ول اياعىا جاسالعان وتادان كەيىن قاتتى السىرەپ كەتكەنىن, ارادا ءبىر اپتا وتپەي قوس وكپەسى اۋىرسىنا باستاعانىن جەتكىزگەن.
"دۇركىن-دۇركىن كوتەرىلگەن قىزۋ مەن جوتەل شارشاتىپ-اق تاستادى. تاعى سول ەمحاناعا تەلەفون شالىپ, تەراپەۆتتىڭ قابىلداۋىن سۇرادىم. ولار بۇل اپتاعا ورىن جوق دەدى. "قالقام, جاعداي وسىنداي بولىپ تۇر". "مەن كومەكتەسە المايمىن". امال جوق ءبولىم مەڭگەرۋشىسىنە باردىم, ول ءبىر دارىگەرگە جىبەرەدى. ول تىڭداپ كورىپ, "سىزدە پنەۆمونيا جوق" دەپ, بىرەر ءدارى جازىپ بەردى. ولاردان كومەك بولمادى, تىنىس الۋ قيىنداپ بارادى", دەگەن اۆتور.
سودان سوڭ دەرتى شىداتپاي بارا جاتقان سوڭ, جەدەل جاردەم شاقىرعان, ولار ەكىنشى قالالىق اۋرۋحاناعا اپارىپ تاستاعان.
"جەردىڭ ءتۇبى ەكەن. كەزەگىم كەلگەندە رەنتگەنگە ءتۇسىرىپ, ولار دا "سىزدە پنەۆمونيا جوق, سوندىقتان ءسىزدى جاتقىزا المايمىز. ءتورتىنشى اۋرۋحاناعا بارىپ كورىڭىز, ءوز اۋدانىڭىز, سولار ەمدەۋگە مىندەتتى" دەدى. سۇيرەتىلىپ سوندا كەلدىم, ولار "بىزدە وكپە ەمدەيتىن ءبولىم جوق, قالقامانعا بارىڭىز" دەدى. اۋىرىپ ءالىڭ كەتىپ تۇرعاندا ءجۇرۋ قانداي اۋىر, ۇيگە جەتتىم دە قۇلادىم. ايەل جۇمىستا, بالالار جان-جاققا حابارلاسىپ, كەڭەس سۇراي باستادى", دەپ جازعان نۇرتاي ەرنازار.
وعان تانىستارىنىڭ ءبىرى شۇعىل تۇردە كت تۇسىرۋگە كەڭەس بەرەدى.
"جاپپارقۇلدا جان بار ما, وعان دا باردىق. ونداعى جىگىت "اعا, وڭ جاق وكپەنىڭ ءبىر بولىگى عانا ساۋ, قالعانىن تۇگەل الىپ قويعان, شۇعىل ەم الماساڭىز كەش بولادى" دەدى. تاعى جەدەل جاردەم شاقىردىق. ولار قالقامانداعى پۋلمونولوگيا ورتالىعىنا جەتكىزدى. جول مۇنداي ۇزاق بولار ما, كەشكى كەپتەلىس جەدەل جاردەمدى دە تۇتقىنداپ تاستايدى ەكەن. اۋرۋحاناعا جەتە الماي تالاي ادام كوز جۇمعان شىعار-اۋ دەپ تە ويلاپ قويام. باقساق, بۇل دا ءبىر شەشۋىن تاپپاي كەلە جاتقان پروبلەما ەكەن عوي. اۋرۋحاناعا جەتكەندە جۇرۋدەن قالدىم, ارى قاراي اربامەن الىپ كەتتى. مۇرىنعا كيسلورود شلانگاسىن تىعىپ جىبەرىپ, تامىردان تامشىلاتىپ سۋارا باستادى. قويشى, نە كەرەك, سودان ون بەس كۇن دەگەندە قىزۋ باسىلدى, قىبىرلاپ جۇرە باستادىم", دەيدى اۆتور.
ونىڭ ويىنشا, ەگەر ءاۋ باستا اندا-مىندا اۋرە قىلماي بىردەن وسىندا جىبەرسە, اناعۇرلىم جەڭىل بولعانداي ەكەن.
"كت تۇسكەنگە دەيىنگى اپپاراتتار جامان با, الدە دارىگەرلەر رەنتگەندى دۇرىس وقي الماي ما, سىزدە ەشتەڭە جوق دەپ سەندىردى عوي, بىراق ناتيجە كەرىسىنشە بولىپ شىقتى", - دەپ تاڭدانادى اقىن.
ول كوروناۆيرۋس كەزىندە مىقتى سپورتشى جىگىتتەردىڭ ءبىر-ەكى كۇندە دەرتتەن قايتىس بولىپ كەتكەنىن ەسىنە الادى.
"وسى جولى ءوز باسىمنان وتكىزىپ بارىپ كوزىم جەتكەندەي بولدى. وكپە دۇرىس جۇمىس ىستەمەگەن سوڭ اعزاعا وتتەگى جەتپەي قوزعالۋعا شاما كەلمەي قالادى ەكەن.
ناقتى ەمدەيتىن جەرگە جەتكەنشە كەدەرگى نەگە كوپ؟ بىراق وتكەندە مينيستر حانىم وسى جۇيە دۇرىس دەگەندەي قىلدى عوي. ايتايىن دەگەنىم ءوز جاعدايىم ەمەس, وسى جاعدايدى باستان كەشىپ جاتقان كوپتىڭ ءبىرىمىن عوي, مىنا جۇيەنىڭ وسىلاي جالعاسا بەرگەنى دۇرىس پا, الدە جاڭا ۇتىمدى تاسىلدەر قاجەت پە؟ وزىق ەلدەردەن ءتيىمدى ءبىر جۇيەنى ۇرلاپ الساق تا مىنا جاعدايدى وزگەرتۋ كەرەك شىعار؟ اقىلدى حالىق ارتتا قالعان جۇيەمەن جۇمىس ىستەي مە؟", دەپ كۇيىنگەن كوز جۇمارىنىڭ الدىندا نۇرتاي ەرنازار.
دەگەنمەن ول اۋرۋحانا دارىگەرلەرىنە العىسىن ايتىپ ۇلگەرگەن. ولارعا تابىس تىلەگەن.
"بۇگىن ۇيىمە كەپ راحاتتانىپ قالدىم, قارا دومبىرامدى دا ساعىنىپپىن. بىراق ءبىر ايعا دەيىن ۇيدەن شىعۋعا, قوناق قابىلداۋعا تىيىم سالىندى. بۇل كۇن دە وتەر. اۋىرماڭىزدار", دەپ اياقتالادى اقىننىڭ سوڭعى جازبالارىنىڭ ءبىرى.
