«بۇگىندە ەكى ەلدىڭ ءتۇرلى سالاداعى ىنتىماقتاستىعى جاڭا دەڭگەيگە كوتەرىلىپ كەلەدى. فرانتسيا قازاقستاننىڭ ەۋروپاداعى وتە ماڭىزدى جانە سەنىمدى سەرىكتەسى. وتكەن جىلى ءوزارا تاۋار اينالىمى 30 پايىزعا ارتىپ, 4 ملرد دوللارعا جەتتى», دەدى قاسىم-جومارت توقاەۆ فرانتسيا پرەزيدەنتى ەممانۋەل ماكروننىڭ قازاقستانعا ساپارى اياسىندا.
مەملەكەت باسشىسىنىڭ ايتۋىنشا, وسى جىلدىڭ سەگىز ايىندا ەكىجاقتى تاۋار اينالىمىنىڭ كولەمى وتكەن جىلمەن سالىستىرعاندا 21 پايىزعا ارتىپ, 2,7 ملرد دوللارعا جەتكەن.
«بۇعان دەيىن فرانتسيا قازاقستانعا 18,7 ميلليارد دوللارعا جۋىق ينۆەستيتسيا سالعان. بىرلەسكەن جوبالار ەنەرگەتيكا, بەيبىت اتوم ەنەرگەتيكاسى, تاۋ-كەن جانە حيميا ونەركاسىبى, ماشينا جاساۋ, قۇرىلىس ماتەريالدارى ءوندىرىسى, اەروعارىش, فارماتسەۆتيكا جانە باسقا دا سالالارعا قاتىستى. بۇدان بولەك, باسقا دا بىرقاتار ماڭىزدى جوبالاردى جۇزەگە اسىرۋ جوسپارلانىپ جاتىر. بۇل جوبالار بۇگىن وتەتىن قازاقستان-فرانتسيا بيزنەس فورۋمىندا جان-جاقتى تالقىلانادى», دەپ قوستى ق.توقاەۆ.
