فوتو: ۇكىمەتتىڭ ءباسپاسوز قىزمەتى
ءاليحان سمايىلوۆ ەڭ الدىمەن ۇكىمەت اتىنان جانە جەكە ءوزىنىڭ اتىنان قازا تاپقانداردىڭ تۋىستارى مەن جاقىندارىنا قايعىرا كوڭىل ايتتى.
بۇدان كەيىن مينيسترلەر كابينەتىنىڭ مۇشەلەرى مارقۇم بولعان كەنشىلەردى ءبىر مينۋت ۇنسىزدىكپەن ەسكە الدى.
«بارلىق زارداپ شەككەندەرگە تەزىرەك ساۋىعىپ كەتۋىن تىلەيمىن. دەنساۋلىق ساقتاۋ مينيسترلىگى ەمدەلىپ جاتقان ءاربىر كەنشىنىڭ جاعدايىن باقىلاۋدا ۇستاسىن. قازا تاپقانداردىڭ وتباسىلارىنا قاجەتتى كومەك كورسەتىلىپ جاتىر. مەملەكەت باسشىسى ءتيىستى تاپسىرمالار بەردى», دەدى پرەمەر-مينيستر.
توتەنشە جاعدايلار ءمينيسترى سىرىم ءشارىپحانوۆ ءمالىم ەتكەندەي, 28 قازانعا قاراعان ءتۇنى كوستەنكو شاحتاسىندا 700 مەتر تەرەڭدىكتە ءورت شىعىپ, ودان كەيىن مەتان-اۋا قوسپاسى جارىلعان. وقيعا ورنىنا دەرەۋ كاسىبي اسكەريلەندىرىلگەن اۆاريالىق-قۇتقارۋ قىزمەتتەرىنىڭ رەسپۋبليكالىق ورتالىق شتابى قاراعاندى فيليالىنىڭ كۇشتەرى جۇمىلدىرىلدى.
اپات كەزىندە اۋىسىمدا 252 كەنشى بولعان, ونىڭ 5-ەۋىن قۇتقارۋ قىزمەتىنىڭ كۇشتەرىمەن تابىلىپ, جەر بەتىنە شىعارىلدى, 200-دەن استام ادام ءوز بەتىنشە كوتەرىلدى. ىزدەستىرۋ-قۇتقارۋ جۇمىستارى كەزىندە 45 كەنشىنىڭ ءمايىتى جانە الدىن الا بولجام بويىنشا 46-شى قازا تاپقان ادامنىڭ دەنە بولشەكتەرى تابىلدى.
ىزدەۋ جۇمىستارى ەلەكتر قۋاتىنىڭ بولماۋى, تاۋ-كەن قازبالارىنىڭ ۇزىندىعى جانە كوپتەگەن بۇزىلعان مەحانيزمدەردىڭ بولۋى سالدارىنان قيىنداعانى ايتىلدى. جەكەلەگەن سۋ باسقان قازبا ورىندارىنا قول جەتكىزۋ قيىن بولعان.
قازىرگى تاڭدا اشىق ءورت وشاقتارى جوق, گاز جاعدايى قالىپتى. شاحتا قىزمەتىن قالپىنا كەلتىرۋ ءۇشىن تاۋ-كەن قازبالارىن زەرتتەۋ جانە جەكەلەگەن ۋچاسكەلەردە سۋ سورۋ جۇمىستارى جۇرگىزىلىپ جاتىر.
اپات سەبەپتەرىن تەكسەرۋ شەڭبەرىندە ۇكىمەتتىك كوميسسيا مۇشەلەرى شاحتاعا ءتۇستى. ناتيجەسىندە وتە ماڭىزدى بۇزىلۋلار انىقتالدى: تاۋ-كەن قازبالارىندا شاحتا جابدىقتارى جىلجىپ كەتكەن, 15-تەن استام وقشاۋلاعىش بوگەتتەر مەن جەلدەتۋ قوندىرعىلارى قيراعان. تەرگەۋگە قازاقستاننان, جاقىن جانە الىس شەتەلدەردىڭ ساراپتامالىق ۇيىمدارى تارتىلدى.
ءوز كەزەگىندە قاراعاندى وبلىسىنىڭ اكىمى ەرماعانبەت بولەكپاەۆ بايانداما جاسادى.
ءاليحان سمايىلوۆ مەملەكەت باسشىسى كوستەنكو شاحتاسىندا كەنشىلەردىڭ قازا بولۋىنا بايلانىستى تەرگەۋ جۇمىستارىن جۇرگىزىپ, «ارسەلورميتتال تەمىرتاۋ» كومپانياسىمەن ينۆەستيتسيالىق ىنتىماقتاستىقتى توقتاتۋدى تاپسىرعانىن اتاپ ءوتتى.
«بيىل تامىز ايىندا دا «ارسەلورميتتال تەمىرتاۋدا» وسىنداي اپات ورىن العان بولاتىن. ول كەزدە 5 شاحتەر قازا تاپتى. كوپتەگەن ادام ولىمىنە اكەپ سوققان اپات وندىرىستەگى قاۋىپسىزدىك تالاپتارىنىڭ ساقتالماۋىمەن تىكەلەي بايلانىستى. بۇل – ءبىرىنشى كەزەكتە, كاسىپورىن باسشىلىعىنىڭ كىناسى», دەدى ول.
پرەمەر-مينيستر ولار كومپانيا جۇمىسىنان وزدەرىن شەتتەتىپ تاستاعانىن, مۇنداي ارەكەتسىزدىكتىڭ سالدارى بىرنەشە جىلدار بويى قايعىلى جاعدايلارعا اكەپ سوقتىرىپ كەلە جاتقانىن ايتتى.
«كومپانيا ءوز مىندەتتەمەلەرىن ورىنداعان جوق. قازىرگى تاڭدا, «ارسەلورميتتال تەمىرتاۋدا» كومپانياسىن قازاقستاننىڭ پايداسىنا بەرۋ راسىمدەرى اياقتالۋ ساتىسىندا», دەدى ۇكىمەت باسشىسى.
ونىڭ ايتۋىنشا, ارنايى كوميسسيا اپاتتىڭ سەبەپتەرىن جان-جاقتى تەكسەرىپ, وعان كىنالى ادامداردى انىقتاۋ جۇمىستارىن جالعاستىرادى.
«قاراعاندى وبلىسىنىڭ اكىمدىگى مەن توتەنشە جاعدايلار مينيسترلىگى اپاتتى جويۋ جونىندە شارالار قابىلداۋى ءتيىس. ەڭ باستىسى – قازا تاپقانداردىڭ وتباسىلارىنا بارلىق كومەكتى كورسەتىپ, زارداپ شەككەندەردىڭ دەنساۋلىقتارىن قالپىنا كەلتىرۋ. وسىنداي قيىن جاعدايدا ەشكىم دە نازاردان تىس قالمايدى», دەپ قورىتىندىلادى ءسوزىن ءاليحان سمايىلوۆ.
