رەسپۋبليكا كۇنى مەرەكەسى اياسىندا تاراز قالاسى اكىمدىگى مەن قالالىق ارداگەرلەر كەڭەسىنىڭ بىرلەسە ۇيىمداستىرۋىمەن «قىزدارعا اسەمدىك جاراسادى» اتتى ماقتاۋلى, شاشباۋلى ارۋلار اراسىندا بايقاۋ ءوتتى. ءىس-شاراعا ارنايى قاتىسقان تاراز قالاسى اكىمىنىڭ ورىنباسارى ءداۋىر داۋلەتوۆ بايقاۋدىڭ ماڭىزىنا توقتالدى.
«راسىندا دا, قازاق حالقى قىز بالاسىن قاتتى قادىرلەگەن. ءتىپتى بابالارىمىز نازىك جاندىلاردىڭ بويىنان ءاردايىم سۇلۋلىقپەن قاتار ادەپتىلىكتى, يماندىلىقتى ىزدەگەن. سۇلۋلاردىڭ بويىنا سول ىزگى قاسيەتتىڭ ءبارىن ارداقتى انالار دارىتىپ وتىرعان. رەسپۋبليكا كۇنى مەرەكەسى اياسىندا وتكىزىلىپ وتىرعان «قىزدارعا اسەمدىك جاراسادى» بايقاۋىنىڭ تاعىلىمى تەرەڭدە جاتىر. بايقاۋ بارىسىندا ارۋلارىمىزدىڭ بويىنان ءتۇرلى ونەردىڭ ۇشقىنىن اڭعاردىق. قازاق ارۋىنا ءتان ءداستۇردىڭ جالعاسىن كوردىك. وسىنداي ءىس-شارالار كەزىندە قاراكوز قارىنداستارىمىزدىڭ تانىمى مەن ءبىلىمىن, بويعا جيعان ادەبى مەن يمانىن بايقايمىز. سول تۇرعىدان كەلگەندە بايقاۋ كوپتىڭ كوڭىلىنەن شىقتى», دەدى د.داۋلەتوۆ.
«مەن قازاقتىڭ قىزىمىن دارا تۋعان», «ۇيادا نە كورسەڭ, ۇشقاندا سونى ىلەسىڭ», «بىلىكتى قىز», «قىز وسسە, ەلدىڭ كوركى» سىندى كەزەڭدەردەن قۇرالعان بايقاۋ قورىتىندىسىندا تاراز يننوۆاتسيالىق كوپسالالى كوللەدجىنىڭ ءۇمىتى داميرا مەيىرقۇلعا ءبىرىنشى ورىن بۇيىرسا, م.ح.دۋلاتي اتىنداعى تاراز وڭىرلىك ۋنيۆەرسيتەتى اتىنان سىنعا تۇسكەن قاراقات مەيرامبەك ەكىنشى ورىنعا, ش.مۇرتازا اتىنداعى تاراز يننوۆاتسيالىق ينستيتۋتىنىڭ ستۋدەنتى بافارۋزا بالتاباي جۇلدەلى ءۇشىنشى ورىنعا لايىق دەپ تانىلدى. سونداي-اق بىرنەشە قاتىسۋشى ارنايى اتالىمدار بويىنشا ماراپاتتالدى.
تاراز
