وبلىستىق سايلاۋ كوميسسياسىنىڭ توراعاسى قايرات نۇركەنوۆتىڭ ايتۋىنشا, ءتۇس اۋعانشا ەكى اۋدان, ءبىر قالا بويىنشا 50 پايىزدان ارتىق حالىق ءوز تاڭداۋىن جاساعان.
پريوزەرسك قالاسىندا دا سايلاۋ بەلسەندى ءجۇردى. شاعىن شاھاردا 11 سايلاۋ ۋچاسكەسى بار. ۋچاسكەلەردە سانيتارلىق تالاپتار تولىق ساقتالىپ, باقىلاۋشىلار تاراپىنان قاداعالاۋ جۇمىستارى جۇرگىزىلدى. بۇل جونىندە پريوزەرسك قالالىق سايلاۋ كوميسسياسىنىڭ توراعاسى بەكزات سارسەنبەكوۆ حابارلادى.
ء«ار اۋىل مەن قالا ءوز اكىمىن ءوزى تاڭداپ الادى» دەگەن مەملەكەت باسشىسىنىڭ سوزىنەن كەيىن قالا حالقى سايلاۋعا بەيجاي قاراماعانداي كورىنەدى. جۇرت ۋچاسكەگە كەلىپ, بەلسەندى داۋىس بەرىپ, سايلاۋ قارقىندى ءجۇرىپ جاتىر. 6534 قالا تۇرعىنى سايلاۋ ۋچاسكەلەرىنە تىركەلگەن. تۇسكە دەيىن 44 پايىزدان استام سايلاۋشى داۋىس بەردى. سايلاۋعا بۇكىل جاعداي جاسالعان. مەن داۋىس بەرۋگە كەلگەن ادامداردىڭ كوپتىگىنە قۋاندىم. جانە بۇل تەك 50 جانە 60 جاستاعى ادامدار ەمەس. كەلۋشىلەر اراسىندا 18 جاستاعى ازاماتتار دا بار. مىسالى, جاقىندا عانا كامەلەتكە تولىپ, سايلاۋعا ومىرىندە ءبىرىنشى رەت كەلگەن جىگىتتى كەزدەستىردىم. بۇل جاستاردىڭ قالانىڭ جاعدايىنا الاڭداپ, ءوز بولاشاعىنا ۇمتىلىپ جاتقانىن كورسەتەدى», دەيدى بەكزات سارسەنبەكوۆ.
اقتوعاي اۋدانى اۋماقتىق كوميسسياسىنىڭ توراعاسى جانبولات رايىمبەكوۆتىڭ ايتۋىنشا, 38 سايلاۋ ۋچاسكەسى جۇمىس ىستەپ تۇر. سايلاۋ ۋچاسكەلەرى بەكىتىلگەن ەرەجەگە سايكەس جۇمىس ىستەدى. ازىرگە زاڭ بۇزۋشىلىق تىركەلگەن جوق. اۋدان بويىنشا بارلىعى تىركەلگەن 10 475 ادام داۋىس بەرەدى دەپ كۇتىلىپ وتىر. دەنساۋلىعىنا بايلانىستى ۇيىنەن شىقپاي-اق داۋىس بەرگەن قاريالار بار. وسى ورايدا سايلاۋ ۋچاسكەسىنە كەلە الماعان قارتتاردىڭ ۇيىنە جاشىكتى ارنايى اپارىپ, تاڭداۋ جاساۋعا مۇمكىندىك بەرىلىپ وتىر.
وساكاروۆ اۋدانىندا دا تاڭداۋ جاساۋعا كەلگەن حالىق بەلسەندىلىگى جوعارى. 42 سايلاۋ ۋچاسكەسى بويىنشا 54 پايىزعا جۋىق تۇرعىن ءوز كانديداتتارىنا داۋىس بەرگەن. وبلىستىق سايلاۋ كوميسسياسىنىڭ توراعاسى ق.نۇركەنوۆ سايلاۋ كەشكى 20:00-گە دەيىن جالعاساتىنىن, قورىتىندى ەرتەڭ شىعاتىنىن مالىمدەدى.
قاراعاندى وبلىسى
