وعان بەلگىلى قوعام قايراتكەرلەرى زامانبەك نۇرقادىلوۆ, زامانبەك باتتالحان ۇلى, ەتنوگراف-عالىم جاعدا بابالىق ۇلى, جۋرناليست باعدات مۇپتەكەقىزى باس بولىپ, سارسەنبەك داۋلەتباق ۇلى, ايتباي جەتىباي ۇلى, ءبايجۇنىس كودەك ۇلى, مولداجان مامەت ۇلى, بايتەكە ءتاجى ۇلى, ابەن توقتاسىن ۇلى, سەيتجان ءبايجۇنىس ۇلى, شاكەن وشانباي ۇلى, ابىلحاق تۇردىباي ۇلى سەكىلدى بىرقاتار قۇسبەگى اتسالىسقان بولاتىن. سودان بەرى 35 جىل ىشىندە قۇسبەگىلىكتىڭ ءورىسى كەڭەيىپ, ەلىمىزدە عانا ەمەس, شەتەلدەرگە دە تانىمال بولۋىنا ۇلتتىق ونەردىڭ جاناشىرى, بەلگىلى جۋرناليست باعدات مۇپتەكەقىزى باستاعان ۇلتجاندى ادامداردىڭ قوسىپ كەلە جاتقان ۇلەسى ۇشان-تەڭىز. ەلەۋلى ەڭبەكتىڭ ارقاسىندا الماتى وبلىسىنان باستاۋ العان يگى شارا ناتيجەسىندە رەسپۋبليكاداعى بارلىق ۇلتتىق سپورت مەكتەبىندە «قۇسبەگىلىك» بولىمدەرى اشىلىپ, بۇل كۇندە جاس بۋىندى قىران باپتاۋعا باۋلىپ كەلەدى.
جۋىردا اقاي نۇسىپبەكوۆ اتىنداعى اۋىل ماڭايىنداعى «قۇلاعان جار» تاۋىنىڭ باۋرايىندا «جالايىر شورا» مەكتەبىنىڭ قۇرىلعانىنا 35 جىل تولۋىنا وراي جانە بابالار مۇراسىن جالعاستىرۋشى, قۇسبەگىلىك ونەردىڭ وركەن جايۋىنا بىردەن-ءبىر مۇرىندىق بولعان سارسەنبەك داۋلەتباقوۆتىڭ وسى سالاعا سىڭىرگەن ەڭبەگىن ايرىقشا اتاپ ءوتۋ ماقساتىندا «سالبۋرىن – 2023» حالىقارالىق قۇسبەگىلەر ءتۋرنيرى ۇيىمداستىرىلدى.
«قۇسبەگى مەكتەبىنىڭ نەگىزىن قالاۋشى سارسەنبەك بارمەنبەك ۇلى اتامىز شارۋاشىلىقتا شوپان بولا ءجۇرىپ, جۇيرىك ات جاراتىپ, وتىز جىلداي قولىنان قىران قۇسىن تاستاماعان. كەڭەستىك كەزەڭنىڭ وزىندە جاپون, فرانتسۋز كينوگەرلەرىن تاڭعالدىرىپ, قاسقىر, ەلىكتەن باسقا, ورمان ىشىندەگى سىلەۋسىنگە بۇركىتىن ءتۇسىرىپ, قازاق ەلىن شەتەلدەرگە تانىتقان ايگىلى بۇركىتشى. قازاق قۇسبەگىلىك ونەرىندە ءوزىنىڭ «التايدىڭ اقيىعى», ء«تاڭىرتاۋدىڭ مۇزبالاق قاراسى», «دالانىڭ التىن سارىسى» سىندى قىراندارىنىڭ قاسيەتىن تانىپ, قادىرىنە قانىعىپ وسكەن ونەگەلى جان. سونىمەن قاتار جۇيرىك اتقا التىنمەن اپتالعان, كۇمىسپەن كۇپتەلگەن ەر-تۇرمان جاساپ, ايەلدەردىڭ اشەكەي بۇيىمدارىن سوعىپ اتى شىققان زەرگەر سارسەنبەك اتا جىگىتكە ءتان جەتى ونەردى يگەرگەن سال-سەرىلەردىڭ سوڭعى تۇياعى ەدى», دەگەن رەسپۋبليكالىق «قۇسبەگىلىك» فەدەراتسياسى قب ۆيتسە-پەرزيدەنتى باعدات مۇپتەكەقىزى بابادان قالعان ۇلتتىق قۇندىلىق, بەكزات ونەردى كەيىنگى ۇرپاققا امانات ەتىپ قالدىرۋ, ۇزاق جىلدار بويى تاسادا قالعان ەلەۋلى ەسىمدى قايتا جاڭعىرتۋ جانە حالىقارالىق دەڭگەيگە كوتەرۋ ماقساتىندا وتكەن جىلى بەلگىلى تەلەجۋرناليست بەرىك ءۋاليدىڭ باسشىلىعىمەن رەسپۋبليكالىق «قۇسبەگىلىك» فەدەراتسياسى قوعامدىق بىرلەستىگىنىڭ قۇرىلعانىن اتاپ ءوتتى. سونىڭ نەگىزىندە بۇل الماتى وبلىسىندا العاش رەت حالىقارالىق دەڭگەيدە ءوتىپ وتىرعان تۋرنير.
تۋريزم جانە سپورت مينيسترلىگى دەنەشىنىقتىرۋ جانە سپورت كوميتەتى, «سامۇرىق-قازىنا» اق, سپورت قورى, ۇلتتىق سپورت قاۋىمداستىعى, رەسپۋبليكالىق «قۇسبەگىلىك» فەدەراتسياسى قب, الماتى وبلىسىنىڭ اكىمدىگى مەن «قىران» فەدەراتسياسى قوعامدىق قورى ۇيىمداستىرعان «ەسكىرمەيتىن ەسىمدەر» اتتى جوبا اياسىندا وتكەن بۇل تۋرنيرگە ەلىمىزدەن, تۇركيا, موڭعوليا, قىتاي, قىرعىزستاننان كەلگەن 70-تەن اسا قۇسبەگى قاتىسىپ, باقتارىن سىنادى.
قىران قالىقتاعان حالىقارالىق ءتۋرنيردىڭ اشىلۋ سالتاناتىنا الماتى وبلىسى اكىمىنىڭ ءبىرىنشى ورىنباسارى نۇرلان ءابدىراحىم, كەگەن اۋدانىنىڭ اكىمى نۇرباقىت تەڭىزباەۆ, قۇسبەگىلىكتەن مەملەكەتتىك جاتتىقتىرۋشى بازاربەك كۇنتۋعان ۇلى, الماتى وبلىسىنىڭ دەنەشىنىقتىرۋ جانە سپورت باسقارماسىنىڭ باسشىسى ەربولات سارابەكوۆ پەن قۇرمەتتى سپورت قايراتكەرى, رەسپۋبليكالىق «قۇسبەگىلىك» فەدەراتسياسىنىڭ ۆيتسە-پرەزيدەنتى باعدات مۇپتەكەقىزى قاتىسىپ, دالا قىراندارىنىڭ قىر-سىرىنان سىر شەرتتى جانە جارىسقا قاتىسۋشى قۇسبەگىلەرگە ساتتىلىك تىلەدى.
تۋرنير كەستەسىندە كورسەتىلگەن ءۇش اتالىم بويىنشا, اتاپ ايتساق, بۇركىتتەرمەن, قارشىعا جانە يتەلگىلەرمەن اڭ اۋلاۋدا الدىنا قارا سالماعان قىراندار انىقتالدى. بۇركىتتەر جارىسىندا 1-ورىندى استانادان كەلگەن قۇسبەگى كۇنتۋعان سەرىكبەكتىڭ «العىرى» السا, قارشىعالار جارىسىندا 1-ورىندى جامبىل وبلىسىنىڭ قۇسبەگىسى باباجان بەرىكبولسىننىڭ «قويماسى» يەلەندى. ال يتەلگىلەر سىنىندا 1-ورىندى استانالىق ەراسىل سەرىكبەك ۇلىنىڭ «قاراكوزى» قانجىعالادى. دالا ءتوسىن قيقۋلاتىپ, جۇزدەگەن جانكۇيەردىڭ قىزىعۋشىلىعىن ارتتىرعان تۋرنير قورىتىندىسىندا جەڭىمپازدار ارنايى كۋبوك, مەدال جانە باعالى سىيلىقتارمەن ماراپاتتالىپ, مەرەيلەرى ۇستەم بولدى.
الماتى وبلىسى
