كسرو حالىق ءارتىسى شاكەن ايمانوۆتىڭ ەسىمىن تۋعان جەرىنىڭ حالقى ءاردايىم ارداقتايدى. قازاقتىڭ ماڭدايىنا بىتكەن جارىق جۇلدىزىنىڭ اتىندا وبلىستا كينوتەاتر, كوشەلەر, مەكتەپ بار. وسىدان ءبىراز جىل بۇرىن باياناۋىلدىڭ قاق ورتاسىنان تۇلعاعا ۇلكەن ەسكەرتكىش-كومپوزيتسيا ورناتىلسا, ەندى مىنە ءبيۋستى اشىلىپ وتىر.
ۇيىمداستىرۋشىلاردىڭ ايتۋىنشا, شاكەن ايمانوۆ اتىنداعى مەكتەپ-ينتەرناتتىڭ اۋماعىندا ورناتىلعان بيۋست بەلگىلى رەجيسسەردىڭ كەلەر جىلى اتاپ وتىلەتىن 110 جىلدىق مەرەيتويىنا ارنالعان مەرەكەلىك ءىس-شارالاردىڭ باستاۋى. زيالى قاۋىم وكىلدەرى مەن جەرگىلىكتى جۇرت اشىلۋ سالتاناتىندا مۇسىنگە گۇل شوقتارىن قويدى. ءبىلىم ورداسىنىڭ تۇلەگى, ايتىسكەر اقىن اسپانبەك شۇعاتاەۆ جىردان شاشۋ شاشىپ, ارناۋ ايتتى.
ءبيۋستى جاساۋعا «ەدىگە شوڭ» جاۋاپكەرشىلىگى شەكتەۋلى سەرىكتەستىگى قارجىلاي كومەك كورسەتكەن. بيىكتىگى – 3,25 مەتر, تۇعىرى ءبۇتىن گرانيت تاستان جاسالعان. اۆتورى – اسقار نارتوۆ. ول ايگىلى جەرلەسىمىزدىڭ بۇعان دەيىنگى ەسكەرتكىشىن دە قۇيىپ شىققان ەدى.
جەرلەستەرى شاكەن ايمانوۆتىڭ مەرەيتويىنا وراي وبلىس ورتالىعىندا ەسكەرتكىش اشىلسا دەگەن تىلەك تانىتىپ وتىر.
پاۆلودار وبلىسى,
باياناۋىل اۋدانى
