مۇنىڭ الدىنداعى ەكى تۋردا گريگوري بابايان شاكىرتتەرى س توبىنىڭ كوشباسشىلارى – حورۆاتيانىڭ «ديناموسى» مەن چەحيانىڭ «ۆيكتوريا» كوماندالارىمەن كەزدەسىپ, ەكى ويىندا دا جەڭىلىپ قالدى. ءسويتىپ, ەكى ماتچتا مۇمكىن بولعان التى ۇپايدان قاعىلعان «استانانىڭ» كەلەسى كەزەڭگە ءوتۋ كورسەتكىشى كۇرت تومەندەپ كەتكەن-ءدى. وسى سىرت الاڭدا «بالكانيمەن» وتەتىن ءۇشىنشى تۋر «استانانىڭ» بولاشاعىن ايقىنداپ بەرەتىن ماتچتىڭ ءبىرى ەدى. ويتكەنى جەرلەستەرىمىز بۇل ويىندا جەڭىسكە جەتەتىن بولسا, قورجىنعا تۇسكەن ءۇش ۇپايمەن بىرگە كەلەسى كەزەڭگە شىعۋ مۇمكىندىگىن دە تولىعىمەن ساقتاپ قالادى. ال قاتارىنان ءۇشىنشى ويىندا دا جەڭىلەتىن بولسا, وندا كەلەسى كەزەڭنەن كۇدەرىن ۇزەدى.
جانكۇيەرلەردىڭ قۋانىشىنا قاراي, «استانا» فۋتبولشىلارى ءۇشىنشى ماتچتا نامىستى قولدان بەرمەي, سىرت الاڭدا ماڭىزدى جەڭىسكە قول جەتكىزدى. «استانا» مەن «بالكاني» كوماندالارى ءبىر-بىرىمەن العاش رەت جاسىل الاڭدا جولىعىپ وتىر. بۇعان دەيىن ءتىپتى ەكى ەلدىڭ ۇلتتىق قۇرامالارى دا, وزگە كوماندالارى دا مۇلدەم كەزدەسپەگەن. سوندىقتان ەكى كلۋبتى دا ستاتيستيكا جاعىنان, مۇمكىندىگى تۇرعىسىنان دا سالىستىرا المايسىز. ال ەكى كلۋبتى ازىرگە دەيىن بايلانىستىرىپ تۇرعان جالعىز نارسە – ەكى كوماندا دا بيىلعى ەۋروكۋبوك ويىندارىندا بولگاريانىڭ «لۋدوگورەتس» كلۋبىنان جەڭىلىپ قالعان.
ماتچقا توقتالار بولساق, «استانا» مەن «بالكاني» اراسىنداعى باسەكە كوسوۆونىڭ پريشتينا قالاسىندا ورنالاسقان كوپسالالى «فاديل ۆوكري» ستاديونىندا ءوتتى. ەكى ۇجىم دا ءا دەگەننەن بىردەن ىسكە كىرىسىپ كەتتى. 16 مىڭ جانكۇيەرگە ارناپ سالىنعان ستاديوندا كورەرمەندەردىڭ قاراسى كوپ بولماسا دا, «بالكاني» جانكۇيەرلەر قولداۋىنان كەندە بولعان جوق. دەگەنمەن جەرلەستەرىمىز سىرت الاڭدا ويناپ جاتقانىنا قاراماستان كەزدەسۋدىڭ 7-مينۋتىندا ەسەپ اشىپ, تەلەەكران ارقىلى تاماشالاپ وتىرعان مىڭداعان جانكۇيەرىنە قۋانىش سىيلادى. گول اۆتورى – كامو وگانەسيان. «استانالىقتار» سوعىلعان گولعا شاتتانىپ ۇلگەرەمىن دەگەنشە, الاڭ يەلەرى ارادا ءبىر مينۋت وتكەندە قارىمتا شابۋىلدان گول سوعىپ, تارازى باسىن تەڭەستىردى. «بالكاني» ساپىنان ەدۆين كۋچ مەرگەندىگىمەن كوزگە ءتۇستى.
ويىننىڭ العاشقى ون مينۋتى اياقتالماي جاتىپ, كوماندالار جىلدام گول سوعىپ العاننان كەيىن جانكۇيەرلەر بۇل ويىندا گولداردىڭ كوپ بولاتىنىنان ءۇمىتتى ەدى. بىراق كوماندالار كورەرمەندەردىڭ ءۇمىتىن اقتاي الماسا دا, «استانا» كوپ ۋاقىت وتپەي «بالكاني» قاقپاسىنا ەكىنشى گولىن سوققاندا, ءۇمىتىن ۇكىلەپ وتىرعان كورەرمەندەردىڭ كوڭىل كۇيىن ءبىر كوتەرىپ تاستادى. ماتچتىڭ 23-مينۋتىندا تيمۋر دوسماعانبەتوۆتىڭ بۇرىشتامادان اۋەلەتە كوتەرگەن دوبىنا ابزال بەيسەبەكوۆ ءبىرىنشى جەتىپ, باسپەن «بالكاني» قاقپاسىن ءدال كوزدەدى. ەسەپ – 2:1. بۇل ەسەپ تەك ءبىرىنشى تايمنىڭ سوڭىنا دەيىن ەمەس, تورەشىنىڭ اقىرعى ىسقىرىعىنا دەيىن ساقتالىپ قالدى.
وسىلايشا, ەلوردالىق كوماندا توپتىق كەزەڭدەگى العاشقى جەڭىسىنە قول جەتكىزدى. «بالكاني» كومانداسى ەكىنشى تۋردا ءوز الاڭىندا حورۆاتيانىڭ «ديناموسىن» قابىلداپ, 1:0 ەسەبىمەن باسىم تۇسكەن ەدى. «استانا» العاشقى تۋردا «دينامودان» سىرت الاڭدا 5:1 ناتيجەسىمەن وڭباي جەڭىلىپ ەدى. ەندى اراعا ەكى اپتا سالىپ «بالكاني» ەلورداعا ساپار شەگەدى. بۇل ماتچ 9 قاراشا كۇنى «استانا ارەنا» ستاديونىندا وتەدى.
