– تالعات ساعىندىق ۇلى ءبىزدىڭ اۋىلدا 2014 جىلدان بەرى قىزمەت اتقارىپ كەلەدى. ناعىز حالىققا جاقىن پوليتسەي دەپ اتاۋعا لايىق ازامات. وسى ەلدىڭ مالى جوعالسا, سونى ىزدەپ تاپقانشا تىنىم تاپپاي ماڭايداعى اۋىلداردى شارلاپ كەتەدى. جالعىزباستى قاريالارعا كومەك كەرەك بولسا دا, بىرەۋدىڭ كولىگى جولدا قالىپ قويسا دا, جۇرتتىڭ ءبارى, ەڭ الدىمەن, تالعاتتى ىزدەيدى. ۇنەمى ەلدىڭ كوز الدىندا جۇرەدى. قىسىلتاياڭ شاقتا باتىل قيمىلداپ, بىرنەشە تۇرعىندى اجال اۋزىنان اراشالاپ الدى. ناعىز باتىر جىگىت, – دەيدى ميحايلوۆ اۋىلدىق وكرۋگىنىڭ اكىمى قايسار اۋباكىروۆ.
قىزمەتتىك بورىشىنا ادال ءتارتىپ ساقشىسىنىڭ اۋىل تۇرعىندارىن ءبىر ەمەس, بىرنەشە رەت اجال ارانىنان الىپ شىعىپ, ارتى اۋىر قايعىعا سوقتىرايىن دەپ تۇرعان وقىس وقيعالاردىڭ بەتىن قايتارعان كەزدەرى دە بولعان. مىسالى, بىلتىر 23 اقپاندا ادەتتەگىدەي تۇنگى مىندەتىن اتقارۋعا شىققان پوليتسيا مايورى تۇرعىن ۇيلەردىڭ ءبىرىنىڭ دالىزىنەن قويۋ ءتۇتىن بۋداقتاپ جاتقانىن بايقاپ قالادى. سول ماڭايدا تۇراتىن اندرەي ەۆچەنكو ەكەۋى جالما-جان الگى ءۇيدىڭ تەرەزەسىن قاعىپ, ىشتە الاڭسىز ۇيىقتاپ جاتقان تۇرعىنداردى وياتا باستايدى. ودان قايىر بولماعان سوڭ ەسىكتى سىندىرىپ ىشكە كىرگەن ۋچاسكەلىك پوليتسيا ينسپەكتورى قولقانى قاپقان كوك ءتۇتىن مەن جالاڭداپ جاڭا لاۋلاي باستاعان قىپ-قىزىل جالىننىڭ ىشىنەن ەكى زەينەتكەردى سىرتقا الىپ شىعادى.
قىسىلتاياڭ ساتتە جەدەل قيمىلداپ, ەكى بىردەي ءومىردى اجالدان اراشالاپ قالعان قايسار پوليتسەيدىڭ ەرلىك ءىسى جوعارعى باسشىلىققا دا جەتەدى. ارتىنشا ءبىر-ەكى ايدان كەيىن مايور قايمۋسين استاناعا شاقىرتىلىپ, ىشكى ىستەر ءمينيسترىنىڭ قولىنان «ەرلىگى ءۇشىن» مەدالىن الادى.
تالعات قايمۋسين بىلتىر قاقاعان قىستىڭ ورتاسىندا قۇدىققا قۇلاپ كەتكەن اۋىل تۇرعىنىن دا امان الىپ قالدى.
– تۇنگە قاراي جۇمىستان كەش كەلىپ, سۋ الىپ كەلۋگە قايتا سىرتقا شىققان بەتىم ەدى. قارسى الدىمنان جۇگىرىپ شىققان جەرگىلىكتى تۇرعىن ەۆگەني ودينوكوۆ الەكسەي ەسىمدى سەرىگىنىڭ قۇدىققا قۇلاپ كەتكەنىن ايتتى. جۇگىرىپ قۇدىقتىڭ باسىنا جەتتىك. تەرەڭدىگى 15 مەتر. ۇزىن تەمىر ارقان لاقتىرىپ ەدىك, تارتا بەرگەنىمىزدە شىداماي ءۇزىلىپ كەتتى. قۇدىقتىڭ ىشىندەگى سۋدىڭ تەرەڭدىگى شامامەن ەكى مەتردەي بولىپ قالادى. سودان الگى ارقاندى جالعاپ, الەكسەيگە قايتا لاقتىرىپ, «شاماڭ جەتكەنشە بەلىڭە مىقتاپ وراپ ال» دەدىم. تىم قۇرىعاندا مۇزداي سۋدىڭ بەتىنە الىپ شىعۋ كەرەك. الەكسەيدى اۋپىرىمدەپ ءجۇرىپ سۋدىڭ بەتىنە شىعاردىق. ەندى بەرى تارتايىق دەسەك, ءشىرىپ تۇرعان تەمىر ارقان ءۇزىلىپ كەتۋى مۇمكىن. سوندىقتان ەۆگەنيدى ءجىپ ارقانعا جۇمساپ, ول قايتا ورالعانشا سۋ بەتىندە ۇستاپ تۇردىم. ءجىپ ارقان كەلىسىمەن, الەكسەيدى ەكەۋلەپ ءجۇرىپ سەگىز مينۋتتىڭ ىشىندە قۇدىقتان شىعارىپ الدىق, – دەيدى ءتارتىپ ساقشىسى.
قوستاناي وبلىسى
