ۆيتسە-مينيستر وتكەن جىلى قابىلدانعان قولدانىستاعى مەملەكەتتىك قولداۋ شارالارىنىڭ ارالىق قورىتىندىسىن جاريا ەتتى. اتاپ ايتقاندا, ەلىمىزدەگى وتباسىلىق ءتۋريزمدى ناسيحاتتايتىن «Kids go free» باعدارلاماسى بويىنشا بيىلعى 9 ايدا 1 800 بالا تەگىن ۇشىپ, 800 وتباسى ەل ىشىندە دەمالۋعا 80 ملن تەڭگە قارجىسىن ۇنەمدەگەن.
ە.ەركىنباەۆ ءتۋريزمدى دامىتۋ ءۇشىن قاجەتتى جاڭا ءىس-شارالاردى دامىتۋ جونىندەگى جوسپارلارىن دا ورتاعا سالدى. ياعني الداعى ۋاقىتتا تۋريستىك «كەش بەك» ەنگىزۋ, اكىمدىكتەرگە ەلدى مەكەندەردەن تىس جەرلەردە ينفراقۇرىلىم قۇرۋ بويىنشا قۇزىرەتتەر بەرۋ, تۋريستىك جوبالاردى جەڭىلدىكپەن كرەديتتەۋ مەرزىمدەرىن 10 جىلعا دەيىن ۇلعايتۋ, تۋريستىك برەندتى وسى جىلدىڭ سوڭىنا دەيىن بەكىتۋ, اۋىل شارۋاشىلىعى ماقساتىنداعى جەرلەردە تۋريزم نىساندارىن سالۋعا رۇقسات بەرۋ, گيدتەردىڭ قىزمەتىن تسيفرلاندىرۋ جانە ورنالاستىرۋ ورىندارىن جىكتەۋ جۇيەسىن جەتىلدىرۋ سياقتى بىرنەشە جوبانى ىسكە اسىرۋ جوسپاردا بار ەكەنىن جەتكىزدى.
«تۋريستەر سانىنىڭ ءوسۋى تۋربيزنەس ءۇشىن جاقسى تابىس كوزى بولماق. جارتى جىلدىڭ قورىتىندىسى بويىنشا قوناقۇيلەر 100 ملرد تەڭگە كولەمىندە پايدا تاپتى. بۇل وتكەن جىلمەن سالىستىرعاندا 30 ملرد-قا ارتىق. تۋربيزنەس دامىسا, سالىق تا كوپ تۇسەدى. جىل سوڭىنا دەيىن تۋريزمنەن ەل قازىناسىنا 400 ملرد تەڭگە سالىق تۇسەدى دەپ جوسپارلاپ وتىرمىز», دەدى ۆيتسە-مينيستر.
سپيكەر سىرتقى نارىقتاردا قازاقستاننىڭ تۋريستىك الەۋەتىن ىلگەرىلەتۋ بويىنشا جاڭا ماركەتينگتىك جوسپار قۇرىلىپ جاتقانىن مالىمدەدى. بۇعان قوسا ۇلتتىق تۋريستىك برەندتى ازىرلەۋ تۋرالى تاپسىرما بەرىلگەنىن, بۇل ماسەلە جان-جاقتى قاراستىرىلىپ جاتقانىن جەتكىزدى.
ء«بىرىنشى – ينفراقۇرىلىم. تۋريستىك ورىنداردا ينفراقۇرىلىم ماسەلەسى سىن كوتەرمەيدى. لوگيستيكا دا تولىقتاي شەشىلمەگەن. ەكىنشى – ساپالى تۋريستىك ونىمدەردىڭ ازدىعى. تسيفرلاندىرۋ ماسەلەسى دە بار. ءۇشىنشى – ساپالى مامانداردى وقىتۋ. ءتورتىنشىسى – ماركەتينگ پەن جارناما مۇمكىندىكتەرىنىڭ ازدىعى», دەدى ە.ەركىنباەۆ.
ونىڭ ايتۋىنشا, اتالعان ماسەلەلەردى جۇيەلى شەشۋ ءۇشىن بيىل ءتۋريزمدى دامىتۋدىڭ 2023-2029 جىلدارعا ارنالعان تۇجىرىمداماسى قابىلدانىپ, ماقساتتى كورسەتكىشتەر بەكىتىلدى. ونىڭ ىشىندە 2029 جىلعا دەيىن ىشكى تۋريستەر سانىن 9 ملن-عا, شەتەلدىك تۋريستەردى 4 ملن-عا جەتكىزۋ كوزدەلگەن. تۋريزم سالاسىنداعى مامانداردى 1,6 ەسە, ال ينۆەستيتسيا كولەمىن 2 ەسە ءوسىرۋدى قامتاماسىز ەتۋ كەرەك.
ءباسپاسوز جيىنى سوڭىندا ۆيتسە-مينيستر ەلىمىزدىڭ حالىقارالىق ارەنادا تانىلۋى بويىنشا جەتىستىكتەرىن اتاپ ءوتتى. تاياۋدا الماتى وبلىسىنداعى ساتى اۋىلى «ۇزدىك تۋريستىك اۋىل» اتالىمى اياسىندا حالىقارالىق تۋريستىك ۇيىم نۇسقاسى بويىنشا ۇزدىك دەپ تانىلعانىن حابارلادى.
