سۋرەتتى تۇسىرگەن – جانگەلدى ابدىعالىم
كۇن ەرتەمەن باستالعان قاراعاندىنىڭ وڭتۇستىك-شىعىس بولىگىندەگى «Global سity» كوپفۋنكتسيونالدى ساۋدا-قويما كەشەنى اۋماعىنداعى جارمەڭكەگە جەتى اۋداننىڭ 100-دەن استام شارۋاشىلىعى 630 توننا ءونىم اكەلدى. قاناتتاس قالالارداعى كاسىپورىندار دا قالىس قالمادى. جارمەڭكەدە ەت, ءسۇت ونىمدەرى, كارتوپ, كوكونىستەر سورەگە قويىلدى. باعا نارىقتاعىدان 10-15 پايىزعا تومەن. كەلگەن ءونىمنىڭ باسىم بولىگى – ەت. بۇل قالاداعىلار ءۇشىن قۋانىش دەسەك تە بولادى. ويتكەنى قازىر – كۇزدىك سويىپ الاتىن ۋاقىت. ەرتە قامدانعاندار سوعىمدارىن سايلاپ الدى.
جىلقى ەتىنىڭ كيلوسى – 2 600 تەڭگەدەن, سيىر ەتى – 2 300 تەڭگەدەن, قوي ەتى – 2 200 تەڭگەدەن ساۋدالاندى. كارتوپتىڭ كيلوسى – 100, پيازدىكى – 80, قىرىققاباتتىكى – 130 تەڭگە. قامپايعان سورە تال تۇسكە دەيىن بوساپ تا قالدى.
– قارقارالىدان كەلگەن جاباعىنىڭ جارتىسىن ساتىپ الدىم. باعاسى قالتاڭا قونىمدى. بازارداعىدان اجەپتاۋىر ارزان. ءارى جاس مال. كوزىڭىزبەن كورىپ, ۇستاپ, تاڭداپ الۋعا مۇمكىندىك مول, دەيدى ءوزىن بەكسۇلتان دەپ تانىستىرعان قالا تۇرعىنى.
ساۋداعا اكەلىنگەن 630 توننا ءونىمنىڭ 64 تونناسى – ەت, 390 تونناسى – كارتوپ, 130 تونناسى – كوكونىس, 21 تونناسى – ءسۇت ءونىمى, 8 تونناسى – بالىق. مۇنىڭ سىرتىندا 190 مىڭ دانا تاۋىق جۇمىرتقاسى مەن 14,5 توننا وزگە دە ءونىم بار.
نۇرا اۋدانى قاروي اۋىلىنان كەلگەن «قوعام» شارۋا قوجالىعىنىڭ جەتەكشىسى جامبىل مامبەتوۆ جارمەڭكەگە جىلدا بەلسەنە قاتىسادى. قوي-قوزىسىن ساۋدالايدى. بۇل جولى 200 كيلو قوزى ەتىن اكەلىپتى. تۇسكە دەيىن سورەسىندە ءبىر قوزى عانا قالىپتى.
– قوي-قوزى ەتىنىڭ ءوتىمى جاقسى. اكەلگەن تاۋارىمدى وزىممەن الىپ قايتقان كۇنىم بولماپتى. ماسەلەن, الىپ كەلگەن 200 كيلو ەتىمنەن 30-اق كيلو قالدى. شارۋاشىلىعىم بار. نەگىزى باعىتىمىز – قوي ءوسىرۋ. شارۋالار ءۇشىن مۇنداي جارمەڭكە وتە ءتيىمدى. ەشقانداي دەلدالسىز ساۋدالاي الامىز, دەيدى ج.مامبەتوۆ.
كارتوپ وتكىزىپ تۇرعان ساۋداگەر سۇندەت حانتوريەۆتىڭ تۇسكە دەيىن ءبىر جارىم توننا ءونىمىنىڭ جارتىسى ساۋدالانىپ كەتىپتى. «بۇل كارتوپ ۇيدە وسىرىلگەن. ەشبىر حيميكاتسىز, تازا تابيعي ءونىم. ونىڭ ۇستىنە باعاسى بازارداعى كارتوپتان الدەقايدا تومەن», دەيدى س.حانتوريەۆ.
مۇنى دا ايتا كەتكەنىمىز ءجون, قالالىقتارعا قولايلى بولۋى ءۇشىن ءتورت باعىتتا مايقۇدىق, پريشاحتينسك, ميحايلوۆ جانە وڭتۇستىك-شىعىس بويىنشا تەگىن ارنايى قوعامدىق كولىكتەر ۇيىمداستىرىلىپ قويعان.
جارمەڭكە جالعاسىن تابادى. رەسمي ورىنداردىڭ مالىمدەۋىنشە, «Global City» اۋماعىندا كەلەسى جارمەڭكەلەر 28 قازان مەن 4 قاراشاعا جوسپارلانعان. مۇنىمەن قوسا, قاراشا-جەلتوقساندا قاراعاندىدا «Global City», «ۇماي» ساۋدا ءۇيىنىڭ اۋماعىندا (مايقۇدىق) جانە «مولودەجنىي» مادەنيەت ءۇيى (پريشاحتينسك) الاڭىندا دا وتكىزۋ كوزدەلىپ وتىر.
العاشقى جارمەڭكەگە كەلگەندەر كوپ بولعانىمەن, ەستىمەي قالعان ەل دە بار. الداعى جارمەڭكەلەردىڭ جارناماسىن كۇشەيتسە, اۋىل ءدامىن اڭساعان اعايىن قالىس قالماسا دەگەن وي بىزدىكى.
قاراعاندى وبلىسى
