اكىم سايلاۋى وتكىزىلىپ جاتقان 45 اۋداننىڭ, ناقتىلاي كەتسەك, 42 اۋدان مەن 3 قالانىڭ ىشىندە سايلاۋشىلار سانى بويىنشا جامبىل اۋدانى كوش باستادى. مۇنى بىزگە جامبىل اۋدانى اۋماقتىق سايلاۋ كوميسسياسىنىڭ توراعاسى جاقسىلىق قارىمباەۆ مالىمدەدى. اتالعان اۋدان بويىنشا سايلاۋدا داۋىس بەرۋ قۇقىعى بار ازاماتتاردىڭ سانى – 105 895. ولاردىڭ اۋدان اۋماعىنداعى 77 سايلاۋ ۋچاسكەسىندە وزدەرىنىڭ سايلاۋ قۇقىقتارىن پايدالانا وتىرىپ, داۋىس بەرۋىنە بارلىق جاعداي جاسالدى. سايلاۋ كوميسسياسى مۇشەلەرىنىڭ سانى 534 ادامدى قۇرادى.
اۋداندىق سايلاۋ كوميسسياسى توراعاسىنىڭ ايتۋىنشا, حالىقتىڭ بەلسەندىلىگى جوعارى. ماسەلەن, ساعات 10.00-گە دەيىن سايلاۋشىلاردىڭ 11,7 پايىزى وزدەرى تىركەلگەن سايلاۋ ۋچاسكەلەرىنە كەلىپ, تاڭداۋلارىن جاساعان. بۇل ارالىقتا سايلاۋ ۋچاسكەلەرىندە ەشقانداي ءتارتىپ بۇزۋشىلىق, زاڭسىزدىقتار تىركەلگەن جوق.
سونداي-اق بالقاش اۋدانىنىڭ تۇرعىندارى دا ساياسي ناۋقانعا بەيجاي قاراماي, ءوز تاڭداۋلارىن جاساۋدا بەلسەندىلىك تانىتتى. اۋدان اكىمىنىڭ لاۋازىمىنا 3 كانديدات داۋىسقا ءتۇستى. ولاردىڭ 2-ەۋى ءوزىن-ءوزى ۇسىنسا, 1-ەۋىن «Amanat» پارتياسى ۇسىنعان.
«اۋدانداعى 18 452 سايلاۋشىنىڭ ىشىندە 274-ءى العاش رەت داۋىس بەردى. اۋداندا 23 سايلاۋ ۋچاسكەسى, ونىڭ بىرەۋى جابىق سايلاۋ ۋچاسكەسى رەتىندە جۇمىس ىستەدى. ۇيدەن 178 سايلاۋشى ءوز تاڭداۋلارىن جاسادى», دەيدى بالقاش اۋدانىنىڭ اۋماقتىق سايلاۋ كوميسسياسىنىڭ توراعاسى مارات نوعايباي.
سايلاۋشىلار سەنىمىن ارقالاعان اكىمدەردىڭ ءوز مىندەتتەرىن ابىرويلى اتقارىپ, الەۋمەتتىڭ الەۋەتىن جاقسارتۋعا سەپتىگى تيەر دەگەن ءۇمىت باسىم.
الماتى وبلىسى
