ەستۋىمىز بار, ونەر كوشىندە جۇرگەن اعالار جاقسىگەلدى كەمالوۆقا «مۇز جارعىش كەمە» دەگەن اتاق بەرىپتى. نەگە دەسەڭىز, سەكسەنىنشى جىلدارى قازاقتىڭ كلاسسيكالىق ءانىن جاڭا بەلەسكە شىعارعان دارىنداردىڭ ءبىرى – جاقان سەرى. ول ءبىرجان سال, اقان سەرىلەردىڭ بۇگىنگى جالعاسى.
سول جاقاڭ كەشتىڭ شىمىلدىعىن سۇڭقار ساكەننىڭ «تاۋ ىشىندە» انىمەن ءتۇردى. ساڭلاق ساكەننىڭ ءانىن اسەرلى ورىنداعاندا قادىرمەندى تىڭدارمان قاۋىم قوشەمەت قىلدى. «قىزىل اسىق» شىرقالعاندا كەڭ زالدىڭ ءىشىن ءتىپتى, قيقۋ باستى. دومبىرا دا شەبەر شەرتىلە ءتۇستى, ءانشى دە داۋىسىن جايقالتا اۋەلەتتى. اقجارما تىلەكتىڭ كوشىن وبلىس اكىمىنىڭ ورىنباسارى باۋىرجان اسانوۆ باستادى.
– ءسىز كەشەگى دالانىڭ قاسيەتىن بويىنا سىڭىرگەن كوشپەندىنىڭ رۋحىن شارىقتاتىپ جۇرگەن دارا تۇلعاسىز. ءبۇتىن ەلگە قۇرمەتتىسىز. وزىندىك مەكتەپ قالىپتاستىرعان ۇستازسىز. جاساي بەرىڭىز, – دەدى باۋىرجان قوڭىرباي ۇلى.
كەشكە ارنايى كەلگەن پارلامەنت ءماجىلىسىنىڭ دەپۋتاتتارى امانجول التاەۆ پەن جاناربەك ءاشىمجان دا جىلى لەبىزدەرىن ءبىلدىردى.
كەش بارىسىندا انشىگە «جاڭاارقا اۋدانىنىڭ قۇرمەتتى ازاماتى» اتاعى تابىستالدى.
– جاقان اعا, تۋعان توپىراعىڭىز سىزبەن ارقاشان ماقتانادى. كەشەگى سەرىلەردىڭ, دۇلدۇلدەردىڭ جالعاسىسىز. وسى اتاقتى تابىستاۋ مارتەبەسى ماعان بۇيىردى. اۋىلداعى ەلدىڭ ىقىلاسىن, سالەمىن قابىل الىڭىز, – دەدى جاڭاارقا اۋدانىنىڭ اكىمى قانات قوجىقاەۆ.
كەشتە اباي اتىنداعى مەملەكەتتىك سىيلىقتىڭ لاۋرەاتتارى سەرىك اقسۇڭقار ۇلى مەن عالىم جايلىباي لەبىزدەرىن ولەڭمەن جەتكىزدى.
كەشتى كەمەلىنە كەلتىرە جۇرگىزگەن اقىن, فيلولوگيا عىلىمدارىنىڭ دوكتورى, پروفەسسور قويلىباي اسانوۆ:
– مادەنيەت سارايىنىڭ الدىڭعى قاتارىندا ابىز اقساقال جايىق بەكتۇروۆ وتىرۋشى ەدى. سول جاكەڭ اقساقال جاقسىگەلدىنى ساحنادان تۇسىرمەيتىن. كۇش-قۋاتى تايا باستاعان ءالسىز قولىن قايتا-قايتا كوتەرىپ: ء«اي, جاقان, «ەدىل مەن جايىقتى» شىرقاشى» دەپ قوڭىر ۇنىمەن قارلىعا داۋىستايتىن. قوڭىر دومبىرا كۇمبىرلەپ سالا بەرەدى. كوز الدىڭىزعا جايىقتى جاعالاپ كەلە جاتقان تولەگەننىڭ بوز جورعاسى ەلەستەيتىن. اسىرەسە جاقاڭ ءاندى باستاماس بۇرىن دومبىراسىن جورعالاتا شەرتىپ, تىڭداۋشىنىڭ جۇرەگىن ەرىكسىز باۋراپ الاتىن, – دەيدى.
ءانشىنىڭ شاكىرتتەرى شوقتىعى بيىك كلاسسيكالىق اندەردى شىرقادى. كەشىنىڭ نۇكتەسىن تاتتىمبەت اتىنداعى اكادەميالىق قازاق حالىق اسپاپتارىنىڭ وركەسترى قويدى.
قاراعاندى وبلىسى
