جارىس قورىتىندىسى بويىنشا بەلگىلى ايتىس اقىنى ەركەبۇلان قاينازاروۆ تۋرنير جەڭىمپازى اتاندى. ءبىرىنشى ورىن يەگەرىنە 300 مىڭ تەڭگەنىڭ سەرتيفيكاتى تابىستالدى. بەلگىلى جۋرناليست, اقىن تالعات ەشەن ۇلى ەكىنشى ورىنعا يە بولدى. ول 200 مىڭ تەڭگە كولەمىندەگى قارجىلاي سىياقىمەن ماراپاتتالدى. سونداي-اق ۇيىمداستىرۋشىلاردىڭ شەشىمى بويىنشا ءۇشىنشى ورىندى قالامگەر سادىبەك تۇگەل مەن بەلگىلى سپورت ءجۋرناليسى نەسىپ ءجۇنىسباي ۇلى يەلەندى.
ءتۋرنيردى ۇيىمداستىرۋشىلار جارىس بارىسىندا جۇلدەلى ورىنداردان بولەك, بيىل ەلىمىز بويىنشا مەرەيتويلارى اتالىپ ءوتىپ جاتقان قالامگەرلەر – كەمەل توقاەۆ, سەيداحمەت بەردىقۇلوۆ, ورالحان بوكەي اتىنداعى ارنايى سىيلىقتار دا تاعايىندادى. ءار اتالىم بويىنشا ۇزدىك دەپ تانىلعان قالامگەرلەرگە 100 مىڭ تەڭگە كولەمىندەگى قارجىلاي سىيلىق تابىستالدى. اتاپ ايتار بولساق, كەمەل توقاەۆ اتىنداعى ارناۋلى جۇلدە جازۋشى قويشىعارا سالعارا ۇلىنا, سەيداحمەت بەردىقۇلوۆ اتىنداعى جۇلدە قازاق سپورت جۋرناليستيكاسىنىڭ ارداگەرى نەسىپ ءجۇنىسباي ۇلىنا جانە ورالحان بوكەي اتىنداعى سىيلىق بەلگىلى قالامگەر, پارلامەنت سەناتىنىڭ دەپۋتاتى نۇرتورە جۇسىپكە بۇيىردى.
سونىمەن قاتار ارناۋلى جۇلدەلەردەن بولەك, تاعى بىرنەشە ويىنشى قوسىمشا سىيلىقتارعا يە بولدى. قازىلاردىڭ شەشىمىمەن «الىستان ات تەرلەتىپ كەلگەن ويىنشى» اتالىمى الماتى قالاسىنان ارنايى كەلگەن قازاق جۋرناليستيكاسىنىڭ ارداگەرى قاينار ولجايعا, «مادەنيەتتى ويىنشى» اتالىمى بەلگىلى جازۋشى شارحان قازىعۇلعا, «العاشقى شار» اتالىمى كۇيشى سەكەن تۇرىسبەككە بۇيىردى. سونداي-اق ارداگەر جۋرناليست كەنجە جۇماعۇل «مەرگەن ويىنشى», ءالىمجان سابىرجان ۇلى «شەبەر ويىنشى» دەپ تانىلسا, جاندوس دۇيسەكەەۆ «ۇزدىك دۋپلەت» اتالىمى بويىنشا ۇزدىك شىقتى. اتالعان ماراپات يەلەرىنە باعالى سىيلىقتار مەن اقشالاي جۇلدە تابىستالدى.
ويىنداردىڭ ەرەجەگە ساي جانە ءادىل وتۋىنە بيلياردتان ەكى دۇركىن الەم چەمپيونى ەرنار شىمباەۆ تورەلىك جاسادى.
