فوتو: assembly.kz
تەمىرجول سالاسى قىزمەتكەرلەرىنىڭ ءومىرىن جاقسارتۋ باعىتىندا كوپتەگەن ماسەلە بارىن العا تارتقان سەناتور جاڭا مينيسترلىك قۇرىلعانىن ەسكە سالدى. بىراق بۇل مەملەكەتتىك ورگان تەمىرجولشىلاردىڭ نەگىزگى ماسەلەلەرىن, ونىڭ ىشىندە جالاقىنىڭ تومەندىگىن, تۇرعىن ءۇيدىڭ جوقتىعىن جانە زەينەتكە شىعۋ جاسىن تومەندەتۋ ماسەلەسىن ءالى شەشپەگەنىن جەتكىزدى.
«وڭىرلەردەگى تەمىرجولشىلاردان العان مالىمەتتەرگە سۇيەنەتىن بولساق, ەڭ تومەنگى ساناتتاعى «بايلانىس جانە بەلگى بەرۋ» ماماندارىنىڭ قولعا الاتىن جالاقىسى اقتوبەدە جوبامەن 200 مىڭ تەڭگە, قىزىلوردادا 180 مىڭ تەڭگە, ءدال سولاي ەڭ تومەنگى ساناتتاعى «جول جوندەۋشىنىڭ» جالاقىسى اباي وبلىسىندا 160 مىڭ تەڭگە, پاۆلودار وبلىسىندا 205 مىڭ تەڭگە. مينيسترلىك پەن وڭىرلەردەگى تەمىرجولشىلاردان العان اقپارات ەكى ءتۇرلى. ءبىز قايسىسىنا سەنەمىز؟ ارينە, حالىقتىڭ اقپاراتىنا سەنەمىز. «قازاقستان تەمىر جولى» ۇلتتىق كومپانياسىنىڭ جىلدىق تابىسىن, مەملەكەت تاراپىنان بەرىلەتىن سۋبسيديانى جانە ينفلياتسيانى ەسكەرە وتىرىپ, تەمىر جول سالاسىنىڭ قاراپايىم جۇمىسشىلارىنىڭ جالاقىسىن كوتەرۋ كەرەك. ەكىنشىدەن, تەمىر جول سالاسىنداعى قاراپايىم جۇمىسشىلارعا كورپاراتيۆتىك كەلىسىم نەمەسە باسقا تەتىكتەردى قاراستىرا وتىرىپ, 55 نەمەسە 57 جاستان زەينەتكە شىعارۋدى قامتاماسىز ەتۋ كەرەك. ۇشىنشىدەن, تەمىر جول قىزمەتكەرلەرىنە ارنالعان تۇرعىن ءۇي باعدارلاماسى ازىرلەنۋى كەرەك, سونداي-اق باعدارلامانىڭ تەتىكتەرىن بارلىق وڭىرلەرگە ەنگىزىپ, جەرگىلىكتى اتقارۋشى ورگاندارمەن ناقتى الگوريتمى جاسالۋى ءتيىس», دەدى گ.شيپوۆسكيح.
سەنات دەپۋتاتى ەلىمىزدە تەمىرجول سالاسىندا 140 مىڭعا تارتا ادام جۇمىس ىستەيتىنىن, وسى سالاداعى كۇرمەۋلى ماسەلەنى وڭتايلى شەشۋ قاجەتتىگىن ايتتى.
