– «باسپانا – باقىتتىڭ كىلتى» دەگەن ءسوزدى حالقىمىز بەكەر ايتپاعان. كەز كەلگەن ادامنىڭ, كەز كەلگەن وتباسىنىڭ ۇلكەن ارمانى وسىلاي سىزدەر سەكىلدى باسپانالى بولۋ ەمەس پە؟ مىنەكي, بۇگىن ۇلتتىق مەرەكە – رەسپۋبليكا كۇنى قارساڭىندا سول قۋانىشقا يە بولىپ جاتىرسىزدار. قۇتتى بولسىن! بيىل قوستاناي قالاسىندا 33 كوپقاباتتى ءۇي تۇرعىزىلدى. ال الداعى 5 جىلدا 2,5 ملن شارشى مەتر تۇرعىن ءۇي سالۋدى جوسپارلاپ وتىرمىز. دەمەك تاعى 80 مىڭ ادام باسپانالى بولادى دەگەن ءسوز, – دەدى ايماق باسشىسى.
باسپانا قۋانىشىنا يە بولعانداردىڭ ىشىندە كوپبالالى انا ءلاززات قاپاباەۆا دا بار. بەس بالا تاربيەلەپ وتىرعان انانىڭ تۇڭعىشى – 22-دە, كەنجەسى 4 جاستا ەكەن. 4 جىل بويى پاتەر جالداپ تۇرۋ وڭايعا سوقپاپتى.
– ءوزىمىز وسىدان ءتورت جىل بۇرىن ۇزىنكول اۋدانىنان كوشىپ كەلدىك. سودان بەرى اركىمنىڭ بوساعاسىن پانالاپ جۇردىك. كوپ بالامەن پاتەر جالداپ تۇرۋ قازىر وتە قيىن. ەندى مىنە, سونىڭ ءبارى ارتتا قالىپ, ءوز پاتەرىمىزگە قول جەتكىزگەنىمىزگە, شىنىمدى ايتسام, ءالى دە سەنە الماي تۇرمىن. ءبىر جاقسى تانىسىمىز كوپبالالى انا رەتىندە كەزەككە تۇرساڭ, مەملەكەت پاتەر بەرەدى دەگەن سوڭ, وبلىستىق اكىمدىككە بارىپ, كەڭەستەن ءوتىپ, قۇجاتتارىمىزدى جيناپ وتكىزدىك. كوپ كەشىكپەي, مىنە, بۇگىن كەزەك كەلىپ, پاتەردىڭ كىلتىن الدىق. ءوزىم دە, بالالارىم دا قۋانىپ جاتىرمىز, – دەيدى ل.قاپاباەۆا.
«نۇرلى جەر» باعدارلاماسى بويىنشا قوستانايدا وسىمەن ءۇشىنشى كوپقاباتتى تۇرعىن ءۇي جالعا بەرىلدى. بارلىعى – 273 پاتەر. جىل اياعىنا قاراي «اۋەجاي» شاعىن اۋدانىندا تاعى ءبىر 9 قاباتتى ءۇي پايدالانۋعا بەرىلمەك.
قالالىق تۇرعىن ءۇي قاتىناستارى ءبولىمى باسشىسىنىڭ مىندەتىن اتقارۋشى عابيت بەكتابانوۆتىڭ ايتۋىنشا, بيىل قالالىق قۇرىلىس باسقارماسى الەۋمەتتىك قولداۋعا مۇقتاج وتباسىلارعا ارناپ 40 پاتەر ساتىپ الادى. ونىڭ ءبارى الدىمەن تۇرعىن ءۇي ءبولىمىنىڭ بالانسىنا بەرىلەدى. سودان كەيىن كەزەكتە تۇرعاندارعا تاراتىلادى.
قوستاناي وبلىسى
