فەدەراتسيا وكىلدەرى ءمالىم ەتكەندەي, بولات اقشولاقوۆتىڭ داۋىس بەرۋدەگى جەڭىسى قازاقستان ءۇشىن دە, يۋنەسكو-نىڭ الەمدىك كلۋبتىق قوزعالىسى ءۇشىن دە تاريحي ءسات بولدى. وتىرىس بارىسىندا كونگرەسكە قاتىسۋشى ەلدەر حالىقارالىق ۇيىمنىڭ باستامالارى مەن جوبالارىن ىسكە اسىرۋداعى ەلىمىزدىڭ بىرەگەي تاجىريبەسىن ەرەكشە اتاپ ءوتتى, سونداي-اق جاڭا باسشىنىڭ كەلۋىمەن دۇنيەجۇزىلىك فەدەراتسيانىڭ ودان ءارى تابىستى دامۋىنا ءۇمىت ارتتى.
«ناتيجەسىندە, قازاقستاندى سايلاۋ تۋرالى شەشىمدى كونگرەستىڭ كوپتەگەن قاتىسۋشى ەلدەرىنىڭ وكىلدەرى قولدادى, بۇل ءبىزدىڭ رەسپۋبليكامىزعا دەگەن سەنىمنىڭ جوعارى دەڭگەيىن جانە حالىقارالىق ارەناداعى ايتارلىقتاي ءرولى بار ەكەنىن راستايدى. بۇل ناتيجەگە قول جەتكىزۋ بارىسىندا قازاقستان رەسپۋبليكاسىنىڭ سىرتقى ىستەر مينيسترلىگى مەن قازاقستان رەسپۋبليكاسىنىڭ يۋنەسكو جانە يسەسكو ىستەرى جونىندەگى ۇلتتىق كوميسسياسىنىڭ تۇراقتى قولداۋى ماڭىزدى ءرول اتقاردى», دەلىنگەن فەدەراتسيا حابارلاماسىندا.
ايتا كەتۋ كەرەك, يۋنەسكو كلۋبتارىنىڭ قوزعالىسى 1947 جىلى جاپونيادا يۋنەسكو-نىڭ نەگىزگى باسىمدىقتارى مەن قۇندىلىقتارىن ازاماتتىق قوعام اراسىندا كەڭىنەن ناسيحاتتاۋ ماقساتىندا باستاۋ العان. بۇگىنگى تاڭدا بۇل قوزعالىس الەمنىڭ 90-عا جۋىق ەلىندە كەڭىنەن تارالىپ, 5000-عا جۋىق ۇيىمدى قامتيدى.
«قازاقستاندىق فەدەراتسيا ءۇشىن جاستار ارقاشان باسىمدىققا يە بولدى. وسىعان بايلانىستى, ءبىز بارلىق جيناقتالعان تاجىريبەنى ەنگىزۋدى جانە بۇكىل الەم بويىنشا يۋنەسكو كلۋبتىق قوزعالىسىنىڭ بولاشاق كوشباسشىلارىن دايارلاۋ ءۇشىن بەرىك نەگىز قالاۋدى ۇسىنامىز», دەپ اتاپ ءوتتى بولات اقشولاقوۆ.
بۇدان بۇرىن بولات اقشولاقوۆتىڭ باسشىلىعىمەن قازاقستاندىق ۇلتتىق يۋنەسكو كلۋبتارى فەدەراتسياسى ايتارلىقتاي ناتيجەلەرگە قول جەتكىزدى. بۇگىنگى تاڭدا فەدەراتسيا 190 كلۋبتى 17 000-نان استام بەلسەندى مۇشەسىن بىرىكتىرە وتىرىپ, 45-تەن استام ەلدىڭ قاتىسۋىمەن 550-گە جۋىق ءىس-شارانى ءساتتى ۇيىمداستىردى. سونىمەن قاتار 75 000-عا جۋىق قاتىسۋشىنى قامتىعان بىرەگەي حالىقارالىق جوبا – «The Planet of ART( جاستار فەستيۆالى ىسكە قوسىلدى.
دۇنيەجۇزىلىك فەدەراتسيانىڭ پرەزيدەنتى بولىپ سايلانعاننان كەيىن, يۋنەسكو-نىڭ جەر شارىنىڭ بارلىق ايماقتارىنداعى قاۋىمداستىقتارى مەن كلۋبتارىن نىعايتۋ جانە دامىتۋ, ولاردىڭ تانىمالدىعى مەن جەرگىلىكتى قاۋىمداستىقتارداعى ءرولىن ارتتىرۋ, جاڭا قاۋىمداستىقتار مەن كلۋبتاردىڭ سانىن كەڭەيتۋ قاجەتتىلىگى باسىم مىندەتتەر رەتىندە ايقىندالدى. دۇنيەجۇزىلىك فەدەراتسيانىڭ نەگىزگى باعدارلامالارىن بىرلەسىپ جۇزەگە اسىرۋ ءۇشىن يۋنەسكو جانە مۇشە مەملەكەتتەردىڭ ۇكىمەتتەرىمەن ىنتىماقتاستىقتى تەرەڭدەتۋگە دەگەن ۇمتىلىس ءبىلدىرىلدى.
