م.وتەمىس ۇلى اتىنداعى اكادەميالىق قازاق دراما تەاترىندا وتكەن جيىندا وبلىس اكىمى سەرىك شاپكەنوۆ ءوڭىر جۇرتشىلىعىن رەسپۋبليكا كۇنىمەن قۇتتىقتاپ, ءار سالانىڭ ۇزدىكتەرىنە ناگرادا تاپسىردى.
«بۇل تاريحي قۇجات ەل كونستيتۋتسياسى مەن زاڭدارىنىڭ ۇستەمدىگىن ايقىنداپ بەردى. ءبىز جاس بۋىنعا ەل تاريحىنداعى وسىنداي ايتۋلى كۇندەردىڭ باعاسى مەن ءمانىن ۇعىندىرۋمىز كەرەك. قوعامدا شىنايى دەموكراتيالاندىرۋ ۇدەرىسى ءجۇرىپ جاتقانىن ازاماتتاردىڭ ەركى مەن بوستاندىعىنىڭ قامتاماسىز ەتىلۋىنەن, ازاماتتىق قوعام قۇرا العانىمىزدان انىق اڭعارۋعا بولادى», دەدى سەرىك شاپكەنوۆ.
پرەزيدەنت جارلىعىمەن مەملەكەتتىك ناگرادا الىپ, مەرەيى وسكەندەردىڭ اراسىندا ەڭبەك ارداگەرلەرى مەن ءار سالادا ەڭبەك ەتەتىن جاندار بار. ولار – مۇنايلى ءوڭىردىڭ داۋلەتىن تاسىتىپ, ساۋلەتىن اسىرىپ جۇرگەن مەملەكەتتىك قىزمەتشىلەر, مۇنايشىلار, سپورتشىلار مەن مۇعالىمدەر, مەديتسينا قىزمەتكەرلەرى, اۋىل شارۋاشىلىعى, مادەنيەت پەن ونەر, ەنەرگەتيكا سالاسىنىڭ, باق وكىلدەرى. ماسەلەن, «پاراسات» وردەنىمەن ەڭبەك ارداگەرى ءمادينا عابدىسالىموۆا ماراپاتتالدى. ول پارتيا جۇمىسىندا شىڭدالىپ, كەيىن 1982-1991 جىلدارى وبلىستىق كاسىپوداقتار كەڭەسىنە جەتەكشىلىك ەتكەن. قاراپايىم ەڭبەك ادامىنىڭ مۇددەسىن قورعادى. تاربيەلىك, تالىمدىك ماڭىزى زور ءتۇرلى كوميسسيانى, قوعامدىق ۇيىمداردى, بەيبىتشىلىكتى قورعاۋ قورىن, وبلىستىق ايەلدەر كەڭەسىن باسقاردى. وبلىس اكىمى جانىنداعى وتباسى جانە دەموگرافيالىق ساياسات كوميسسياسىنىڭ كەڭەسشىسى رەتىندە ايەلدەردىڭ الەۋمەتتىك, تۇرمىستىق پروبلەمالارىن شەشۋگە ۇلەسىن قوسىپ كەلەدى.
ءار سالادا ىزدەنىسىمەن, ىسكەرلىگىمەن تانىلعان 9 ادام «قۇرمەت» وردەنىمەن ماراپاتتالدى. ماسەلەن, حالەل جامالوۆ العاشقى ەڭبەك جولىن قۇلسارى اۆتوكولىك كاسىپورنىنىڭ ەلەكتريگى رەتىندە باستاعان. كەيىن وڭتۇستىك ەمبى مۇناي بارلاۋ ەكسپەديتسياسىندا V ساناتتى ماشينيست, بۇرعىلاۋ شەبەرىنىڭ كومەكشىسى, ينجەنەرلىك-تەحنيكالىق قىزمەتتىڭ مەحانيگى بولعان. سوڭعى جىلدارى جىلىوي اۋدانىنىڭ اكىمى لاۋازىمىنا تاعايىندالعان ەدى. قازىر «گوريزونت» جشس باس مەنەدجەرى قىزمەتىن اتقارىپ ءجۇر.
جەرگىلىكتى سپورتشىلار اراسىندا اناتولي لىسياك جاتتىقتىرۋشى رەتىندە تانىمال. بۇقارالىق سپورتتى دامىتۋعا ۇلەس قوسىپ جۇرگەن ول اتىراۋ قالاسىنداعى ق.ساتباەۆ اتىنداعى №19 مەكتەپ-گيمنازياسىندا دەنەشىنىقتىرۋ پانىنەن ءدارىس بەرەدى. بۇعان قوسا, «اتىراۋ بارىستارى» باسكەتبول اكادەمياسىندا جاس ورەندەردى سپورتقا باۋلىپ ءجۇر. ونىڭ شاكىرتتەرى وبلىستىق, رەسپۋبليكالىق, حالىقارالىق دودالاردا جۇلدەگەر اتانعان.
سونداي-اق 3 جەرلەسىمىز ءىىى دارەجەلى «ەڭبەك داڭقى» وردەنىنىڭ, 2 مايتالمان «شاپاعات» مەدالىنىڭ يەگەرى اتاندى. «ەرەن ەڭبەگى ءۇشىن» مەدالى 19 ادامعا بەرىلدى. ولاردىڭ اراسىندا 40 جىلدان بەرى باق سالاسىندا ەڭبەك ەتىپ جۇرگەن تانىمال قالامگەر, «اتىراۋ-اقپارات» جشس باس ديرەكتورىنىڭ ورىنباسارى يساتاي بالماعامبەتوۆ تە بار. ەڭبەك جولىن 1983 جىلى قازىرگى وبلىستىق «اتىراۋ» گازەتىندە باستاعان. كەيىن «جاس الاش» باسىلىمىنىڭ باتىس وڭىردەگى مەنشىكتى ءتىلشىسى رەتىندە شىڭدالعان. قالامى قارىمدى جۋرناليست رەسپۋبليكالىق «التىن وردا» گازەتىنىڭ, سودان سوڭ 10 جىل وبلىستىق «اتىراۋ» گازەتىنىڭ باس رەداكتورى بولدى.
ءدال وسىنداي مەدالمەن ماراپاتتالعان «بىلينا» گازەتىنىڭ ءتىلشىسى لەۆ گۋزيكوۆ تا ءوڭىر شەجىرەسىنىڭ تۇزىلۋىنە ۇلەس قوسىپ جۇرگەن جان. ال يساتاي اۋدانىنداعى ج.مىرزاعاليەۆ اتىنداعى ورتا مەكتەپتىڭ مۇعالىمى ءتابيلا يسماعۇلوۆا وقۋشىلاردى ماتەماتيكا ءپانىنىڭ قىر-سىرىنا باۋليدى. وتىز بەس جىلدان بەرى ۇستازدىق ەتۋدەن جالىقپاعان پەداگوگ ءبىلىم ورداسىنىڭ ديرەكتورى دا, باسشىنىڭ ورىنباسارى دا بولىپ, ءوز تاجىريبەسىن ارىپتەستەرىمەن ۇنەمى ءبولىسىپ كەلەدى.
بۇل كۇنى م.وتەمىس ۇلى اتىنداعى اكادەميالىق قازاق دراما تەاترىنىڭ ءارتىسى عازيزا بيسەنوۆا قازاقستاننىڭ ەڭبەك سىڭىرگەن قايراتكەرى اتاندى. ءبىر توپ اتىراۋلىققا قازاقستان رەسپۋبليكاسىنىڭ قۇرمەت گراموتاسى بەرىلدى.
اتىراۋ وبلىسى
