«ەكى اۋدانداعى اكىم سايلاۋىندا داۋىس بەرەتىندەر ساناتىنا 34 487 سايلاۋشى ەنگىزىلدى. بۇل وبلىستاعى سايلاۋشىلاردىڭ جالپى سانىنىڭ 8,5 پايىزىن قۇرايدى. ەكى اۋدان اكىمىنىڭ سايلاۋىنا 6 ۇمىتكەر تىركەلدى. سايلاۋ ۋچاسكەلەرىندە داۋىس بەرۋ بارىسىن 11 قوعامدىق ۇيىمنىڭ 80-نەن استام بايقاۋشىسى قاداعالادى. زاڭ بۇزۋشىلىق انىقتالعان جوق», دەدى ا.ايماناكۋموۆ.
اۋداندارداعى سايلاۋ ۋچاسكەلەرىندە مۇمكىندىگى شەكتەۋلى جانداردىڭ كەدەرگىسىز داۋىس بەرۋى ءۇشىن قولايلى جاعداي جاسالعان. ماسەلەن, يساتاي اۋدانىنداعى – 15, قىزىلقوعا اۋدانىنىڭ 16 سايلاۋ ۋچاسكەسىندە پاندۋس ورناتىلعان. سايلاۋ ۋچاسكەلەرى تاكتيلدى جولاق, مونوبلوك پەن قۇلاققاپ, برايل شريفت, لۋپا سەكىلدى قۇرالدارمەن قامتىلعان.
اۋدان اكىمىنىڭ لاۋازىمىن يەلەنۋگە نيەت بىلدىرگەن 6 ۇمىتكەردىڭ ەكەۋىن ساياسي پارتيالار ۇسىندى. ۇمىتكەردىڭ ءبىرى – «Amanat» پارتياسىنىڭ وكىلى. قازاقستان حالىق پارتياسى دا سايلاۋ دوداسىنا ءبىر ۇمىتكەرىن قوستى. ءوزىن-ءوزى ۇسىنعان ءۇش كانديدات اۋىلدىق وكرۋگتىڭ اكىمى بولىپ جۇمىس ىستەيدى. كانديداتتاردىڭ اراسىندا اۋداندىق ءماسليحاتتىڭ توراعاسى, اۋدان اكىمىنىڭ ورىنباسارى بار.
بۇل سايلاۋدان ەكى اۋداننىڭ تۇرعىندارى زور ءۇمىت كۇتىپ وتىر. سولاردىڭ قاتارىندا يساتاي اۋدانىنداعى اققىستاۋ اۋىلىندا تۇراتىن ابەجانوۆتار اۋلەتى دە بار. اۋىلداستارى ولاردى «دارىگەرلەر ديناستياسى» دەپ اتايدى. ويتكەنى اۋلەتتەگى 11 ادام وسى سالانى تاڭداعان.
ۇزاق جىل اۋداندىق جەدەل جاردەم بريگاداسىندا فەلدشەر قىزمەتىن اتقارعان زەينەتكەر قادىرجان ابەجانوۆ داۋىس بەرۋگە زايىبىن, بالا-كەلىنىن, نەمەرەلەرىن ەرتە كەلدى. ونىڭ زايىبى مەڭسۇلۋ ەسەنعاليەۆا رەنتگەنت مەدبيكەسى بولىپ جۇمىس ىستەگەن. ال ۇلى جەڭىسبەك اۋداندىق ورتالىق اۋرۋحانادا حيرۋرگ, كەلىنى ءماريام سەرگەيقىزى ۋچاسكەلىك دارىگەر رەتىندە تۇرعىندار دەنساۋلىعىن ساقتاۋعا ۇلەس قوسىپ ءجۇر.
«اۋدان اكىمىنىڭ سايلاۋى العاش رەت وتكىزىلىپ وتىر. دەمەك مۇنى ەلدەگى دەموكراتيالىق ءۇردىستىڭ جەمىسى رەتىندە باعالاۋ قاجەت. ويتكەنى حالىق سايلاعان اۋدان اكىمىنە جۇكتەلەتىن جاۋاپكەرشىلىكتىڭ جۇگى جەڭىل ەمەس. جاڭا اكىم بۇقارانىڭ الەۋمەتتىك تۇرمىسىن جاقسارتۋ, اسىرەسە جۇمىسسىزدىقتى ازايتۋ, اۋىلداردى ينجەنەرلىك ينفراقۇرىلىممەن قامتۋ, قۇم كوشكىنىنەن قورعاۋ سەكىلدى ءتۇيىندى ماسەلەلەرگە كوڭىل ءبولۋى كەرەك», دەيدى ق.ابەجانوۆ.
ال قىزىلقوعا اۋدانىندا تۇراتىن زەينەتكەر تىلەكباي شوكەنوۆتىڭ ايتۋىنشا, اۋدان اكىمىنىڭ سايلاۋى – ناعىز دەموكراتيانىڭ كورىنىسى. سول سەبەپتەن, حالىقتىڭ تاڭداۋىنا ەرىك بەرىلىپ وتىر.
«حالىقتىڭ ەركىن تاڭداۋ جاساۋىنا مۇمكىندىك بەرىلگەنى – دەموكراتياعا بەت بۇرعانىمىزدىڭ ءبىر دالەلى. اۋدان اكىمىنىڭ سايلاۋى العاش رەت وتكەندىكتەن, تاڭداۋ جاساۋ وڭاي بولمادى. بىراق مۇنىڭ الداعى سايلاۋدا ساباق بولارىنا سەنەمىن», دەيدى ت.شوكەنوۆ.
اتىراۋ وبلىسى
