بيىلعى سارى قۇرلىقتىڭ باستى باسەكەسىندە قازاقستان قۇراماسى ساپىنان 131 سپورتشى سىنعا ءتۇسىپ, ەل ابىرويىن ءساتتى قورعادى. ولار سپورتتىڭ 14 ءتۇرى بويىنشا جۇلدەگە تالاسىپ, جارىس قورىتىندىسىندا 8 التىن, 12 كۇمىس جانە 21 قولا مەدالدى ۇلتتىق قۇراما قورجىنىنا سالدى. وسىلايشا, وتانداستارىمىز 41 جۇلدەمەن جالپىكوماندالىق ەسەپتە ەڭ ۇزدىك 11 قۇراما قاتارىنان تابىلدى. بۇل – قازاقستان پاراازيا سپورتشىلارى ءۇشىن تاريحي كورسەتكىش. سونىمەن قاتار جارىس بارىسىندا سپورتشىلارىمىز ازيانىڭ – ءۇش, ازيا پارا ويىندارىنىڭ ءتورت رەكوردىن جاڭارتتى.
سالىستىرۋ ءۇشىن ايتار بولساق, وسىعان دەيىنگى ەڭ ۇزدىك ناتيجە بەس جىل بۇرىن يندونەزياداعى III پاراازيا ويىندارىندا تىركەلىپ, سپورتشىلارىمىز 33 مەدالمەن (5 التىن, 15 كۇمىس, 13 قولا) جالپىكوماندالىق ەسەپتە 13-ورىنعا تۇراقتاعان ەدى. جەرلەستەرىمىز بۇل جۇلدەلەردى ءپاراجۇزۋ, پارادزيۋدو, پاراپاۋەرليفتينگ, پارا جەڭىل اتلەتيكا, ۆولەيبولدى وتىرىپ ويناۋ جانە شاحمات باسەكەلەرىنەن جەڭىپ العان ەدى.
حانچجوۋداعى ءدۇبىرلى دودادا ەل سپورتشىلارى پاراكانوە, پاراپاۋەرليفتينگ, پارادزيۋدو, پارا جەڭىل اتلەتيكا, ءپاراجۇزۋ, پاراتاەكۆوندو, شاحمات, پاراۆەلوسپورت جانە ۆولەيبولدى وتىرىپ ويناۋ جارىستارىنان ءتۇرلى ءتۇستى جۇلدەلەردى قورجىنعا سالدى.
اتاپ ايتار بولساق, پاراپاۋەرليفتينگتە توكيو پاراليمپياداسىنىڭ جەڭىمپازى داۆيد دەگتيارەۆ ازيا پارا ويىندارىندا دا ۇزدىك شىعىپ, ەل قورجىنىنا العاشقى التىندى سالدى. 54 كگ سالماقتا ونەر كورسەتكەن وتانداسىمىز 186 كيلونى باعىندىرىپ, ازيا جانە ازيا پارا ويىندارىنىڭ رەكوردىن جاڭارتتى. ول توكيودا 174 كيلونى ەڭسەرگەن ەدى. سونىمەن قاتار تۇرسىناي قابىل (41 كگ) مەن راۋشان قويشىباەۆا (73 كگ) كۇمىسپەن كۇپتەلسە, گ ۇلىم قۇرمانباەۆا (45 كگ) مەن راحمەتجان حاماەۆ (88 كگ) قولا جۇلدەنى قانجىعاسىنا بايلادى.
پارادزيۋدو كۇرەسىندە دە وتانداستارىمىز تاماشا ناتيجە كورسەتتى. ءۇش بىردەي جەرلەسىمىز اقمارال ناۋاتبەك (45 كگ/ J2), ەرعالي شامەي (73 كگ/ J1) جانە ولجاس ورازالى ۇلى (73 كگ/ J2) بارلىق قارسىلاسىنان باسىم ءتۇسىپ, التىن تۇعىردان كورىندى. كۇمىس جۇلدەگە اسىلان نۇرداۋلەتوۆ (73 كگ/ J1), جانبوتا امانجول (-90 كگ/ J2), زارينا رايفوۆا (70 كگ/ J2) جانە ەرلان وتەپوۆ (+90 كگ/ J2) يە بولدى. ال باۋىرجان ارىستانبەك (-90 كگ/ J1), دايانا فەدوسوۆا (52 كگ/ J2), دينارا كۋدجۋلوۆا (70 كگ/ J1), عالىمجان سماعۇل ۇلى (-90 كگ/ J2), ەرلان قوڭقيەۆ (+90 كگ/ J2), تالعات اجعاليەۆ (+90 كگ/ J2) جانە ءانۋار ساريەۆ (60 كگ/ J2) قولا جۇلدەنى ەنشىلەدى. وسىلايشا, دزيۋدوشىلار جالپىكوماندالىق ەسەپتە ەكىنشى ورىنعا جايعاستى.
پارا جەڭىل اتلەتيكانىڭ يادرو لاقتىرۋ سايىسىندا سىنعا تۇسكەن داستان مۇقاشبەكوۆ التىن مەدال يەگەرى اتاندى. ول 15,74 مەتر ناتيجەسىمەن ازيا جانە ازيا پارا ويىندارىنىڭ رەكوردىن جاڭارتتى. سونداي-اق وسى ساناتتا باق سىناعان يۆان زەلەزنياك 12,39 مەتر كورسەتكىشپەن قولا مەدال جەڭىپ الدى.
پاراجۇزۋدەن نۇرداۋلەت جۇماعالي ەكى التىن جۇلدە ەنشىلەدى (100 مەتر براسس جانە 200 مەتر كەشەندى ءجۇزۋ). وعان قوسا 200 مەترگە كەشەندى جۇزۋدە ازيا پارا ويىندارىنىڭ رەكوردىن جاڭارتتى. سونىمەن قاتار دياس كەنجەبەك 100 مەتر قاشىقتىقتى 1:05:42 سەكۋندتا باعىندىرىپ, ازيا جانە ازيا پارا ويىندارىنىڭ رەكوردىن ورناتتى. ال ءنۇرالى سوۆەتقانوۆ 100 مەتر براسستا, رومان پوتاپوۆ 100 مەتر شالقالاپ جۇزۋدە جانە 4ح50 م ارالاس ەستافەتادا ونەر كورسەتكەن زۋلفيا گابيدۋللينا, سيازبەك داليەۆ, ناتاليا زۆياگينتسەۆا جانە ايسۇلتان قۇلقاەۆ قولا مەدال جەڭىپ الدى.
پاراكانوەدە بيبارىس سپاتاي KL2 جانە VL3 ساناتىندا قوس كۇمىستى قانجىعاسىنا بايلاسا, جالعاس تايكەنوۆ KL3 ساناتىندا كۇمىس جۇلدەگەر اتاندى. ال جاڭىل بالتاباەۆا KL3 ساناتى, ماكسيم بوگاتىرەۆ KL1 ساناتتارى بويىنشا قولا جۇلدەگە يە بولدى.
پاراتاەكۆوندودا نىشان ءومىرالى (80 كگ) مەن كاميلا دوسمالوۆا (57 كگ) كۇمىس جۇلدەگەر اتانسا, ءماريام سالىمگەرەەۆا (65 كگ), نۇرلان دونباەۆ (80 كگ) پەن اليشەر گاريپوللاەۆ (+80 كگ) قولا جۇلدەنى موينىندا جارقىراتتى. سونىمەن قاتار قۇرامىندا ءالىمجان اياپوۆ پەن سەرىك سولتانوۆ بار شاحماتتان ەرلەر كومانداسى قولا مەدال جەڭىپ السا, پاراۆەلوسپورتتا كەنجەعۇل سەيىتجان مەن ونىڭ پيلوتى انتون لاۆرەنتەۆ قولا جۇلدەگەر اتاندى. سونداي-اق جەكەلەي ۋاقىت ەسەبىندەگى باسەكەدە كەنجەعۇل ەل قورجىنىنا تاعى ءبىر قولا جۇلدەنى سالدى.
ۆولەيبولدى وتىرىپ ويناۋدا ۇلتتىق قۇراما سپورتشىلارى كۇمىس جۇلدەگە يە بولدى. سپورتشىلارىمىز جارتىلاي فينالدا الاڭ قوجايىندارى قىتاي قۇراماسىن 3:2 ەسەبىمەن جەڭىپ, فينالدا الەم جانە ازيا چەمپيونى يران سپورتشىلارىنا 3:0 ەسەبىمەن ەسە جىبەردى.
بيىلعى پاراازيا ويىندارىنا ازيانىڭ 43 مەملەكەتىنەن 4 مىڭعا جۋىق سپورتشى قاتىسىپ, سپورتتىڭ 22 تۇرىنەن جالپى سانى 564 مەدال (پاراليمپيادالىق سپورت تۇرىنەن – 490 جانە پاراليمپيادالىق ەمەس سپورت تۇرىنەن – 74) جيىنتىعىن ساراپقا سالدى. قازاقستان قۇراماسى بيىلعى دودادا پارا جەڭىل اتلەتيكا, بوچچا, پاراپاۋەرليفتينگ, شاحمات, ءپاراجۇزۋ, پاراۆەلوسپورت, پارادزيۋدو, پاراكانوە, ۆولەيبولدى وتىرىپ ويناۋ, پاراتاەكۆوندو, پارا ساداق اتۋ, پارا ۇستەل تەننيسى, اكادەميالىق ەسۋ جانە پارا وق اتۋ سياقتى سپورت تۇرلەرىنەن سىنعا ءتۇستى.
ايتا كەتەيىك, جازعى ازيا ويىندارىندا جۇلدە العان سپورتشىلار مەن ولاردىڭ جاتتىقتىرۋشىلارىنا بەرىلگەن اقشالاي ىنتالاندىرۋ سىيلىقاقىسىنان پارا سپورتشىلار دا قۇر قالمايدى. ياعني پاراازيادا چەمپيونى اتانعان سپورتشىعا مەملەكەت تاراپىنان 10 مىڭ دوللار, كۇمىس جۇلدەگەرگە – 5 مىڭ, قولا مەدال يەگەرىنە 3 مىڭ دوللار كولەمىندە قارجىلاي سىياقى تابىستالادى. سونىمەن قاتار التىن مەدال يەگەرىن جارىسقا دايىنداعانى ءۇشىن ونىڭ جاتتىقتىرۋشىسىنا – 5 مىڭ, كۇمىس جۇلدەگەردىڭ باپكەرىنە – 3 مىڭ جانە قولا جۇلدەگەردىڭ جاتتىقتىرۋشىسىنا 2 مىڭ دوللار كولەمىندە اقشالاي ىنتالاندىرۋ بەلگىلەنگەن.
