سۋرەتتى تۇسىرگەن – تىلەۋبەك شاياحمەت
سالتاناتتى ءىس-شاراعا وبلىس اكىمى ەرمەك كوشەرباەۆ قاتىسىپ, شىعىس جۇرتىن رەسپۋبليكا كۇنىمەن قۇتتىقتادى, ەل ەكونوميكاسىنىڭ وركەندەۋىنە, ۇلت رۋحانياتىنىڭ نىعايۋىنا ايرىقشا ۇلەس قوسقان ازاماتتاردى ماراپاتتادى.
– 1990 جىلى 25 قازاندا قازاقستاننىڭ ەگەمەندىگى تۋرالى دەكلاراتسيا قابىلداندى. بۇل – تاۋەلسىزدىگىمىزدىڭ باستى قۇجاتى. 2022 جىلى مەملەكەت باسشىسى قاسىم-جومارت توقاەۆتىڭ باستاماسىمەن رەسپۋبليكا كۇنى مەيرامى قايتا جاڭعىرتىلدى. بەرەكەلى بىرلىك پەن ىرىستى ىنتىماقتىڭ ارقاسىندا ەلىمىز تابىستى دامىپ كەلەدى. قازىر مەملەكەتتىلىگىمىزدىڭ جاڭا ءداۋىرى باستالدى. باستى مىندەت – حالىقتىڭ جاعدايىن ودان ءارى جاقسارتىپ, تابىسىن ارتتىرۋ. تۇركىستاندا وتكەن قۇرىلتايدا شىعىستاعى كاتونقاراعاي, مارقاكول اۋداندارىن قالپىنا كەلتىرۋ تۋرالى شەشىم قابىلدادى. بۇل – شەكارالىق ايماقتاردى دامىتىپ, ۇلتتىق قاۋىپسىزدىكتى نىعايتۋ ءۇشىن ماڭىزدى قادام. مەرەيلى مەرەكە قارساڭىندا تاۋەلسىز قازاقستاننىڭ دامۋىنا ەرەكشە ۇلەس قوسقان جاندارعا قۇرمەت كورسەتەمىز, – دەپ جىلى لەبىزىن بىلدىرگەن وبلىس اكىمى ەرمەك بەدەلباي ۇلى جەمىستى ەڭبەك ەتكەن ازاماتتارعا «پاراسات», «قۇرمەت», «ەڭبەك داڭقى» وردەندەرىن, «ەرەن ەڭبەگى ءۇشىن», «شاپاعات» مەدالدارىن تابىس ەتتى.
ەل ءۇشىن ولشەۋسىز ەڭبەك ەتىپ, كەۋدەسىنە جارقىراتىپ توسبەلگى تاعىنعانداردىڭ قاي-قايسىسى دا ماراپاتقا لايىق. ءبىرى ءبىلىم بەرسە, ەندى ءبىرى – ادام جانى ءۇشىن اراشا ءتۇسىپ جۇرگەن اق جەلەڭدى ابزال جاندار.
– ايتۋلى مەرەكە كۇنى قارساڭىندا ازدى-كوپتى ەڭبەگىم باعالانىپ, ماراپاتتالىپ جاتقانىما قۋانىشتىمىن. بۇل ماراپات بۇگىنگە دەيىنگى جۇمىستىڭ جەمىسى, ۇجىمنىڭ جەڭىسى دەپ بىلەمىن. كورسەتىلگەن قۇرمەت ماعان عانا ەمەس, بۇكىل وبلىستىق دەنساۋلىق ساقتاۋ باسقارماسىنا تيەسىلى. مەرەكەمىز قۇتتى, ەل ىرگەسى تىنىش بولسىن, – دەيدى «شاپاعات» مەدالىمەن ماراپاتتالعان وبلىستىق كوپسالالى ونكولوگيا جانە حيرۋرگيا ورتالىعىنىڭ ديرەكتورى گۇلميرا ساعيدۋللينا.
سونىمەن قاتار مەرەكەلىك ءىس-شارادا ءار سالادا ايانباي ەڭبەك ەتكەن بىرنەشە ازاماتقا «شىعىس قازاقستان وبلىسىنىڭ قۇرمەتتى ازاماتى» اتاعى بەرىلدى. ولاردىڭ اراسىندا تۇركى الەمى جازۋشىلار وداعىنىڭ توراعاسى, مەملەكەتتىك سىيلىقتىڭ لاۋرەاتى, اقىن ۇلىقبەك ەسداۋلەت تە بار.
وسىلايشا, ەل ەگەمەندىگى جولىندا تەر توككەن ازاماتتار ماراپاتتالىپ, ونەرپازدار ءان-كۇيدەن شاشۋ شاشتى. اۋەلى ساحنا تورىندە كىشكەنتاي بالدىرعاندار «تۋعان جەرىم مەنىڭ, قازاقستانىم» دەپ, ءانۇراندى شىرقادى. سودان كەيىن پاتريوتتىق اندەر توگىلدى. شىعىستىڭ كۇمىس كومەي ءانشىسى يۋليا فۋرمان «قازاق ەلى وسىنداي» دەپ شىرقاسا, «VOICE» كۆارتەتى «وتان» ءانىن ورىندادى.
سونداي-اق مەرەكەلىك كەشكە جينالعان مەيماندار «اباي الەمى» كىتاپ كورمەسى مەن ارحەولوگيالىق قازبا جۇمىستارىنان شىققان قۇندى ەكسپوناتتاردى تاماشالادى. كىتاپحاناشىلاردىڭ ءتول مەرەكەسى رەسپۋبليكا كۇنىمەن تۇسپا-تۇس كەلگەندىكتەن بولسا كەرەك, كىتاپ كورمەسىنە ەرەكشە نازار اۋدارىلدى. ايتا كەتسەك, بيىل وبلىستىق بيۋدجەتتەن قالالىق, اۋداندىق جانە اۋىلدىق كىتاپحانالاردىڭ قورىن تولىقتىرۋعا, جاڭارتۋعا 24 ملن تەڭگە قارجى ءبولىنىپ, جاڭا كىتاپتار ساتىپ الىندى. سونىمەن قاتار جىل سايىن وبلىس كىتاپحانالارى «اباي الەمى» كىتاپ سەرياسى جوباسى اياسىندا جارىق كورگەن ادەبيەتتەرمەن تولىقتىرىلىپ وتىرادى. ەسەپ-قيساپقا كوز سالساق, 2018-2023 جىلدار ارالىعىندا بارلىعى 95 كىتاپ باسىلىپ شىعىپتى. 2018 جىلى جوبانىڭ ءبىرىنشى توپتاماسىندا اباي مەن شاكارىمنىڭ تۋىندىلارى جارىق كوردى. سونداي-اق وعان فەدور دوستوەۆسكيدىڭ سەمەيدە ءومىر سۇرگەن جىلدارى تۋرالى شىعارمالار مەن امىرە قاشاۋباەۆتىڭ 130 جىلدىعىنا ارنالعان تاريحي دەرەكتەر ەندى. سونداي-اق بيىل جازۋشى, دراماتۋرگ, جۋرناليست ورالحان بوكەيدىڭ تۋعانىنا 80 جىل جانە حالىق قاھارمانى قاسىم قايسەنوۆتىڭ تۋعانىنا 105 جىل تولدى. سوندىقتان بيىلعى جيناقتا ورالحان بوكەيدىڭ تاڭداۋلى درامالارى مەن قاسىم قايسەنوۆتىڭ پوۆەستەرى جيناقتالعان.
حالىقتى ءبىر سەرپىلتكەن سالتاناتتى شارا سوڭىندا زور قۇرمەتكە بولەنگەن ازاماتتاردىڭ قۇشاعى گۇلگە تولىپ, تارقاسىپ جاتتى.
شىعىس قازاقستان وبلىسى
