ءادىل, تازا تەرگەۋ ءجۇرىپ, كىنالى باسشىلار جاۋاپقا تارتىلۋى كەرەك. ويتكەنى كەشەگى لەنين, اباي كەنىشتەرىندەگى وقيعا كوپتىڭ جادىنان شىعا قويعان جوق. ءبىز بۇرىن قالا ىشىندەگى شاحتالاردا قاۋىپسىزدىك قاتاڭ ساقتالادى دەپ ويلايتىنبىز. مۇنىمىز بەكەر ەكەن. قازىر كەنىشتەگى باسقا دا شاحتەرلەردىڭ دەنەسى تابىلسا, ودان ءارى اپاتتىڭ سەبەپ-سالدارى تولىق زەردەلەنەدى. اپاتتىڭ نەدەن جانە قالاي بولعانى انىقتالادى.
ءيا, شاحتەرلەردىڭ الەۋمەتتىك احۋالى تۋرالى بۇعان دەيىن دە تالاي مارتە ايتقانبىز. سونى تۇسىنەتىندەر بولسا؟ شاحتادا جۇمىس ىستەۋدى ايتپاعاندا, ءبىر تۇسكەننىڭ ءوزى قاۋىپتى. ال كۇندە بارىپ جۇمىس ىستەۋ دەگەننىڭ قانداي بولاتىنىن كەنشىلەر بىلەدى. كەنشىلەر «جۇمىستىڭ ماشاقاتىن شاحتانى بىلمەيتىن, شاحتاعا تۇسپەگەن ادامدار تۇسىنبەيدى» دەپ دۇرىس ايتادى. جەر استىندا ەكىنىڭ ءبىرى جۇمىس ىستەي المايدى. مەن ءوزىم بىرنەشە شاحتاعا ءتۇسىپ, شاحتەرلەردىڭ جۇمىسىن كوردىم. سوندا بىزبەن بىرگە تۇسكەن كەيبىر ازاماتتاردىڭ تىنىسى تارىلىپ, ۇرەيلەنگەنىن بايقايتىنمىن. وسىعان دەيىن پرەزيدەنت جولداۋىندا شاحتەرلەر 55 جاسقا تولعاندا زەينەتكە شىعۋى كەرەك ەكەنىن ايتقان ەدى. مەنىڭ ويىمشا, ۇكىمەت وسى زاڭدى قايتا قارايتىن بولار. شاحتادا جاراقات الىپ, ارباعا تاڭىلعانداردىڭ تولەمىنە, سوسىن شاحتەرلەردىڭ زەينەتكە شىعۋىنا قاتىستى ماسەلەلەردى ەسكەرىپ, جوبا دايىنداپ, شۇعىل قارايتىن شىعار. پرەزيدەنت كەشەگى وقيعادان كەيىن ۇكىمەتكە ءتيىستى تاپسىرما جۇكتەگەنىن ايتتى. وسىدان سوڭ كوپ ۇزاماي ءتيىستى باعدارلاما قابىلداپ, پارلامەنتكە جىبەرىپ, جۇمىستى قارقىندى باستاۋ كەرەك. قالاي دەگەندە دە قانشاما كەنشى وسى جۇمىسپەن وتباسىن اسىراپ وتىر عوي. جۇمىس ورنىن دا كەشىكتىرمەي اشۋ قاجەت. ەندى كوپ ۇزاماي ۇكىمەتتەن قانداي شەشىمدەر قابىلداناتىنىن بىلە جاتارمىز.
ورتا ەسەپپەن جەردىڭ استىندا ەڭبەك ەتەتىن كەنشىلەر 450 مىڭ تەڭگە مولشەرىندە جالاقى الادى ەكەن. مۇندا ءار جۇمىسشىنىڭ تابىسى ەڭبەك وتىلىنە, ماماندىعىنا قاراي بەلگىلەنەتىنى بەلگىلى عوي. بىراق ورتاشا ەڭبەكاقىنىڭ كولەمىنە قاراپ, كەنشىلەردىڭ الىپ وتىرعان جالاقىسى كوپ دەپ ايتا المايمىن. وقيعادان كەيىن قۇرىلعان جەدەل شتاب قۇرامىندا ۇكىمەت مۇشەلەرى, جەرگىلىكتى اتقارۋشى ورگاندار, قۇقىق قورعاۋ ورگاندارىنىڭ قىزمەتكەرلەرى بار. كەشە تۇنگە دەيىن شتابتا وتىردىق. مۇمكىن اپاتتان امان قالعاندار تابىلار دەپ ۇمىتتەندىك. بىراق, وكىنىشكە قاراي, جاعداي ءبىز ويلاعانداي بولمادى. ازىرگە ءبىز قاراعاندىدامىز. ارىپتەسىمىز, ءماجىلىس دەپۋتاتى ارمان قالىقوۆ تا وسىندا. ول – سوندا ەڭبەك جولىن شاحتەر بولىپ باستاپ, باس ديرەكتورلىققا دەيىن كوتەرىلگەن ازامات. ەندى ۇكىمەت قانداي جوبا ازىرلەيتىنىن, پرەزيدەنتتىڭ تاپسىرماسى قالاي ورىندالاتىنىن كۇتەمىز. باستىسى, بۇل ماسەلە جەدەل ءارى ناقتى شەشىلۋى كەرەك دەپ ويلايمىن.
قۇدايبەرگەن بەكسۇلتانوۆ,
پارلامەنت ءماجىلىسىنىڭ دەپۋتاتى
