جينالعانداردى قۇتتىقتاعان ءماجىلىس توراعاسى بىلتىر 25 قازان مەملەكەت باسشىسىنىڭ ۇسىنىسىمەن رەسپۋبليكا كۇنى رەتىندە قايتا جاڭعىرىپ, وعان ۇلتتىق مەرەكە مارتەبەسى بەرىلگەنىن اتاپ ءوتتى.
– رەسپۋبليكا كۇنى – قازاقستاننىڭ دەربەس مەملەكەت رەتىندە قالىپتاسا باستاۋىنىڭ ءبىرىنشى باسپالداعى. ول – ءبىزدىڭ تاۋەلسىزدىگىمىزگە جاسالعان تاريحي قادام. بۇل – ۇلتتى ۇيىستىراتىن, پاتريوتيزمگە تاربيەلەيتىن, ەلىمىزدى جاڭا جەتىستىكتەرگە جەتەلەيتىن مەيرام, – دەدى ە.قوشانوۆ.
ءماجىلىس توراعاسى رەسپۋبليكا كۇنىنىڭ قايتا جاڭعىرۋى, شىن مانىندە, اقجولتاي وقيعا بولىپ, سودان بەرى ەلىمىزدە كوپتەگەن ىرگەلى وزگەرىس بولىپ جاتقانىنا توقتالدى.
– سەگىزىنشى سايلانعان پارلامەنت ءماجىلىسىنىڭ دەپۋتاتتارى رەتىندە ءبىز پرەزيدەنتىمىزبەن بىرگە ادىلەتتى قازاقستاندى قالىپتاستىرۋ جولىندا ەڭبەك ەتەمىز. دەپۋتاتتىق كورپۋس وكىلدەرى سول رەفورمالاردىڭ باسى-قاسىندا بولىپ كەلەمىز. پارلامەنتتە تاريحي زاڭدار مەن ەل تاعدىرىن ايقىندايتىن ماڭىزدى قۇجاتتار قابىلداۋمەن اينالىسىپ وتىرمىز, – دەدى پالاتا توراعاسى.
سونىمەن قاتار ەرلان قوشانوۆ مەملەكەت باسشىسى دا, حالىق تا دەپۋتاتتىق كورپۋستىڭ, جالپى, ءماجىلىستىڭ بەلسەندى دە ءتيىمدى جۇمىسىنا جوعارى باعا بەرىپ وتىرعانىن ايتتى.
سالتاناتتى جيىندا پالاتا توراعاسى دەپۋتاتتار مەن ءماجىلىس اپپاراتىنىڭ قىزمەتكەرلەرىنە پرەزيدەنتتىڭ قۇتتىقتاۋى مەن العىسىن جەتكىزىپ, مەملەكەتتىك ناگرادالاردى تاپسىردى.
مەملەكەت باسشىسىنىڭ جارلىعىمەن «پاراسات» وردەنىمەن ءماجىلىس دەپۋتاتتارى ەرمۇرات باپي, ەرلان بارلىباەۆ, ەركەبۇلان مامبەتوۆ ماراپاتتالدى. ال دەپۋتاتتار نۇرلان اۋەسباەۆ, سنەجاننا يماشەۆا, يۋليا كۋچينسكايا, ماگەررام ماگەررام, ارداق نازاروۆ, سونداي-اق ءماجىلىس اپپاراتىنىڭ ءبولىم مەڭگەرۋشىلەرى زاۋرە يمانبەرگەنوۆا مەن مايراش كوزجانوۆا «قۇرمەت» وردەنىمەن ماراپاتتالدى.
«قازاقستاننىڭ ەڭبەك سىڭىرگەن قايراتكەرى» قۇرمەتتى اتاعىن قازىبەك يسا الدى. «ەرەن ەڭبەگى ءۇشىن» مەدالى ءماجىلىس دەپۋتاتتارى ەرلان ابديەۆ, ولجاس قۇسپەكوۆ, تاڭساۋلە سەرىكوۆ جانە ءماجىلىس اپپاراتىنىڭ ءبولىم مەڭگەرۋشىلەرى مۇحتار يبرايموۆ پەن قونىسباي تۇسىپجانوۆقا تابىستالدى.
ەرلان قوشانوۆ ءماجىلىس اپپاراتى مەن ماتەريالدىق-تەحنيكالىق قامتاماسىز ەتۋ باسقارماسى قىزمەتكەرلەرىنە ءماجىلىس توراعاسىنىڭ العىسحاتتارىن تاپسىردى.
