فوتو: Turizm_zhane_sport_ministrligi
بۇگىننەن باستاپ قازاقستان قۇراماسى رەسمي تۇردە IV ازيا پارا ويىندارىنىڭ سايىستارىنا قاتىسۋعا مۇمكىندىك الدى. شاراعا قازاقستان قۇراماسىنىڭ سپورتشىلارى مەن سپورت سالاسىنىڭ ماماندارى قاتىستى.
«قازاقستان قۇراماسى ازيا ويىندارىنا امان-ەسەن جەتتى. ءبىزدىڭ سپورتشىلار كلاسسيفيكاتسيادان ءساتتى ءوتىپ, وزدەرىنىڭ سپورت كلاسىن راستادى. سپورتشىلاردىڭ كلاسى پاراليمپيادالىق سپورتتا شەشۋشى ءرول اتقارادى, بۇل بارلىق قاتىسۋشىلار ءۇشىن ءادىل جارىستاردى قامتاماسىز ەتەدى. ەندى ءبىزدىڭ الدىمىزدا قۇندى مەدالدار ءۇشىن قارقىندى كۇرەس تۇر. قارسىلاستارىمىز وسال ەمەس. وسى پارا ويىندارىنا ەلىمىزدىڭ تاراپىنان سپورتتىڭ 14 ءتۇرى بويىنشا 131 سپورتشى قاتىسادى, بۇل قازاقستاننىڭ ازيا پارا ويىندارى تاريحىنداعى قاتىسۋشىلار سانى بويىنشا جاڭا رەكورد. الدىڭعى ويىندارعا قازاقستاننان 9 سپورت تۇرىنەن 91 سپورتشى قاتىسىپ, 33 جۇلدەگە قول جەتكىزگەن بولاتىن. بيىل ودان دا كوپ مەدال اكەلەمىز دەپ ۇمىتتەنەمىز» , دەدى ۇلتتىق پاراليمپيادا كوميتەتىنىڭ باس حاتشىسى ەرلان سۇلەيمەنوۆ.
قازاقستان تۋىن كوتەرۋ راسىمىنە پارا پاۋەرليفتينگتەن توكيو-2020 پاراليمپيادا ويىندارىنىڭ جەڭىمپازى, الەم جانە ازيا چەمپيونى داۆيد دەگتيارەۆ قاتىستى. سپورتشى جازعى ازيا پارا ويىندارىندا دا وتانداستارىمىز بارىن سالىپ, كوك بايراعىمىزدى جەلبىرەتۋدە ايانىپ قالمايتىنىن جەتكىزدى.
حانچجوۋداعى جازعى ازيا پارا ويىندارى 22-28 قازان ارالىعىندا وتەدى. ازيا قۇرلىعىنىڭ 22 مەملەكەتىنەن كەلگەن 4000-عا تارتا سپورتشى جۇلدە ءۇشىن سايىسقا تۇسەدى.
