زاڭ جوبالارىندا پرەزيدەنتتىڭ جولداۋىن جانە سايلاۋالدى باعدارلاماسىن, سونداي-اق پارتيانىڭ سايلاۋالدى باعدارلاماسىن ىسكە اسىرۋ ەسكەرىلدى. دەپۋتاتتار جيىندى كوستەنكو اتىنداعى شاحتادا قازا تاپقان كەنشىلەردى ءبىر مينۋت ۇنسىزدىكپەن ەسكە الۋمەن باستادى.
وتىرىستى اشقان فراكتسيا جەتەكشىسى ەلنۇر بەيسەنباەۆ دەپۋتاتتار مەملەكەتتىڭ حالىق الدىنداعى الەۋمەتتىك مىندەتتەمەلەرىن, ونىڭ ىشىندە جالاقى مەن زەينەتاقىنى يندەكستەۋ, جاردەماقىلاردى كوبەيتۋ, مەديتسينالىق كومەكتى قامتاماسىز ەتۋ سياقتى باسقا دا باسىمدىقتاردى ورىنداۋعا ەرەكشە نازار اۋدارعانىن اتاپ ءوتتى.
بۇدان سوڭ ءسوز العان پرەمەر-ءمينيستردىڭ ورىنباسارى – قارجى ءمينيسترى ەرۇلان جاماۋباەۆ رەسپۋبليكالىق بيۋدجەتتىڭ 2024 جىلعا ارنالعان شىعىستارى 24 ترلن تەڭگە دەڭگەيىندە دەپ بولجانىپ وتىرعانىن جەتكىزدى. ترانسفەرتتەردى ەسەپكە الماعاندا كىرىستەر كولەمى 16,1 ترلن تەڭگە بولادى دەپ جوسپارلانىپ وتىر.
«بيۋدجەت جوباسى مەملەكەت باسشىسىنىڭ جولداۋىن جانە سايلاۋالدى باعدارلاماسىن, سونداي-اق پارتيانىڭ سايلاۋالدى باعدارلاماسىن ورىنداۋ جونىندەگى جول كارتاسىن ىسكە اسىرۋدى ەسكەرە وتىرىپ جاسالدى. بۇل جۇمىس ۇكىمەتتىڭ ەرەكشە باقىلاۋىندا تۇر. ماجىلىسمەندەردىڭ تىكەلەي ارالاسۋىمەن 2,4 ترلن تەڭگەگە جۋىق قاراجات ماڭىزدىلىعىنا قاراي قايتا قاراستىرىلدى. بۇل وتە تىڭعىلىقتى ءارى جۇيەلى جۇمىس بولدى. وڭىرلەردى دامىتۋعا 2024-2026 جىلدارعا 7 ترلن تەڭگە قاراستىرىلعان», دەدى ۆيتسە-پرەمەر.
ەرۇلان جاماۋباەۆ بۇدان باسقا «اۋىلدا دەنساۋلىق ساقتاۋدى جاڭعىرتۋ» ۇلتتىق جوباسىن ىسكە اسىرۋعا 2,4 ترلن تەڭگە قاراستىرىلعانىن, 2025 جىلعا دەيىن 655 دەنساۋلىق ساقتاۋ نىسانىن سالۋ جانە 32 اۋدانارالىق اۋرۋحانانى جاڭعىرتۋ جوسپارلانعانىن ايتتى. «جايلى مەكتەپ» ۇلتتىق جوباسىنا 1,7 ترلن تەڭگە باعىتتالىپ, بۇل اقشا 369 مەكتەپتىڭ قۇرىلىسىنا جۇمسالادى.
ءماجىلىس دەپۋتاتى, فراكتسيا مۇشەسى مارحابات جايىمبەتوۆ بيۋدجەت جوباسىن ازىرلەۋ بارىسىندا حالىق قالاۋلىلارى مەملەكەتتىك ورگانداردان قوسىمشا مالىمەتتەر الۋ ءۇشىن 200-دەن استام ساۋال جولداعانىن جەتكىزدى. سونداي-اق دەپۋتاتتار 300-گە جۋىق تۇزەتۋ ەنگىزىپ, بۇل بيۋدجەتتىڭ شىعىس بولىگىن 1,4 ترلن تەڭگەگە قىسقارتۋعا مۇمكىندىك بەردى.
«بيۋدجەتتىڭ شىعىستارىن بيۋدجەت تاپشىلىعىن ۇلعايتۋ جانە ۇلتتىق قوردان بەرىلەتىن ترانسفەرتتەر ەسەبىنەن جابۋ ءۇردىسى ساقتالىپ وتىر. كەلەسى جىلى ۇلتتىق قوردان 3,6 ترلن تەڭگە, ونىڭ ىشىندە نىسانالى ترانسفەرت – 1,6 ترلن تەڭگە تارتۋ جوسپارلانۋدا», دەدى دەپۋتات.
ءماجىلىس سپيكەرى, «Amanat» پارتياسىنىڭ توراعاسى ەرلان قوشانوۆ ۇلتتىق قور قاراجاتىن ۇتىمدى جانە ءتيىمدى پايدالانۋدىڭ ماڭىزدىلىعىنا نازار اۋداردى.
«مەملەكەت باسشىسى ۇكىمەتكە ۇلتتىق قوردان ترانسفەرتتەردى قىسقارتۋدى جانە بيۋدجەت تاپشىلىعى ماسەلەسىن ۇنەمى ونىڭ قاراجاتى ەسەبىنەن شەشپەۋدى بىرنەشە رەت تاپسىردى. كىرىس بولىگىن تولىقتىرۋعا ارنالعان رەزەرۆ ماسەلەسىن ەكونوميكانىڭ بارلىق سەكتورىنداعى ءتيىمسىز شىعىنداردى وڭتايلاندىرۋ ارقىلى شەشۋ كەرەك. كەلەسى جىلدان باستاپ «ۇلتتىق قور – بالالارعا» باعدارلاماسى جۇمىس ىستەي باستايدى. ەندى ۇلتتىق قوردان اقشا ءبولۋ تۋرالى كەز كەلگەن اقپاراتقا تولەم الۋعا ۇمىتكەر بالالاردىڭ اتا-انالارى قاتتى نازار اۋدارادى. بۇل وتە سەزىمتال ماسەلە جانە وعان وتە مۇقيات قاراۋ كەرەك», دەدى ول.
ءماجىلىس توراعاسى قاراعاندىداعى قايعىلى وقيعا ونەركاسىپ قاۋىپسىزدىگىن قامتاماسىز ەتۋدەگى پروبلەمالاردىڭ تاعى دا بەتىن اشقانىن باسا ايتتى. ماسەلەنى شەشۋ ءۇشىن پارتيانىڭ سايلاۋالدى باعدارلاماسىندا قاۋىپسىزدىك تالاپتارىن بۇزعانى ءۇشىن جۇمىس بەرۋشىنىڭ جاۋاپكەرشىلىگىن كۇشەيتۋ, زياندى جانە قاۋىپتى وندىرىستەردە جۇمىس ىستەيتىن بارلىق قىزمەتكەردىڭ ءومىرى مەن دەنساۋلىعىن مىندەتتى ساقتاندىرۋ, سونداي-اق ەڭبەكتى قورعاۋ جونىندەگى ستاندارتتاردى جوعارىلاتۋ كوزدەلگەن. ەندى ۇكىمەت ءتيىستى قارجى ءبولۋدى ەسكەرە وتىرىپ, وسى شارالاردى ءىس جۇزىندە جۇزەگە اسىرۋعا ەرەكشە نازار اۋدارۋى كەرەك.
سونداي-اق پارتيا توراعاسى بيۋدجەت جوباسىن قاراۋ كەزىندە ازاماتتارعا بەرىلگەن ۋادەلەردىڭ ساپالى ورىندالۋىنا باسىمدىق بەرىلەتىنىن اتاپ ءوتتى.
«دەپۋتاتتار زاڭ جوباسىنا 1,7 ترلن تەڭگەنى قۇراعان ارنايى تۇزەتۋلەرگە ۇسىنىستار بەردى. بيىل ءبىز رەكوردتى جاڭارتتىق دەپ ايتا الامىز. بيۋدجەت قاراجاتى مەملەكەت باسشىسىنىڭ جولداۋىندا, پرەزيدەنتتىڭ سايلاۋالدى باعدارلاماسىندا جانە پارتيانىڭ سايلاۋالدى باعدارلاماسىندا بەلگىلەنگەن شارالاردى ۋاقتىلى جانە ساپالى ورىنداۋعا ارنالعان. بۇل ءبىزدىڭ ۇكىمەتپەن بىرگە حالىق الدىنداعى ورتاق جاۋاپكەرشىلىگىمىز», دەپ تۇيىندەدى ەرلان قوشانوۆ.
