سۋرەتتەر ماناس قايىرحان ۇلىنىڭ جەكە مۇراعاتىنان الىندى
– ماناس قايىرحان ۇلى, ەڭ اۋەلى ءسىزدى كاسىبي مەرەكەڭىزبەن قۇتتىقتايمىن. ءوزىڭىزدى تانىستىرىپ وتسەڭىز.
– كوپ راقمەت! مەرەكە قارساڭىندا كوڭىلىم ءبىر كوتەرىلىپ قالدى. قۋانىشتىمىن! مەن شىعىس قازاقستان وبلىسى تارباعاتاي اۋدانى اقسۋات اۋىلىنىڭ تۋماسىمىن. قازىر استانا قالاسىنداعى 17-ءورت ءسوندىرۋ ءبولىمىنىڭ جۇرگىزۋشى-قىزمەتكەرى بولىپ جۇمىس ىستەيمىن. قىزمەتكە قابىلدانعانىما تۇپ-تۋرا ەكى جىل بولدى. جاسىم 24-تە.
– قۇتقارۋشى ءوز باسىن قاتەرگە تىگىپ, ۇنەمى توتەنشە جاعدايدا جۇمىس ىستەيدى. وڭاي قىزمەت ەمەس. بۇل ماماندىقتى ءوز قالاۋىڭىزبەن تاڭدادىڭىز با؟
– مەنىڭ بۇل ماماندىقتى تاڭداۋىما اپكەم سەبەپكەر بولدى. ول بۇل ماماندىقتىڭ مارتەبەلى مىندەتى جايىندا ايتقاندا بىردەن قىزىعۋشىلىعىم وياندى. حالقىمىزدىڭ يگىلىگى مەن تابيعاتىمىزدىڭ قۇندىلىقتارىن ءتۇرلى قاۋىپ-قاتەردەن قورعاپ, ادامداردىڭ عۇمىرىن ساقتاپ قالۋ ابىرويلى ءىس ەكەنىن جاقسى بىلەمىن. سوندىقتان دا بۇل تاڭداۋىما ەش وكىنبەيمىن. مەكتەپتى تامامداعان سوڭ, 2015 جىلى سەمەي قالاسىنداعى ەۋرازيالىق گۋمانيتارلىق كوللەدجىنە ءورت ءسوندىرۋ ماماندىعىنا وقۋعا ءتۇستىم. وقۋىمدى ءساتتى اياقتاعان سوڭ ءوزىمىزدىڭ اۋىلدىق جەردە ءورت ءسوندىرۋ ءبولىمىنىڭ جۇمىسىنا ارالاسىپ ءجۇردىم. ءتورت اي ۋاقىت قۇجات ءىسىن يگەرىپ, سونداعى قىزمەتكەرلەرگە كومەكتەستىم. سول كەزدە ءورت ءسوندىرىپ ءارى ادامداردى قۇتقارىپ جۇرگەن قىزمەتكەرلەردى كورىپ, سىرتتاي قىزىقتىم. مەن دە ادامدارعا قارلىعاشتىڭ قاناتىمەن سۋ سەپكەندەي عانا بولسا دا كومەكتەسكىم كەلدى. ءسويتىپ جۇرگەنىمدە اسكەرگە شاقىرتۋ الدىم. ءبىر جىل ماڭعىستاۋ وبلىسى بەينەۋ اۋدانىندا وتان الدىنداعى بورىشىمدى وتەدىم. مەن وندا جۇرگىزۋشى بولدىم. جۇرگىزۋشى كۋالىگىمدە كاماز ايداۋعا رۇقسات بار. اسكەردەن كەلگەن سوڭ ءوز ماماندىعىممەن جۇمىس ىستەگىم كەلەتىنىن ءتۇسىندىم. اتا-انام بۇل ويىمدى قۇپتاپ, استاناداعى اپكەلەرىمنىڭ جانىنا باتاسىن بەرىپ جىبەردى. ءسويتىپ قازىر ءوزىم قىزمەت ەتىپ جۇرگەن 17-ءورت ءسوندىرۋ بولىمىنە قۇجاتتارىمدى تاپسىردىم. بىراق سول كەزدە كادر ءبولىمى مەنى جۇرگىزۋشى ەتىپ الادى دەپ ويلامادىم. ءورت ءسوندىرۋشى قىزمەتىنە ءۇمىتتى ەدىم. مەنىڭ اسكەري بيلەتىمدى كورگەن كادر ءبولىمىنىڭ ماماندارى بىردەن ماعان جۇرگىزۋشى قىزمەتىن ۇسىندى. مەن كوپ ويلانباستان كەلىسە كەتتىم.
– اۋىر تەحنيكانى جۇرگىزۋدىڭ ءوز قيىندىقتارى بار شىعار.
– كولىك كەپتەلىسى كوپ مەگاپوليستە اۋىر تەحنيكانى تىزگىندەۋ وڭاي ەمەس. سول سەبەپتى دە بىزدە جۇرگىزۋشىلەر جەتىسپەيدى. باسىم كوپشىلىگى جۇرگىزۋشى بولۋعا كەلىسە بەرمەيدى. مەنىڭ ءوزىم دە العاشىندا كاماز-دى جۇرگىزۋگە جۇرەكسىنەتىنمىن. دەگەنمەن وسىندا ۇزاق جىلدار بويى قىزمەت ەتىپ كەلە جاتقان اعا بۋىننىڭ ءجون سىلتەۋىمەن قىزمەتىمە تەز ۇيرەنىسىپ كەتتىم. قازىر قالانىڭ ءبىراز جولىن جاقسى بىلەمىن.
– شاقىرتۋعا اسىعىپ بارا جاتقاندا وزگە كولىكتەر جول بەرە مە؟
– وكىنىشكە قاراي, كەيدە شاقىرتۋعا اسىعىپ بارا جاتقاندا ءبىزدىڭ الدىمىزدى بوگەپ تۇرىپ الاتىن كولىكتەر بولادى. مۋزىكانىڭ داۋىسىن قاتتى شىعارىپ قوياتىن كولىك جۇرگىزۋشىلەرى ءبىزدىڭ دابىلدىڭ داۋىسىن ەستىمەيدى دە. ءبىز توتەنشە جاعداي ورنىنا جىلدام جەتۋ ءۇشىن باعدارشامنىڭ قىزىل بەلگىسىنە ءوتىپ, جولدىڭ قارسى بەتىنە دە شىعۋىمىز مۇمكىن. دەگەنمەن دە جانىمىزداعى كولىكتەرگە ارنايى بەلگىمىزدى بەرۋدى ۇمىتپايمىز. كوپ جاعدايدا كولىك جۇرگىزۋشىلەرى تۇسىنىستىكپەن قارايدى.
– ءسىزدىڭ مىندەتىڭىزگە تەك كولىك تىزگىندەۋ كىرە مە؟
– ءورت ءسوندىرۋ ۇجىمدىق جۇمىس. سول سەبەپتى مەن تەك جۇرگىزۋشىنىڭ جۇمىسىن اتقارمايمىن. مەنىڭ ەڭ اۋەلگى مىندەتىم – ءورت سوندىرۋشىلەردى اپات ورنىنا جىلدام جەتكىزۋ. ودان كەيىنگى مىندەتىم – قىزمەتكەرلەرگە ءورت سوندىرۋگە قاجەتتى سۋ قورىن بەرىپ وتىرۋ. شىنتۋايتىندا بىزگە كولىكتى قاراۋسىز قالدىرۋعا, ودان الىس كەتۋگە بولمايدى. سوندىقتان ءورت كەزىندە اركىم ءوز مىندەتىن اتقارادى. ال ءورت سوندىرىلگەننەن كەيىن البەتتە ءبىز ارىپتەستەرىمىزگە كومەكتەسەمىز.ويتكەنى ءورت سوندىرۋشىلەردىڭ ەكيپيروۆكاسى مەن ءتۇرلى جابدىقتارى اۋىر كەلەدى.
– تابيعي جانە تەحنوگەندى اپاتتار كەزىندە, كۇندەلىكتى سىن ساتتە سىزدەرگە ۇلكەن جاۋاپكەرشىلىك جۇكتەلەدى. بۇل مارتەبەلى مىندەتتى ابىرويمەن اتقارۋ ءۇشىن ۇلكەن جۇرەك كەرەك. شاقىرتۋعا بارا جاتقان ساتتە ءتۇرلى سەزىمدەردى باستان وتكەرەتىن شىعارسىزدار.
– دابىل قاعىلعان ساتتەن باستاپ ءبىز 1 مينۋت بولماي بارىنشا تەز اپات ورنىنا شىعۋىمىز كەرەك. ءورت ءسوندىرۋ ءبولىمىنىڭ ارنايى ءوز جىلدامدىق رەجيمى بار. ودان اسۋعا بولمايدى. بارىنشا تەز جەتۋگە تىرىسامىز. ارينە, ەلىمىزدە ءورت بولماسا ەكەن دەپ تىلەيمىز. بىراق بولا قويعان جاعدايدا ءبىز ەڭ الدىمەن ءوزىمىزدىڭ ەمەس, وزگەنىڭ ءومىرىن ءبىرىنشى كەزەككە قويامىز. ءبىزدىڭ باستى مىندەتىمىز – ادامداردى قۇتقارۋ, ولاردىڭ ءومىرىن ساقتاپ قالۋ. قورقىنىش سەزىمى بولاتىنىن جاسىرمايمىن. بىراق جولدا كەلە جاتقاندا اعا بۋىن ارىپتەستەر بارىنشا اقىل-كەڭەسىن ايتىپ, كومەكتەسىپ وتىرادى. سول سوزدەر بىزگە مەدەت بولادى. وسى رەتتە قوستاناي وبلىسىندا بولعان ءىرى ورمان ءورتى ەسىمە ءتۇسىپ وتىر. سول توتەنشە جاعداي ورنىنا مەن دە باردىم. ول كەزدە جۇمىسقا كىرگەنىمە ءبىر جىل بولعان. اللا ءساتىن سالىپ, جۇمىسىمىزدى ابىرويمەن اتقارىپ كەلدىك.
جۇمىسىم وزىمە ۇنايدى, ماماندىعىمدى ماقتان ەتەمىن. توتەنشە جاعدايلار مينيسترلىگى تاراپىنان بىزگە كوپ قولداۋ كورسەتىلەدى. قاجەتتى قۇرال-جابدىقتارىمىزدىڭ بارلىعى جاڭا, جالاقىمىز بەن سىياقىمىزدى ۋاقتىلى الامىز. باستىسى حالىقتىڭ ريزاشىلىعىنا بولەنىپ كەلەمىز. ءبىز ءۇشىن ەڭ قىمباتى دا وسى – قالىڭ بۇقارانىڭ ىستىق كوڭىلى.
– اڭگىمەڭىزگە راقمەت! جاۋاپتى جۇمىستارىڭىزعا تابىس, وتباسىلارىڭىزعا اماندىق تىلەيمىن!
اڭگىمەلەسكەن,
مارجان تىلەۋبەك,
«Egemen Qazaqstan»
