۋگە سايلاۋشىلاردىڭ 62,79 %-ى قاتىسقان. سايلانعان اكىمدەردىڭ ورتاشا جاسى – 46,7 جاس. سايلاۋ ناۋقانى رەسپۋبليكانىڭ سايلاۋ زاڭناماسى نورمالارىنىڭ تالاپتارىنا سايكەس ءوتتى. سايلاۋ كۇنى 8500-گە جۋىق ازامات, ولاردىڭ ىشىندە كانديداتتاردىڭ سەنىم بىلدىرىلگەن ادامدارى, بايقاۋشىلارى مەن باق وكىلدەرى باقىلاۋشى بولدى. «قازاقستان رەسپۋبليكاسىنىڭ ورتالىق سايلاۋ كوميسسياسى وسى سايلاۋدى ۇيىمداستىرۋ جانە وتكىزۋ كەزىندە اۋماقتىق سايلاۋ كوميسسيالارىنا ادىستەمەلىك باسشىلىقتى, سونداي-اق ولاردىڭ قىزمەتىنىڭ سايلاۋ تۋرالى كونستيتۋتسيالىق زاڭ تالاپتارىنا سايكەستىگىن باقىلاۋدى جۇزەگە اسىردى», دەلىنگەن اقپاراتتا.
