فوتو: اشىق دەرەككوز
گازەتتىڭ بۇگىنگى سانىندا ءتىلشى ەسكەندىر زۇلقارنايدىڭ «قىز الىپ قاشام دەپ, قىلمىسكەر اتاندى» اتتى ماقالاسى جارىق كوردى. اۆتور ماقالادا قىز الىپ قاشامىن دەپ جازاعا تارتىلعان ازاماتتاردىڭ مىسالىن كەلتىرگەن. بۇل جاعدايدا قىز الىپ قاشۋعا قاتىسقان بارلىق ازامات جاۋاپقا تارتىلاتىنى ايتىلادى.
شىمكەنت قالاسىنىڭ پروكۋرورى عابيت مۇقانوۆتىڭ ايتۋىنشا, قىز الىپ قاشۋ فاكتىلەرى وڭىردە ءالى دە ازايماي تۇر. ماسەلەن, سوڭعى ەكى جىلدا قالىڭدىقتى الىپ قاشۋ بەلگىلەرى بار 25 دەرەك تىركەلىپتى. وسى وقيعالاردىڭ بارلىعىندا قوزعالعان قىلمىستىق ىستەر سوتقا دەيىن جەتپەگەن. سەبەبى قالىڭدىقتار «كۇيەۋ جىگىتتىڭ» ۇيىنە ءوز ەركىمىزبەن كەلدىك دەپ ارىز جازعاندىقتان, قىلمىس قۇرامىنىڭ بولماۋىنا بايلانىستى ءىس توقتاتىلعان. مامانداردىڭ ايتۋىنشا, مۇنداي جاعدايلاردا, وكىنىشكە قاراي, كەيبىر جاس قىزداردى ۇيىنە قايتۋعا ۇيات بولادى دەپ, ەركىنەن تىس نەكەگە تۇرۋعا ماجبۇرلەيتىن كورىنەدى.
«قىز الىپ قاشۋعا بايلانىستى ارەكەتتەر ءمان-جايلارعا بايلانىستى ادامدى ۇرلاۋ (قىلمىستىق كودەكستىڭ 125-بابىمەن 15 جىلعا دەيىنگى مەرزىمگە باس بوستاندىعىنان ايىرۋ قاراستىرىلعان) نەمەسە باس بوستاندىعىنان زاڭسىز ايىرۋ (قىلمىستىق كودەكستىڭ 126-بابى, 10 جىلعا دەيىنگى مەرزىمگە باس بوستاندىعىنان ايىرۋ كوزدەگەن) دەپ سارالانۋى مۇمكىن. اتالعان باپتار بويىنشا قىلمىستىق قۇقىق بۇزۋشىلىق تۋرالى ىستەر جاريالى ايىپتاۋ iستەرi بولىپ ەسەپتەلەدى. مۇنداي جاعدايلاردا بۇل iستەر بويىنشا قىلمىستىق قۋدالاۋ جابiرلەنۋشiنiڭ شاعىم بەرگەن-بەرمەگەنىنە قاراماستان جۇزەگە اسىرىلادى», دەدى پروكۋرور.
