ءبىز العاش بارعان «Altynarna Geosynthetic» كاسىپورنى «2021-2025 جىلدارعا ارنالعان كاسىپكەرلىكتى دامىتۋ جونىندەگى ۇلتتىق جوبا» باعدارلاماسى بويىنشا «دامۋ» قورىنان نەسيە سوماسىنىڭ 50 پايىزىنا كەپىلدىك تۇرىندە قولداۋ الدى.
– ءبىز «دامۋ» قورىمەن بۇرىننان تىعىز قارىم-قاتىناستا جۇمىس ىستەيمىز. سۋبسيديالاۋ مەن كەپىلدىك تەتىكتەرىن پايدالانىپ كەلەمىز. سۋبسيديالانعان نەسيە ارقىلى وزىمىزگە كەرەكتى اپپاراتتار ساتىپ الدىق. قاراماعىمىزدا بىرنەشە زاۋىت بار. سونىڭ بىرىندە جاڭا ءونىم شىعارۋ ءۇشىن تەحنيكا جەتكىزدىك. «Altynarna Geosynthetic» كومپانياسى تۇتىنۋشىلارعا حالىقارالىق ستاندارتتارعا سايكەس كەلەتىن ساپالى جانە سەنىمدى گەوسينتەتيكالىق ماتەريالداردى ۇسىنادى. سونىمەن قاتار ءارتۇرلى ينجەنەرلىك جانە قورشاعان ورتانى قورعاۋ جوبالارى ءۇشىن وڭتايلى شەشىمدەردى ازىرلەۋگە كومەكتەسۋ ارقىلى ءوز تۇتىنۋشىلارىنا كەڭەس بەرەدى جانە تەحنيكالىق قولداۋ كورسەتەدى, – دەيدى «Altynarna Geosynthetic» جشس قۇرىلتايشىسى رەنات مينحايروۆ.
«Altynarna Geosynthetic» جشس – جوعارى ساپالى گەوسينتەتيكالىق ماتەريالداردى وندىرۋگە جانە جەتكىزۋگە ماماندانعان جەتەكشى كومپانيانىڭ ءبىرى. گەوسينتەتيكا – قورشاعان ورتانى قورعاۋ, توپىراقتىڭ گەوتەحنيكالىق قاسيەتتەرىن جانە ينجەنەرلىك قۇرىلىمداردىڭ بەرىكتىگىن جاقسارتۋ ءۇشىن قولدانىلاتىن زاماناۋي ماتەريال. «Altynarna Geosynthetic» گەومەمبرانا شىعارادى.
«بۇل – گيدرووقشاۋلاۋ, ىلعال مەن حيميالىق زاتتاردىڭ ەنۋىنە جول بەرمەۋ ءۇشىن قولدانىلاتىن پلاستيكالىق پوليمەرلى پلەنكا. گەوتەكستيل بولسا, توپىراقتى نىعايتۋ, سۋدى ءسۇزۋ جانە ەروزيانى بولدىرماۋ ءۇشىن قولدانىلاتىن ماتەريال. ال گەوتور – توپىراقتى نىعايتۋ, بەتكەيلەردىڭ تۇراقتىلىعىن قامتاماسىز ەتۋ جانە توپىراقتىڭ جىلجۋىن بولدىرماۋ ءۇشىن قولدانىلادى», دەيدى كاسىپورىن باسشىسى.
كەپىلدىكتەن بولەك «دامۋ» قورى كاسىپكەرلەرگە نەسيە العاندا پايىزىن جەڭىلدەتىپ قولداۋ كورسەتەدى. بيىلعى بۇل كورسەتكىش 7 پايىزدى قۇراپتى. «شاعىن جانە ورتا كاسىپكەرلىك سۋبەكتىلەرىن وڭىرلىك قارجىلاندىرۋ» باعدارلاماسى اياسىندا «كاسىپكەر» جوباسىمەن كومەككە يە بولعان «Invictus Karaganda» جشس سپورت كلۋبى بۇگىندە وركەن جايعان.
– «Invictus Karaganda» جشس – ۇلكەن سپورتتىق ناتيجەلەردى دامىتۋعا جانە قول جەتكىزۋگە ارنالعان الاڭ. ءبىز 2023 جىلدىڭ اقپان ايىندا اشىلدىق. «دامۋ» قورىنان 50 ملن تەڭگە نەسيە الدىق. بۇل قاراجاتتى فيتنەسكە ارنالعان زاتتارعا جۇمسادىق. وسى زالداعى ترەناجەرلەردىڭ ءبىرازى سول اقشاعا الىندى. «Invictus» اتاۋى لاتىن تىلىنەن اۋدارعاندا «جەڭىلمەيتىن» دەگەندى بىلدىرەدى. كلۋب سپورتتىڭ ءار سالاسىندا ءارتۇرلى جاتتىعۋ مەن باعدارلامانى ۇسىنادى. ءار سپورتشىعا كاسىبي قولداۋ كورسەتەدى, ولاردىڭ جەتىستىككە جەتۋىنە اتسالىسادى. مۇندا ارنايى ماماندار جۇمىس ىستەيدى. جيىرمادان استام جاتتىقتىرۋشىمىز بار, – دەيدى «Invictus Karaganda» جشس باسشىسى دميتري بەردنيكوۆ.
«دامۋ» قورىنىڭ قولداۋىن سەزىنگەن كوپ بيزنەس مەكەمەلەرىنىڭ ەكەۋى – وسى. قور قۇرىلعان كەزدەن باستاپ, ەلدە جالپى نەسيە سوماسى 11,4 ترلن تەڭگە بولاتىن 197 مىڭعا جۋىق بيزنەس-جوبانى قولداعانىن ايتادى ايماقتىق فيليال ديرەكتورى اسەت تىلەمىسوۆ.
– كاسىپكەرلىكتى ىنتالاندىرۋ ەل ەكونوميكاسى دامۋىنا ىقپال ەتەدى. مەملەكەت تاراپىنان قولداۋ كورسەتۋدىڭ ناتيجەسىندە وتاندىق تاۋارلار مەن قىزمەتتەر ءوندىرىسى دامىپ, حالىقتى جۇمىسپەن قامتىپ, تاۋار يمپورتى ازايا باستادى, – دەيدى ايماقتىق فيليال ديرەكتورى اسەت تىلەمىسوۆ.
بيزنەستى قولداۋ جانە دامىتۋ باعدارلامالارى ىسكە قوسىلعان كەزدەن بەرى, وبلىستا كاسىپكەرلەردىڭ 356 ملرد تەڭگە بولاتىن 5 974 جوباسى سۋبسيديالانىپ, 3 424 جوبا «دامۋ» قورىنان 48 ملرد تەڭگەلىك كەپىلدىك العان.
– ال بيىلعى جىلدىڭ باسىنان بەرى 393 جوبا 24 ملرد تەڭگەگە سۋبسيديالانسا, 349 جوبا 5,3 ملرد تەڭگەلىك كەپىلدىك الدى, – دەيدى فيليال ديرەكتورى.
جاقىندا قور وبلىستاعى كاسىپكەرلەردى جەڭىل نەسيەمەن قارجىلاندىرۋ ماقساتىندا «كاسىپكەر» اتتى وڭىرلىك باعدارلامانى ىسكە قوستى. وسى باعدارلاما اياسىندا «تسەنتركرەديتبانككە» 200 ملن تەڭگە سالىنىپتى. ول قارجىنى باعدارلاما شارتتارى بويىنشا قاراعاندى وبلىسىندا بيزنەسىن تىركەپ, جۇمىس ىستەپ جاتقان شاعىن جانە ورتا بيزنەس وكىلدەرى جەڭىلدەتىلگەن نەسيە رەتىندە الادى. ءبىر كاسىپكەرگە 50 ملن تەڭگەگە دەيىن بەرىلەدى. نەسيە – ينۆەستيتسيا, اينالىم قاراجاتىن تولىقتىرۋعا جۇمسالۋعا ءتيىس. نەسيە مەرزىمى – 5 جىلعا دەيىن. جىلدىق مولشەرلەمەسى – 7%. مۇنداي جەڭىل نەسيە الۋ ءۇشىن كاسىپكەر ەكونوميكانىڭ باسىمدىق بەرىلگەن سالالارىندا قىزمەت ەتۋگە ءتيىس دەگەن تالاپ بار.
قاراعاندى وبلىسى
