«تاتۋلىقتى تۋ ەتكەن ەلىمىزدىڭ باعىندىرعان بەلەستەرى, العان اسۋلارى كوپ. بۇگىندە قازاقستان – ەڭسەسى بيىك, ەكونوميكاسى ورلەگەن, الەۋەتى ارتقان زاماناۋي مەملەكەت», دەگەن وبلىس اكىمى بىلتىردان بەرى قايتا تۇلەگەن ءوڭىردىڭ ەل قۋاتىن ەسەلەۋدەگى ورنى ەرەكشە ەكەندىگىنە توقتالدى.
– الماتى وبلىسى ەلىمىزدىڭ قۋاتىن ارتتىرۋدا ەرەكشە ورىن الادى. وتاندىق ەكونوميكالىق زەرتتەۋلەر ينستيتۋتى ءبىزدىڭ باستامامىزعا سايكەس الماتى وبلىسىنىڭ 2030 جىلعا دەيىنگى دامۋ ستراتەگياسىن ازىرلەدى. قوناەۆ قالاسىنىڭ باس جوسپارى بيىل بەكىتىلدى, ال كەلەسى جىلى وبلىس ورتالىعىنىڭ «جاڭا ىلە» الاڭىندا قۇرىلىس جۇمىستارى باستالادى. وندا اكادەميالىق قالاشىق, تەاتر, مۇراجاي, كىتاپحانا, كوپسالالى كلينيكالىق اۋرۋحانا, سپورت كەشەنى, شىعارماشىلىق ورتالىق, تەمىرجول ۆوكزالى, بوتانيكالىق باق جانە اباتتاندىرىلعان جاعالاۋ سالىنادى. قوناەۆ قالاسىنىڭ اۋماعى دا بەلسەندى دامىپ كەلەدى. «G4 City» جوباسىنىڭ ىسكە اسۋى ونى جاڭا دەڭگەيگە كوتەردى.
ۇلتتىق مەرەكەدە ەڭسەلى ەلىمىزدىڭ قۇت-بەرەكەسىن تاسىتىپ, ىنتىماق-بىرلىگىن جاراستىرىپ جۇرگەن ەڭبەك ارداگەرلەرى, اقساقالدار القاسىنىڭ مۇشەلەرى مەن ءتۇرلى باعىتتا قىزمەت ەتەتىن ماماندار ماراپاتتالدى.
اتاپ ايتساق, «پاراسات» وردەنىمەن وبلىستىق ارداگەرلەر كەڭەسىنىڭ توراعاسى ەربولات تۇرىمبەتوۆ پەن «اقتەرەك» شارۋا قوجالىعىنىڭ باسشىسى تەمىرلان ءشاينۇسىپوۆ ماراپاتتالدى. سونىمەن قاتار ۇيعىر اۋدانىنىڭ ەڭبەك ارداگەرى ابديماناپ اميتاحۋنوۆ, رايىمبەك اۋداندىق ارداگەرلەر مەن اقساقالدار القاسىنىڭ توراعاسى بەكبولات بىرباەۆ, ەڭبەكشىقازاق اۋدانىنىڭ ەڭبەك ارداگەرى مەيراش نۇراقانقىزى, تالعار اۋداندىق اۋرۋحاناسى باس دارىگەرىنىڭ ورىنباسارى تيمۋر اقمىرزا ۇلى جانە «Kelun-Kazpharm» جشس باس ديرەكتورى مەرەي سلام ۇلى «قۇرمەت» وردەنىنىڭ يەگەرلەرى اتاندى. ءوڭىردىڭ وركەندەۋىنە ەلەۋلى ۇلەس قوسقان بىرقاتار ماماندارعا «ەڭبەك داڭقى» وردەنى, «ەرلىگى ءۇشىن», «ەرەن ەڭبەگى ءۇشىن», «شاپاعات» مەدالدەرى جانە قازاقستان رەسپۋبليكاسىنىڭ قۇرمەت گراموتاسى تابىستالدى.
قۋانىش ەسەلەنگەن وسى كۇنى ءسۇيىنباي اتىنداعى وبلىستىق فيلارمونياعا ءوڭىر باسشىسى مارات سۇلتانعازيەۆ 51 ورىندىق اۆتوبۋستىڭ كىلتىن سالتاناتتى تۇردە تابىس ەتتى.
«الماتى وبلىسى اكىمدىگىنىڭ قولداۋىمەن قارجى ءبولىنىپ, بۇگىن اۆتوبۋسقا يە بولدىق. وتە قۋانىشتىمىز. ەندى ۇجىمنىڭ جان-جاققا ىسساپارعا بارۋى جەڭىلدەيدى. مەرەكە قۇتتى بولسىن, بارشا جۇرتقا تەك جاقسىلىق تىلەيمىن», دەدى فيلارمونيا باسشىسى دانيار قۇرامىسوۆ.
ەسەلى ەڭبەكتەرى ەلەنگەن ەڭبەك ادامدارىنىڭ قۋانىشتارىندا شەك بولمادى.
«بۇگىن مەنىڭ عانا ەمەس, ءبىزدىڭ اۋىلدىڭ, اۋدانىمىزدىڭ ەڭبەگى باعالانىپ جاتىر. وعان مەملەكەت باسشىسىنىڭ ءوزى ۇيىتقى بولدى. 40 جىل بويى اۋىل شارۋاشىلىعى سالاسىندا قىزمەت ەتىپ كەلەمىن. وسى جىلداردا حالىقتىڭ ءال-اۋقاتىن ارتتىرۋ جولىندا ايانىپ قالعان كەزىمىز جوق. جۇمىسشىلارعا 150-گە جۋىق ءۇي سالىپ بەردىك. قازاقستان ەكونوميكاسىنىڭ دامۋىنا كىشكەنتاي بولسا دا ۇلەس قوستىق دەپ سانايمىز. بۇگىنگى ماراپات – سونىڭ ءبىر بەلگىسى», دەپ اعىنان جارىلعان «پاراسات» وردەنىنىڭ يەگەرى تەمىرلان ءشاينۇسىپوۆ اسپانىمىز اشىق, زامانىمىز تىنىش بولۋىنا تىلەكتەستىگىن ءبىلدىردى.
رەسپۋبليكا كۇنىنە وراي, الماتى وبلىسى مەملەكەتتىك كىرىستەر دەپارتامەنتىنىڭ جاڭا عيماراتى پايدالانۋعا بەرىلدى. اتالعان عيمارات قوناەۆ قالاسىنا كىرەبەرىس تۇستا ورنالاسقان. بۇل نىسان بۇرىندارى ويىنحانا بولعان.
سىزدەر جاڭا قۇرىلعان وبلىسىمىزدىڭ بارلىق قىزمەتشىلەرى سياقتى كوشىپ-قونۋدىڭ قيىندىعىن دا, وزىندىك قىزىعىن دا كوردىڭىزدەر. بىراق ەشقانداي كەدەرگىگە قاراماستان, ايانباي ەڭبەك ەتىپ كەلەسىزدەر. جاڭا عيماراتتا ەل بولاشاعىن جارقىن ەتەر جوبالار ىسكە اسا بەرسىن, ۇلتتىق مەرەكە قۇتتى بولسىن!», دەدى وبلىس اكىمى مارات ەلەۋسىز ۇلى.
ال دەپارتامەنت باسشىسى بىرتىندەپ ولقىلىقتار وڭالىپ كەلە جاتقانىن العا تارتتى.
«ايتۋلى مەرەكەگە وراي قۋانىشقا كەنەلدىك. وسىعان دەيىن ءبىز 3 جەردە ءبولىنىپ وتىردىق. بۇل عيماراتتى وبلىس باسشىلىعىنىڭ قولداۋىمەن ساتىپ الدىق. نىساندى جوندەۋدەن وتكىزدىك. مۇندا 196 ادام قىزمەت ەتۋگە ءتيىس. باستاپقىدا سالىقتار بويىنشا بارلىق جۇمىستى 86 مامان عانا جۇرگىزدى. بۇگىندە شتات سانى 160-قا جەتتى. ءالى دە بىلىكتى ماماندار قاجەت, بايقاۋ جاريالانۋدا», دەگەن دەپارتامەنت باسشىسى قۇلمۇحانبەت يساقوۆ ەڭسەلى عيماراتتا جۇمىس جاندانا تۇسەتىندىگىنە ۋادە ەتتى.
ەلدىگىمىزدى اسقاقتاتقان رەسپۋبليكا كۇنى قاراساي اۋدانىنداعى سۇلەيمەن دەميرەل اتىنداعى ۋنيۆەرسيتەتتىڭ سپورت جانە مادەنيەت كەشەنى قولدانىسقا بەرىلدى.
كەشەننىڭ جالپى اۋماعى – 4 370 شارشى مەتر. ونىڭ ىشىندە 1 400 شارشى مەترلىك سپورت زالى ورنالاسقان. نىساندا ۇلدار مەن قىزدارعا ارنالعان 2 فيتنەس ورتالىعى بار. سونداي-اق مۇندا ءارتۇرلى مادەني ءىس-شارالارعا ارنالعان الاڭدار, اكت زالى ورنالاسقان. جالپى, ۋنيۆەرسيتەتتە 28 ستۋدەنتتىك كلۋب سپورتتىق, شىعارماشىلىق جانە مادەني باستامالاردى جۇزەگە اسىرۋدا. كەشەن زاماناۋي كەرەك-جاراقتارمەن جابدىقتالعان.
عيماراتتىڭ اشىلۋ سالتاناتىنا وبلىس اكىمى مارات سۇلتانعازيەۆ ارنايى قاتىسىپ, ۇجىمدى مەرەكەمەن قۇتتىقتادى. ول ءوز سوزىندە ءوڭىر ءۇشىن مامان دايارلاۋدا سدۋ-ءدىڭ ءرولى ماڭىزدى ەكەنىن ايرىقشا اتادى.
سۇلەيمەن دەميرەل اتىنداعى ۋنيۆەرسيتەتتىڭ سپورت جانە مادەنيەت كەشەنىنىڭ القىزىل لەنتاسى قيىلعان سوڭ وبلىستاعى 200 مەكتەپ ديرەكتورلارىنىڭ قاتىسۋىمەن سەمينار-ترەنينگ وتكىزىلدى. بۇل شارا وقۋ وشاقتارىنداعى, پەداگوگيكا سالاسىنداعى تۇيتكىلدى ماسەلەلەردى تالقىلاۋ ءۇشىن ارنايى ۇيىمداستىرىلعان.
الماتى وبلىسى
